అనిల్ రావిపూడి అజ్ఞాతవాసం: కొత్త మిషన్ వెనుక అసలు కథ
ఇది కేవలం వేరే ప్రాంతానికి వెళ్లడానికి ఒక ట్రాన్సిట్ పాయింట్ మాత్రమేనా లేక బాలీవుడ్ ప్రముఖులతో ఏవైనా చర్చలు జరపడానికి వెళ్తున్నారా అనేది ఆసక్తికరంగా మారింది.
By: Sivaji Kontham | 7 April 2026 3:02 PM IST
టాలీవుడ్లో వరుస విజయాలతో దూసుకుపోతున్న దర్శకుడు అనిల్ రావిపూడి ప్రస్తుతం ఒక సుదీర్ఘ విరామంతో కూడిన కొత్త మిషన్కు శ్రీకారం చుట్టారు. ఇటీవల జరిగిన `రాక్షస` సక్సెస్ మీట్లో ఆయన చేసిన వ్యాఖ్యలు ఇప్పుడు ఫిలిం నగర్ వర్గాల్లో ఆసక్తికర చర్చకు దారితీశాయి. గత కొద్దిరోజులుగా హైదరాబాద్ నగరంలో గడిపిన అనిల్.. ఇకపై కొన్ని నెలల పాటు తాను ఎక్కడా కనిపించనని స్పష్టం చేశారు. తన తదుపరి సినిమా కథా చర్చల్లో పూర్తిగా మునిగిపోవడమే ఈ అజ్ఞాతవాసానికి ప్రధాన కారణమని ఆయన పేర్కొన్నారు.
ఈ ఈవెంట్ ముగిసిన వెంటనే అనిల్ రావిపూడి ముంబైకి ప్రయాణమవ్వడం ఇప్పుడు హాట్ టాపిక్గా మారింది. సాధారణంగా దర్శకులు తమ కథా రచనల కోసం ప్రశాంతమైన లొకేషన్లను వెతుకుతుంటారు. అయితే ప్రస్తుత అంతర్జాతీయ పరిస్థితులు, ముఖ్యంగా ఇరాన్, ఇజ్రాయెల్-అమెరికా మధ్య నెలకొన్న యుద్ధ వాతావరణం కారణంగా విదేశీ ప్రయాణాలు రిస్క్తో కూడుకున్నవిగా మారాయి. గగనతలాలు మూసివేయడం, విమాన సర్వీసులు రద్దు కావడం వంటి పరిణామాల నేపథ్యంలో అనిల్ తన స్క్రిప్ట్ వర్క్ కోసం భారత్లోని సురక్షితమైన, ప్రశాంతమైన ప్రాంతాన్నే ఎంచుకున్నట్లు సమాచారం.
అనిల్ రావిపూడి ముంబై ప్రయాణం వెనుక పలు సందేహాలు వ్యక్తమవుతున్నాయి. ఇది కేవలం వేరే ప్రాంతానికి వెళ్లడానికి ఒక ట్రాన్సిట్ పాయింట్ మాత్రమేనా లేక బాలీవుడ్ ప్రముఖులతో ఏవైనా చర్చలు జరపడానికి వెళ్తున్నారా అనేది ఆసక్తికరంగా మారింది. సాధారణంగా టాలీవుడ్ దర్శకులు విదేశాలు కుదరకపోతే లవాసా, అరకు, ఊటీ లేదా కొడైకెనాల్ వంటి హిల్ స్టేషన్లకు వెళ్లి కథలు రాస్తుంటారు. అనిల్ కూడా తన `టార్గెట్ X స్క్రిప్ట్` కోసం ఇటువంటి ఏదైనా ఎగ్జోటిక్ లొకేషన్కు వెళ్లి.. బాహ్య ప్రపంచానికి దూరంగా కథను సిద్ధం చేసే అవకాశం ఉంది.
ఎఫ్ 2 వంటి బ్లాక్బస్టర్ ఫ్రాంచైజీలతో నవ్వులు పూయించడమే కాకుండా మెగాస్టార్ చిరంజీవి, నందమూరి బాలకృష్ణ వంటి దిగ్గజ హీరోలతో బాక్సాఫీస్ రికార్డులను తిరగరాసిన ఘనత అనిల్ సొంతం. కేవలం కమర్షియల్ సక్సెస్ మాత్రమే కాకుండా.. తన సినిమాకు జాతీయ అవార్డును కూడా అందుకుని తన సత్తా చాటారు. ఇప్పుడు ఆయన సిద్ధం చేస్తున్న కథ ఎలాంటి బ్యాక్డ్రాప్తో ఉండబోతుందనే దానిపై పరిశ్రమలో రకరకాల ఊహాగానాలు వినిపిస్తున్నాయి. రావిపూడి మళ్ళీ తన మార్కు హిలేరియస్ ఎంటర్టైనర్తో వస్తారా లేక గత చిత్రం తరహాలోనే యాక్షన్-ఎమోషనల్ డ్రామాను ఎంచుకుంటారా అనేది వేచి చూడాలి.
ఏది ఏమైనా అనిల్ రావిపూడి తీసుకున్న ఈ విరామం ఒక భారీ ప్రాజెక్టుకు సంకేతంగా కనిపిస్తోంది. బహుశా ఈసారి ఒక పాన్ ఇండియా సబ్జెక్ట్తో ముంబై వేదికగా ఏదైనా పెద్ద ప్లాన్ చేస్తున్నారేమో అన్న అనుమానాలు కూడా ఉన్నాయి. కొన్ని నెలల పాటు ఆయన కెమెరా కంటికి దూరంగా ఉన్నా... కలం మాత్రం బాక్సాఫీస్ను షేక్ చేసే పదునైన కథను సిద్ధం చేస్తోంది. కొన్ని నెలల అజ్ఞాతవాసం ముగిసిన తర్వాత అనిల్ రావిపూడి తన తదుపరి చిత్రంతో ఎలాంటి సంచలనాలు సృష్టిస్తారో చూడాలి.