"పవన్ కళ్యాణ్ నా దేవుడు" - థియేటర్ల బంద్‌పై సత్యనారాయణ క్లారిటీ
ఆంధ్రప్రదేశ్‌లో సినిమా థియేటర్ల మూసివేత చుట్టూ చర్చలు కొనసాగుతున్న నేపథ్యంలో, ప్రముఖ ఎగ్జిబిటర్ మరియు జనసేన పార్టీకి చెందిన మాజీ నాయకుడు సత్యనారాయణ మళ్లీ వార్తల్లోకి వచ్చారు.
By: Tupaki Desk | 28 May 2025 10:06 AM
ఆంధ్రప్రదేశ్‌లో సినిమా థియేటర్ల మూసివేత చుట్టూ చర్చలు కొనసాగుతున్న నేపథ్యంలో, ప్రముఖ ఎగ్జిబిటర్ మరియు జనసేన పార్టీకి చెందిన మాజీ నాయకుడు సత్యనారాయణ మళ్లీ వార్తల్లోకి వచ్చారు. థియేటర్ల మూసివేత వెనుక అతను హస్తం ఉందని ఆరోపణలు రావడంతో జనసేన అధికారికంగా పార్టీ నుంచి సస్పెండ్ చేసింది.
ఇక ప్రముఖ నిర్మాత దిల్ రాజు చేసిన ఆరోపణలకు ఆయన ఘాటుగా స్పందించారు. సత్యనారాయణ చేసిన వ్యాఖ్యలు సినీ పరిశ్రమతోపాటు రాజకీయ వర్గాల్లోనూ చర్చనీయాంశంగా మారాయి. “పవన్ కళ్యాణ్ నా దేవుడు. ఆయన సినిమాను నేనెందుకు ఆపుతా?” అని సత్యనారాయణ ప్రశ్నించారు. ‘వీరమల్లు’ సినిమా రిలీజ్ డేట్ మే 16 అని ప్రకటించబడ్డ కంటే ముందే, థియేటర్లు ఏప్రిల్ 24న బంద్ చేయాలన్న నిర్ణయం తీసుకున్నామని ఆయన స్పష్టం చేశారు.
ఈ విషయంలో తాను ఎటువంటి కుట్రకు పాల్పడలేదని, పవన్ కళ్యాణ్ పట్ల తనకు ఉన్న గౌరవాన్ని గుర్తు చేస్తూ, దిల్ రాజు చేసిన ఆరోపణలను ఖండించారు. “నాపై చేయబడ్డ ఆరోపణలను దిల్ రాజు నిరూపించాలి. తాను కావాలనే ఈ తప్పుడు ప్రచారానికి తెరలేపారు. ఇది పూర్తిగా అసత్యమని, పవన్ కళ్యాణ్‌పై నాకు అపారమైన అభిమానం ఉంది. ఆయన రాజకీయ ప్రయాణంలో నేను కూడా భాగమయ్యాను. అలాంటి వ్యక్తి సినిమాను తానేందుకు అడ్డుకుంటాను,” అని ఆయన తీవ్రంగా వ్యాఖ్యానించారు.
రాజకీయంగా గాని, వ్యక్తిగతంగా గాని పవన్‌తో తన అనుబంధం ఎప్పటికీ మారదని చెప్పారు. ఈ వివాదం సినీ పరిశ్రమలోని రెండు విభిన్న వర్గాల మధ్య నెమ్మదిగా పగదీతకు దారి తీస్తుందనే ఆందోళనను కలిగిస్తోంది. ఒకవైపు నిర్మాతలు, మరొకవైపు థియేటర్ ఎగ్జిబిటర్లు మధ్య నెలకొన్న వివాదంలో పవన్ కళ్యాణ్ చిత్రం నడుమ చిచ్చు పెరిగినట్లు కనిపిస్తోంది. ఈ క్రమంలో జనసేన కార్యకర్తలు కూడా సత్యనారాయణకు మద్దతుగా నిలుస్తున్నారు.
ఇక సినిమా విడుదలలపై జరిగిన మార్పులు, కొన్ని నగరాల్లో షోలు రద్దు కావడాన్ని వారు రాజకీయ కుట్రలుగానే చూస్తున్నారు. పవన్ కళ్యాణ్ సినిమాలు విడుదలకాగా హైప్ ఉన్న తరుణంలో ఇలాంటి ఆరోపణలు కావాలని చేస్తున్నారనే వాదనతో అభిమానులు నిలుస్తున్నారు.
ఇదిలా ఉండగా, థియేటర్ల మూసివేత గురించి పరిశ్రమ మొత్తానికి స్పష్టత అవసరం ఉంది. నిర్మాతలు, డిస్ట్రిబ్యూటర్లు, ఎగ్జిబిటర్లు అన్నీ ఒకే వేదికపై కలసి మాట్లాడే అవసరం ఏర్పడింది. సత్యనారాయణ వ్యాఖ్యలతో దిల్ రాజు ఎలా స్పందిస్తారో, తదుపరి చర్యలు ఎలా ఉంటాయి అనే దానిపై పరిశ్రమలో ఉత్కంఠ నెలకొంది.