'రేసుగుర్రం' విల‌న్ నా తండ్రి అంటూ యువ‌తి దావా

'రేసుగుర్రం' చిత్రంలో అద్భుత న‌ట‌న, ఆహార్యంతో మెప్పించిన విల‌న్ ర‌వికిష‌న్ ఒక తీవ్ర వివాదంలో చిక్కుకున్నారు. నటుడు, భారతీయ జనతా పార్టీ (బిజెపి) అభ్యర్థి అయిన‌ రవి కిషన్ తన జీవసంబంధమైన తండ్రి అని పేర్కొంటూ 25 ఏళ్ల యువతి ముంబై కోర్టులో సివిల్ దావా వేయడం మీడియా హెడ్ లైన్స్ లోకొచ్చింది. షినోవా అనే యువ‌తి కిషన్ తన తల్లి అపర్ణ సోనితో సంబంధం కలిగి ఉన్నాడ‌ని ఆరోపించింది. త‌న వాదనను నిరూపించడానికి DNA పరీక్షను కోరింది.

జాతీయ మీడియా నివేదిక ప్రకారం, దావాలో త‌న‌ను ర‌వికిష‌న్ కుమార్తెగా గుర్తించాలని, కూతురు కాద‌ని దూరం పెట్ట‌కుండా ఆపాల‌ని షినోవా కోర్టును కోరింది. కిషన్‌ను తన తండ్రి అంటూ బహిరంగంగా ప్రకటించిన తర్వాత ఉత్తరప్రదేశ్‌లో సోని స‌హా ఇతరులపై నమోదైన ఎఫ్‌ఐఆర్‌ను రద్దు చేయాలని ఆమె బాంబే హైకోర్టులో రిట్ పిటిషన్‌ను కూడా దాఖలు చేసింది. లక్నోలో నమోదైన ఈ కేసులో కిషన్ భార్య ప్రీతి శుక్లా షినోవాపై తీవ్ర ఆరోప‌ణ‌లు చేసారు. నేరపూరిత కుట్ర, తప్పుడు సాక్ష్యాలు ఇవ్వడం, బలవంతపు వసూళ్లు, ఉద్దేశ్యపూర్వకంగా అవమానించడం వంటి ఆరోపణలు ఈ ఫిర్యాదులో ఉన్నాయి. అయితే ముంబైలో అన్ని పార్టీలు(ఇరు వ‌ర్గాలు) నివసిస్తున్నారు.. సంఘటనలు అక్క‌డే జరిగినా కానీ లక్నోలో ఎఫ్‌ఐఆర్ దాఖలు చేశారని షినోవా పిటిషన్ వాదించింది.

షినోవా సివిల్ దావా ప్రకారం... ఆమె తల్లి సోని జర్నలిస్ట్‌గా పనిచేస్తున్నప్పుడు కిషన్‌ను కలిశారని వారి మ‌ధ్య రిలేష‌న్ షిప్ ప్రారంభ‌మైంద‌ని తెలిపారు. చివరికి 1991లో వివాహం చేసుకున్నారు. అయితే వ్యక్తిగత సమస్యల కారణంగా వారు ఎక్కువ కాలం కలిసి జీవించలేకపోయారు. షినోవా 1998లో జన్మించింది. అయితే కిషన్‌కు అప్పటికే వివాహమైందని ఆ తర్వాత తెలిసింది. సోని - కిషన్ వారి సంక్లిష్ట రిలేష‌న్ కారణంగా తమ బిడ్డ 'అంకుల్' అని పిలవాలని నిర్ణయించుకున్నారని దావాలో పేర్కొన్నారు.

ఇంత జరిగినా కిషన్, సోనీలు తన విష‌యంలో జాగ్రత్తలు తీసుకున్నారని షినోవా తెలిపింది. అయితే ఆమె, ఆమె తల్లి రానున్న లోక్‌సభ ఎన్నికల సంద‌ర్భంగా శుభాకాంక్షలు తెలియజేసేందుకు కిషన్‌ను సందర్శించినప్పుడు, అతడు వారిని కలవడానికి నిరాకరించాడు. అనుచితంగా ప్రవర్తించాడు. తదనంతరం వారు కిషన్ జీవసంబంధమైన కుమార్తెగా షినోవా హక్కులను నొక్కిచెప్పడానికి విలేకరుల సమావేశం నిర్వహించారు.

అయితే ఈ ఎపిసోడ్ లో కిషన్ భార్య ప్రీతి శుక్లా ఈ వాదనలను వివాదాస్పదం చేసారు. తన భర్త పరువు తీయడానికి, ఎన్నికలను ప్రభావితం చేయడానికి కుట్ర పన్నారని ఆరోపిస్తూ పీఎస్‌లో ఫిర్యాదు చేసారు. లక్నోలో దాఖలు చేసిన ఫిర్యాదు, సోనీ సహా ఇతరులు కిషన్ నుండి 20 కోట్లు వసూలు చేయాల‌ని కుట్ర చేసి అతడి ప్రతిష్టను దిగజార్చార‌ని ప్రీతి శుక్లా ఆరోపించారు. అయితే త‌మ‌కు ఇలాంటి నేర కార్యకలాపాలలో ఎలాంటి ప్రమేయం లేదని సోనీ ఖండించింది. తమ కుమార్తె చదువు, భవిష్యత్తు కోసం ఆర్థిక సహాయం కోరుతూ కిషన్‌కు లీగల్ నోటీసు పంపినట్లు పేర్కొంది. తన కుమార్తె హక్కుల కోసం మాత్రమే గుర్తింపును కోరుతున్నట్లు సోనీ పేర్కొంది.