రాత్రంతా మేల్కొని 7AM నిదురించే సంగీత దర్శకుడు
తాజా ఇంటర్వ్యూలో మరోసారి తనకు పగటిపూట పని చేయడం చాలా బోరింగ్ అని ఆస్కార్ విజేత ఏ.ఆర్.రెహమాన్ తెలిపారు.
By: Tupaki Desk | 23 April 2025 9:58 AM IST
ఏ.ఆర్.రెహమాన్ నైట్ లైఫ్ గురించి, అతడి పని తీరు గురించి తీవ్రంగా విమర్శించారు వెటరన్ గాయకుడు అభిజీత్. అతడు రాత్రి పూట మేల్కొని పని చేయడం తనకు చాలా చిక్కుల్ని తెచ్చి పెట్టిందని తెలిపారు. అయితే దానికి ధీటుగా స్పందిస్తూ రెహమాన్ సరైన సమాధానం ఇచ్చారు. తనకు నిశ్శబ్ధంలో పని చేసే అలవాటు ఉందని, అందుకే రాత్రి పూట పని చేస్తానని, అది కొందరికి నచ్చకపోవచ్చు అని రెహమాన్ అన్నారు.
తాజా ఇంటర్వ్యూలో మరోసారి తనకు పగటిపూట పని చేయడం చాలా బోరింగ్ అని ఆస్కార్ విజేత ఏ.ఆర్.రెహమాన్ తెలిపారు. ``పగలు మేల్కొనడం, రాత్రి నిదురించడం సాధారణంగా అందరూ చేసే పని.. అది నాకు నచ్చదు.. నేను రాత్రి పని చేసి, పగలు నిదురిస్తాను`` అని తెలిపారు. తనకు ముంబైలో రాత్రి పూట ప్రయాణించడం చాలా ఇష్టమని అన్నాడు. పగలు ట్రాఫిక్ ఉంటుంది కాబట్టి రాత్రి పూట ప్రయాణిస్తానని అన్నాడు. సహజంగానే రెహమాన్ రాత్రి 9 గంటలకు రికార్డింగ్ పని మొదలు పెట్టి ఉదయం 7 గంటల వరకూ పని చేస్తాడని తాళ్ దర్శకుడు సుభాష్ ఘయ్ గతంలో ఓ ఇంటర్వ్యూలో వెల్లడించారు.
అలాగే తెల్లవారు ఝామున 2.30కు నిదుర లేచే అలవాటు కూడా ఉందని, 7 ఏఎం నిదురపోతానని కూడా రెహమాన్ తాజా ఇంటర్వ్యూలో వెల్లడించారు. తాను ప్రయాణాలు చేస్తానని, రాత్రిపూట పనిచేస్తానని, తెల్లవారుజామున దర్గాను సందర్శిస్తానని ఏఆర్ రెహమాన్ తన అలవాటు గురించి చెప్పారు. పగటిపూట హడావుడి మధ్య పని చేయడం తనకు ఇష్టం ఉండదని, రాత్రి పూట నిశ్శబ్ధంలో బాగా దృష్టి పెట్టగలనని అన్నారు. ``నేను రాత్రిపూట గుడ్లగూబను.. ఎక్కడికైనా వెళ్ళగలను. నేను కొన్నిసార్లు ఉదయాన్నే దర్గాకు వెళ్తాను.. ఆపై ట్రాఫిక్ తో పని లేకుండా నిద్రపోతాను. తాళ్ చిత్రీకరణ సమయం నుంచి ఇలాగే ఉన్నాను`` అని తెలిపారు. రాత్రిపూట నిద్రపోవడం, ఉదయం మేల్కొనడం సాధారణ విషయం.. బోరింగ్ అని రెహమాన్ అన్నారు. తన జీవన శైలికి ఇది సరిపడదని అన్నారు.
క్రియేటివిటీ పేరుతో తెల్లవారు ఝామున 2- 3.30 మధ్య నిదుర చెడగొడతాడని, తాను వేరే కమిట్ మెంట్లతో బిజీగా ఉన్నా రాత్రులు రెహమాన్ చిక్కులు తెచ్చి పెడతాడని గతంలో సీనియర్ గాయకుడు అభిజీత్ భట్టాచార్య విమర్శించారు. పైగా రెహమాన్ స్టూడియోలో ఎక్కువ సమయం వేచి చూడాల్సి ఉంటుందని అన్నాడు.