ఏకంగా ఎంపీకే 56 లక్షలు పంగనామాలు పెట్టారు.. ఏం జాదుగాళ్లురా బాబు

సైబర్ నేరగాళ్ల దారుణాలు రోజురోజుకూ పెరుగుతున్నాయి. సామాన్యులే కాదు.. ఇప్పుడు ప్రజాప్రతినిధులు, ప్రముఖులు కూడా వీరి బారిన పడుతున్నారు. తాజాగా తృణమూల్ కాంగ్రెస్ పార్టీ (TMC)కి చెందిన పార్లమెంట్ సభ్యుడు కల్యాణ్ బెనర్జీ కి సైబర్ మోసగాళ్లు పెద్ద టోకరా వేశారు. నకిలీ కేవైసీ (KYC) ప్రక్రియ పేరుతో ఆయన స్టేట్ బ్యాంక్ ఆఫ్ ఇండియా (SBI) బ్యాంకు ఖాతా నుంచి ఏకంగా రూ.56 లక్షలు దోచుకున్నారు!

సైబర్ నేరగాళ్లు మొదట ఎంపీ కల్యాణ్ బెనర్జీకి చెందిన పాత ఖాతా వివరాలను సేకరించారు. ఆ తర్వాత నకిలీ పాన్, ఆధార్ కార్డులను ఉపయోగించి 'కేవైసీ అప్‌డేట్' పేరుతో మోసం చేశారు. రిజిస్టర్డ్ మొబైల్ నంబర్‌ను మార్చి, ఆ ఖాతాకు చెందిన ఇంటర్నెట్ బ్యాంకింగ్ సదుపాయాన్ని పూర్తిగా తమ ఆధీనంలోకి తీసుకున్నారు. అనేక లావాదేవీలు జరిపి మొత్తం రూ.56 లక్షలను వేర్వేరు ఖాతాలకు బదిలీ చేశారు.

దొంగిలించిన డబ్బుతో ఏం చేశారు?

దోచుకున్న మొత్తాన్ని ఎక్కువగా బంగారం కొనుగోలు చేయడానికి ఉపయోగించినట్లు పోలీసులు ప్రాథమికంగా గుర్తించారు. కొంత మొత్తాన్ని ఏటీఎంల ద్వారా నగదుగా విత్‌డ్రా చేసిన ఆధారాలూ దొరికాయి.

బెనర్జీ అప్రమత్తతతో వెలుగులోకి

కల్యాణ్ బెనర్జీ ఈ ఖాతాను 2001-2006 మధ్య ఎమ్మెల్యేగా ఉన్నప్పుడు ఓపెన్ చేశారు, అయితే ఇది గత కొంతకాలంగా నిద్రాణంగా (నాన్-యాక్టివ్‌గా) ఉంది. అయితే, ఇటీవల ఆ ఖాతాలో అనుమానాస్పద చలనం కనిపించడంతో ఎంపీ స్వయంగా బ్యాంకు అధికారులను సంప్రదించారు. దాంతో ఈ భారీ సైబర్ మోసం వెలుగులోకి వచ్చింది.

పోలీసుల దర్యాప్తు

ఎస్బీఐ అధికారులు వెంటనే కోల్‌కతా సైబర్ క్రైమ్ పోలీసులకు ఫిర్యాదు చేశారు. కేసు నమోదు చేసిన పోలీసులు, ఇది నకిలీ కేవైసీ ఆధారంగా జరిగిన మోసంగా నిర్ధారించారు. నేరగాళ్లు వాడిన నకిలీ పాన్, ఆధార్ పత్రాల మూలాలను కనుగొనేందుకు ప్రత్యేక బృందాలను ఏర్పాటు చేశారు. లావాదేవీలు జరిగిన ఖాతాల ఆధారంగా డబ్బును ట్రేస్ చేస్తున్నారు.

పోలీసుల హెచ్చరిక

ప్రజాప్రతినిధులకే ఈ పరిస్థితి ఎదురైన నేపథ్యంలో, సాధారణ ప్రజల భద్రతపై ఆందోళన పెరుగుతోంది. సైబర్ నేరగాళ్లు అధికారిక బ్యాంక్ ప్రక్రియల రూపంలో మోసం చేస్తున్నందున, పోలీసులు మరోసారి ప్రజలకు ఈ కింది హెచ్చరికలు జారీ చేశారు. బ్యాంకుల నుంచి కాల్ లేదా మెసేజ్ వస్తే, అది అధికారిక నంబర్ నుంచే వచ్చిందో లేదో నిర్ధారించుకోండి. ఎప్పటికీ పాన్, ఆధార్, ఓటీపీ వంటి రహస్య వివరాలను ఎవరికీ ఇవ్వకూడదు. అనుమానాస్పద కార్యకలాపాలపై వెంటనే సైబర్ హెల్ప్‌లైన్ 1930కు కాల్ చేయాలి.

ఒక ఎంపీ ఖాతా నుంచే రూ.56 లక్షలు కాజేయగలిగితే... ఆన్‌లైన్ భద్రత ఎంత ప్రమాదంలో ఉందో ఈ ఘటన స్పష్టం చేస్తోంది.