ప్రపంచానికి తెగ నచ్చేసిన భారతీయ కార్లు.. విదేశాలకు రికార్డు స్థాయి ఎగుమతులు

భారతదేశ ఆటోమొబైల్ రంగం అంతర్జాతీయ మార్కెట్‌లో తనదైన ముద్ర వేస్తోంది. దేశీయంగా కార్ల అమ్మకాలు కొంత వరకు స్తబ్దుగా ఉన్నప్పటికీ, భారతీయ తయారీ కార్ల ఎగుమతులు అద్భుతమైన వృద్ధిని సాధిస్తున్నాయి. 'మేక్ ఇన్ ఇండియా' కార్లకు ప్రపంచవ్యాప్తంగా ఆదరణ పెరుగుతోందని తాజా గణాంకాలు స్పష్టం చేస్తున్నాయి.

2025 ఆర్థిక సంవత్సరంలో 7.7 లక్షల యూనిట్లను దాటిన ఎగుమతులు

గత నాలుగు ఆర్థిక సంవత్సరాల కార్ల ఎగుమతుల గణాంకాలు భారత ఆటోమొబైల్ రంగం ఎంత వృద్ధిని సాధించిందో తెలియజేస్తున్నాయి.

2022 (ఆర్థిక సంవత్సరం 2021-22): 5,77,875 యూనిట్లు

2023 (ఆర్థిక సంవత్సరం 2022-23): 6,62,891 యూనిట్లు (మునుపటి సంవత్సరం కంటే 14.7శాతం వృద్ధి)

2024 (ఆర్థిక సంవత్సరం 2023-24): 6,72,105 యూనిట్లు (మునుపటి సంవత్సరం కంటే 1.4శాతం వృద్ధి)

2025 (ఆర్థిక సంవత్సరం 2024-25): 7,70,364 యూనిట్లు (మునుపటి సంవత్సరం కంటే 14.6శాతం వృద్ధి)

2025లో భారత కార్ల ఎగుమతులు దాదాపు 7.7 లక్షల యూనిట్లను దాటి, గణనీయమైన వృద్ధిని నమోదు చేశాయి. సాధారణంగా, దేశీయ అమ్మకాలు పెరిగితే ఎగుమతులు కూడా పెరుగుతాయి. కానీ, ఈ సందర్భంలో దేశీయంగా కార్ల అమ్మకాలు పెద్దగా పుంజుకోకపోయినా, ఎగుమతులు మాత్రం గణనీయంగా పెరిగాయి. దీనికి కొన్ని కారణాలు ఉన్నాయి.

అంతర్జాతీయ మార్కెట్లలో డిమాండ్: కొన్ని అభివృద్ధి చెందుతున్న దేశాలు ఆఫ్రికా, లాటిన్ అమెరికా వంటి మార్కెట్లలో భారతీయ కార్లకు డిమాండ్ పెరుగుతోంది. తక్కువ ధర, మంచి క్వాలిటీ, మంచి పనితీరు ఈ వృద్ధికి దోహదపడుతున్నాయి.

భారతీయ తయారీదారుల వ్యూహాలు: మారుతి సుజుకి, హ్యుందాయ్, కియా వంటి ప్రధాన తయారీదారులు ఎగుమతులపై ప్రత్యేక దృష్టి సారించారు. భారతదేశాన్ని ఒక గ్లోబల్ మ్యానుఫ్యాక్చరింగ్ హబ్‌గా మార్చడానికి ప్రయత్నిస్తున్నారు.

గ్లోబల్ సప్లై చైన్ రీషఫిల్: ప్రపంచవ్యాప్తంగా సప్లై చైన్‌లలో వస్తున్న మార్పులు కూడా భారత్ వంటి దేశాలకు ఎగుమతి అవకాశాలను పెంచాయి.

పోటీ ధరలు: అంతర్జాతీయ మార్కెట్లో చైనీస్,ఇతర తయారీదారులతో పోటీ పడటానికి భారతీయ కార్లు పోటీ ధరలలో లభిస్తున్నాయి.