ముంబై ఇండియన్స్ తోనే స్టార్ ప్లేయర్.. మళ్లీ బయోలోమార్పు

భారత టీ20 స్టార్ బ్యాటర్, '360 డిగ్రీల' ఆటగాడిగా గుర్తింపు పొందిన సూర్యకుమార్ యాదవ్ సోషల్ మీడియాలో మరోసారి హాట్ టాపిక్‌గా మారారు. గత కొన్ని రోజులుగా ఆయన ఐపీఎల్ భవిష్యత్తుపై జరుగుతున్న ప్రచారాలకు తాజాగా ఒక ఆసక్తికర పరిణామం తెరదించినట్లయింది. సూర్యకుమార్ యాదవ్ తన అధికారిక ఇన్‌స్టాగ్రామ్ ప్రొఫైల్‌లో చేసిన మార్పు ఇప్పుడు క్రికెట్ వర్గాల్లో తీవ్ర చర్చనీయాంశంగా మారింది.

ఇన్‌స్టా బయోలో మళ్లీ 'ముంబై ఇండియన్స్'

ఇటీవల సూర్యకుమార్ యాదవ్ తన ఇన్‌స్టాగ్రామ్ బయో నుంచి "ముంబై ఇండియన్స్" అనే పేరును తొలగించడమే కాకుండా ముంబై ఇండియన్స్ అధికారిక పేజీని, కెప్టెన్ హార్దిక్ పాండ్యాను అన్‌ఫాలో చేయడం పెద్ద సంచలనంగా మారింది. దీంతో ఆయన ముంబై ఫ్రాంచైజీని వీడటం ఖాయమని.. మెగా ట్రేడింగ్ విండో ద్వారా మరో జట్టులోకి వెళ్తున్నారనే ఊహాగానాలు జోరందుకున్నాయి. అయితే తాజా పరిణామాల ప్రకారం సూర్య తన ఇన్‌స్టాగ్రామ్ బయోలో మరోసారి "ముంబై ఇండియన్స్" పేరును చేర్చారు. ఈ మార్పును గమనించిన ముంబై అభిమానులు పండగ చేసుకుంటున్నారు. తమ అభిమాన ఆటగాడు జట్టులోనే కొనసాగుతాడనే నమ్మకాన్ని వ్యక్తం చేస్తున్నారు. దీనివల్ల సోషల్ మీడియా వేదికగా #SKY, #MumbaiIndians హ్యాష్‌ట్యాగ్‌లు మళ్లీ ట్రెండింగ్‌లోకి వచ్చాయి.

గత సీజన్ నిరాశ.. పునరాగమనంపై గురి

2026 ఐపీఎల్ సీజన్ సూర్యకుమార్ యాదవ్‌కు ఆశించిన స్థాయిలో సాగలేదు. తన విధ్వంసకర బ్యాటింగ్‌తో ప్రత్యర్థి బౌలర్లను భయపెట్టే సూర్య, ఈ సీజన్‌లో ఫామ్ కోల్పోయి తడబడ్డారు. ఆడిన మ్యాచ్‌లు 13 కాగా.. చేసిన పరుగులు 270.. ప్రదర్శన సగటు కంటే తక్కువ, నిలకడలేమిగా ఫాం ఉంది. గతంలో ముంబై విజయాల్లో కీలక పాత్ర పోషించిన సూర్యకుమార్.. ఈ నిరాశాజనక ప్రదర్శనతో విమర్శలను ఎదుర్కొన్నారు. అయినప్పటికీ వచ్చే సీజన్‌లో తిరిగి పాత ఫామ్‌ను అందుకొని ముంబైని విజేతగా నిలబెట్టాలని ఆయన పట్టుదలతో ఉన్నట్లు తెలుస్తోంది. ఇన్‌స్టా బయోలో మార్పు కూడా అందులో భాగమేనని విశ్లేషకులు భావిస్తున్నారు.

అధికారిక ప్రకటన వచ్చేనా?

ఐపీఎల్ ట్రేడింగ్ విండో నేపథ్యంలో ఇతర ఫ్రాంచైజీలు సూర్యకుమార్‌ను దక్కించుకోవడానికి భారీ ఆఫర్లతో ప్రయత్నాలు చేసినట్లు వార్తలు వచ్చాయి. బయోలో మళ్లీ ముంబై పేరు కనిపించడంతో ఆ రూమర్లకు బ్రేక్ పడినప్పటికీ దీనిపై సూర్యకుమార్ యాదవ్ కానీ లేదా ముంబై ఇండియన్స్ యాజమాన్యం కానీ ఎలాంటి అధికారిక ప్రకటన చేయలేదు. క్రికెట్ విశ్లేషకుల అభిప్రాయం.. సోషల్ మీడియా బయో మార్పులు కేవలం తాత్కాలిక ప్రొఫైల్ అప్‌డేట్స్ కావచ్చు. ఫ్రాంచైజీ లేదా ప్లేయర్ నుండి అధికారిక ప్రకటన వచ్చే వరకు ఎలాంటి ముగింపునకు రాకూడదు.

ఏది ఏమైనప్పటికీ సూర్యకుమార్ యాదవ్ మళ్లీ ముంబై ఇండియన్స్ నీడన చేరడం అభిమానుల్లో కొత్త ఉత్సాహాన్ని నింపింది. రాబోయే సీజన్‌లో సూర్యకుమార్ తన పాత రోరింగ్ ఫామ్‌తో ముంబై జర్సీలో మైదానంలోకి అడుగుపెట్టాలని ఫ్యాన్స్ ఆత్రుతగా ఎదురుచూస్తున్నారు.