అఖిల్ పెళ్లి తరువాత.. అక్కినేని వారి మరో గ్రాండ్ ప్లాన్

అక్కినేని కుటుంబంలో మరోసారి వివాహ వేడుకలు సందడి చేయనున్నాయి. యువ హీరో అఖిల్ అక్కినేని తన ఫియాన్సీ జైనబ్ రవ్జీతో జూన్ 6న వివాహ బంధంలోకి అడుగుపెట్టనున్నాడు. ఈ వివాహం హైదరాబాద్‌లోని అన్నపూర్ణ స్టూడియోస్‌లో జరగనుంది, ఇది అక్కినేని కుటుంబానికి ప్రత్యేకమైన వేదిక. గతంలో నాగచైతన్య-శోభిత ధూళిపాళ వివాహం కూడా ఇక్కడే జరిగింది. జైనబ్ ప్రముఖ పారిశ్రామికవేత్త జుల్ఫీ రవ్జీ కుమార్తె, ఆమె ఒన్స్ అపాన్ ది స్కిన్ అనే స్కిన్‌కేర్ బ్రాండ్‌తో ఎంట్రప్రెన్యూర్‌గా గుర్తింపు తెచ్చుకుంది.

ఈ వివాహం కోసం అక్కినేని కుటుంబం ఇప్పటికే ఏర్పాట్లలో బిజీగా ఉంది. నాగార్జున, అమల దంపతులు జూన్ 1న తెలంగాణ సీఎం రేవంత్ రెడ్డిని కలిసి వివాహానికి ఆహ్వానించారు. ఈ కార్యక్రమంలో జైనబ్ తల్లిదండ్రులు కూడా పాల్గొన్నారు, ఈ ఫోటో సోషల్ మీడియాలో వైరల్ అయింది. వివాహం ఒక ప్రైవేట్ సెరిమోనీగా జరగనుంది, కుటుంబ సభ్యులు, సన్నిహితుల మధ్య ఈ శుభకార్యం జరుపుకోవాలని నాగార్జున దంపతులు నిర్ణయించారు.

అయితే, ఈ వివాహం తర్వాత భారీ రిసెప్షన్‌తో సందడి చేయడానికి సిద్ధమవుతున్నారు. లేటెస్ట్ సమాచారం ప్రకారం, అఖిల్ వివాహ రిసెప్షన్ జూన్ 8న హైదరాబాద్‌లో గ్రాండ్‌గా జరగనుంది. ఈ రిసెప్షన్‌లో టాలీవుడ్ ఇండస్ట్రీ నుంచి పలువురు సినీ ప్రముఖులు, నటీనటులు, దర్శక నిర్మాతలు హాజరవుతారని తెలుస్తోంది. అక్కినేని కుటుంబం ఇప్పటికే ఇండస్ట్రీ జనాలకు ఆహ్వానాలు పంపడం ప్రారంభించింది.

ఈ రిసెప్షన్‌లో చిరంజీవి, అల్లు అర్జున్, రామ్ చరణ్, మహేష్ బాబు, ప్రభాస్ వంటి స్టార్ హీరోలు హాజరయ్యే అవకాశం ఉందని సమాచారం. రిసెప్షన్ కోసం అన్నపూర్ణ స్టూడియోస్‌ను భారీగా అలంకరించే ఏర్పాట్లు జరుగుతున్నాయి. ఈ కార్యక్రమంలో సాంప్రదాయ తెలుగు ఆహార విందుతో పాటు, లైవ్ మ్యూజిక్, డాన్స్ పెర్ఫార్మెన్స్‌లు కూడా ఉండనున్నాయని టాక్.

అఖిల్-జైనబ్ జంట కోసం స్పెషల్ ఫోటో షూట్, గ్రాండ్ ఎంట్రీని కూడా ప్లాన్ చేస్తున్నారు. ఈ రిసెప్షన్ టాలీవుడ్‌లో ఒక భారీ ఈవెంట్‌గా నిలవనుందని అంటున్నారు. అఖిల్ ప్రస్తుతం తన తదుపరి చిత్రం ‘లెనిన్’ షూటింగ్‌లో బిజీగా ఉన్నాడు. మురళీ కిషోర్ అబ్బూరి డైరెక్షన్‌లో రాయలసీమ నేపథ్యంలో రూపొందుతున్న ఈ సినిమాలో శ్రీలీల హీరోయిన్‌గా నటిస్తుంది. ఈ చిత్రం దసరా సీజన్‌లో విడుదల కానుంది.