వీర‌మ‌ల్లు నిర్మాత‌కు ప‌వ‌న్ మ‌రో గిప్ట్ కూడా ఇస్తున్నారా?

'హ‌రిహ‌ర‌వీర‌మ‌ల్లు' చిత్రంతో నిర్మాత ఏ.ఎం ర‌త్నం పేరు మ‌ళ్లీ వైర‌ల్ అవుతోన్న సంగ‌తి తెలిసిందే. ఒక‌ప్పుడు ఎన్నో హిట్ చిత్రాలందించిన నిర్మాత కాల క్ర‌మంలో స‌క్సెస్ ల్లో వెనుక‌బ‌డ‌టంతో పాటు నిర్మాణం కూడా త‌గ్గించుకుంటూ వ‌చ్చారు. ఈ మ‌ద్య‌నే మ‌ళ్లీ స్పీడ‌ప్ అవుతున్నారు. ఈ నేప‌థ్యంలో ప‌వ‌న్ క‌ళ్యా ణ్ తో వీర‌మ‌ల్లు ప్రాజెక్ట్ సెట్ అయింది. ఈసినిమాతో నిర్మాత‌గా బౌన్స్ బ్యాక్ అవ్వాల‌ని ర‌త్నం ఎంతో క‌సిమీద ఉన్నారు. ప్రాజెక్ట్ మొద‌లు పెట్టి ఐదేళ్లు అవుతున్నా? ఎక్క‌డా నిరుత్సాహ ప‌డ‌కుండా ముందుకు సాగుతున్నారు.

సాధార‌ణంగా ఏ నిర్మాత‌కైనా ఇంత గ్యాప్ వ‌స్తే మ‌రో హీరోతో సినిమా చేసుకోవాల‌ని చూస్తారు. కానీ ర‌త్నం ఆ ఛాన్స్ తీసుకోకుండా ప‌వ‌న్ క‌ళ్యాణ్ మీద న‌మ్మకంతో ఎదురు చూసి చివ‌ర‌కు ఐదున్నేళ్లకు వీర‌మ‌ల్లును పూర్తి చేసి రిలీజ్ చేస్తున్నారు. ఈ కార‌ణంగా ర‌త్నం సినిమా కోసం అద‌నంగా చాలా ఖ‌ర్చు కూడా చేయాల్సి వ‌చ్చింది. వ‌డ్డీ బారాలు కూడా మోసారు. ఈ క్ర‌మంలోనే వీర‌మ‌ల్లుకు పారితోషికం విష‌యంలో ప‌వ‌న్ మిన‌హాయింపు కూడా ఇచ్చారు. ర‌త్నం-ప‌వ‌న్ మ‌ధ్య మంచి మైత్రీ కూడా ఉంది.

ఆ ర‌కంగా ర‌త్నం కు కొంత వ్య‌క్తిగ‌తంగా క‌లిసొచ్చింది. ఇప్పుడా ప‌రిచ‌య‌మే ఏ.ఎం ర‌త్నంకు ప‌ద‌వి కూడా క‌ట్ట‌బెట్ట‌బోతుంది? అన్న ఓ వార్త వెలుగులోకి వ‌చ్చింది. ఆంధ్ర‌ప్ర‌దేశ్ ఎఫ్ డీసీ చైర్మ‌న్ గా ర‌త్నంని నియమించాల‌ని ప‌వ‌న్ భావిస్తున్నారట‌. ఓ ఇంట‌ర్వ్యూలో ఈ విష‌యాన్ని ర‌త్నం ముందుకు తీసుకెళ్తే ఆయ‌న కూడా సానుకూలంగా స్పందించారు. ప‌వ‌న్ ఆ రకంగా ఆలోచిస్తున్నార‌ని... అధికారికంగా ప్ర‌క‌ట‌న వ‌చ్చే వ‌ర‌కూ వెయిట్ చేద్దామ‌ని సూచించారు. దీంతో ఇప్పుడీ అంశం నెట్టింట చ‌ర్చ‌గా మారింది.

జ‌న‌సేన పార్టీకి సంబంధించిన వ్య‌వహారాల్లో ర‌త్నం భాగ‌స్వామి అయ్యారు. ఎప్ప‌టిక‌ప్పుడు త‌న మ‌ద్ద‌తు ప్ర‌క‌టించేవారు. ఆ ర‌కంగా పార్టీకి త‌న రూపేణా కొంత భ‌రోసా క‌ల్పించారు. ఈ నేప‌థ్యంలోనే ప‌వ‌న్ కూడా ప‌ద‌వి విష‌యంలో ర‌త్నం వైపు మొగ్గుచూపుతున్న‌ట్లు తెలుస్తోంది. మ‌రి ఇదే ప‌ద‌వి విష‌యంలో ముఖ్యమంత్రి నారా చంద్ర‌బాబు నాయుడు మ‌దిలో ఇంకెవ‌రైనా ఉన్నారా? ప‌వ‌న్ సూచించిన వ్య‌క్తికే కేటాయిస్తారా? అన్న‌ది తెలియాలి.