ఐపీఎల్ ఫైనల్ కంటే హై-టెన్షన్.. గుజరాత్ టైటాన్స్ బస్సుకు ‘ఫైర్’ పవర్.. తృటిలో తప్పిన ప్రమాదం!

ఐపీఎల్ మైదానంలో ప్రత్యర్థి బౌలర్ల బౌలింగ్‌ను తుత్తునియలు చేస్తూ సిక్సర్ల వర్షం కురిపించడం ఒక ఎత్తైతే... మ్యాచ్ ముగిశాక తాము ప్రయాణిస్తున్న బస్సే ‘ఫైర్’ బ్రాండ్‌లా మారిపోవడం మరో ఎత్తు.. అవును.. గుజరాత్ టైటాన్స్ జట్టుకు తృటిలో ఒక పెద్ద ప్రమాదం తప్పింది. కప్ చేజారిన బాధలో ఉన్న ఆటగాళ్లకు.. అసలు కథ ముందే ఉందనే రేంజ్‌లో ఊహించని షాక్ తగిలింది. స్టేడియం నుంచి హోటల్‌కు బయలుదేరిన జట్టు బస్సులో ఒక్కసారిగా మంటలు.. పొగలు చెలరేగడంతో ఆటగాళ్లు, సిబ్బంది ప్రాణాలు అరచేతిలో పెట్టుకుని పరుగులు తీయాల్సి వచ్చింది.

మైదానంలో రన్స్.. రోడ్డు మీద స్ప్రింట్లు..

ఫైనల్ మ్యాచ్‌లో ఓడిపోయామనే తీవ్ర నిరాశతో ఆటగాళ్లంతా బస్సులో చాలా సైలెంట్‌గా కూర్చున్నారట. కొందరు మ్యాచ్ హైలైట్స్ గుర్తుచేసుకుంటూ బాధపడుతుంటే.. మరికొందరు ఫోన్లు చూసుకుంటూ ఉండిపోయారు. కానీ ఎప్పుడైతే బస్సు ఇంజన్ భాగం నుండి దట్టమైన పొగలు రావడం మొదలయ్యాయో... అప్పటివరకు సైలెంట్‌గా ఉన్న వాతావరణం కాస్తా ఒక్కసారిగా ‘వైలెంట్’గా మారిపోయింది.

ఆటగాళ్ల అసలు సిసలైన ఫిట్‌నెస్ అంతా అప్పుడే బయటపడింది.. సాధారణంగా క్రికెట్ గ్రౌండ్‌లో సింగిల్స్, డబుల్స్ కోసం పరిగెత్తే ప్లేయర్లు... ఈసారి మాత్రం ఏకంగా వంద మీటర్ల స్ప్రింట్ రన్‌ను తలపించేలా ప్రాణాల కోసం పరుగులు పెట్టారు. కొందరు ఆటగాళ్లు బస్సు సీట్లపై నుండి దూకుతుంటే... చూసేవాళ్లకు ఫీల్డింగ్ కోచ్ ఏమైనా కొత్త డ్రిల్స్ చేయిస్తున్నాడా అనే అనుమానం రాక మానదు. విదేశీ ప్లేయర్లు కొందరైతే "ఇది ఐపీఎల్‌లో ప్రవేశపెట్టిన కొత్త టాస్క్ ఏమైనా నా?" అన్నట్లు తెల్లమొహం వేసి చూశారట!

షార్ట్ సర్క్యూటా? లేక ఫైనల్ ఓటమి వేడా?

ప్రాథమిక సమాచారం ప్రకారం.. బస్సులో ఎయిర్ కండిషనింగ్ సిస్టమ్‌లో ఏర్పడిన షార్ట్ సర్క్యూట్ కారణంగానే ఈ ప్రమాదం జరిగినట్లు తెలుస్తోంది. అయితే, మన సోషల్ మీడియా మీమర్స్ ఊరుకుంటారు కదా.. వాళ్లకు దొరికిందే ఛాన్స్ అన్నట్లు మీమ్స్ వరద పారించారు. "గుజరాత్ టైటాన్స్ ఫైనల్ మ్యాచ్‌లో ఓడిపోయిన వేడి ఇంకా తగ్గలేదు... అందుకే ఆ హీట్‌ను తట్టుకోలేక బస్సు కూడా తగలబడిపోయింది" అంటూ నెట్టింట జోకులు పేలుస్తున్నారు. ట్రోఫీ కోసం రెండు నెలలు పడ్డ టెన్షన్ కంటే... ఈ ఒక్క గంట రోడ్డుపై నిలబడి చూసిన టెన్షనే చాలా ఎక్కువ సామీ అని ఆటగాళ్లు లోలోపల అనుకుని ఉంటారనడంలో ఎలాంటి సందేహం లేదు.

భద్రతా సిబ్బంది సమయస్ఫూర్తి.. అభిమానులకు ఊరట!

అదృష్టవశాత్తూ భద్రతా సిబ్బంది, డ్రైవర్ సకాలంలో స్పందించి.. మంటలు పెద్దవి కాకముందే ఆటగాళ్లందరినీ సురక్షితంగా బస్సు నుండి కిందకు దించేశారు. దాదాపు గంటన్నర పాటు రోడ్డు పక్కనే పడిగాపులు కాసిన టైటాన్స్ సేన.. ఆ తర్వాత మరో ప్రత్యామ్నాయ వాహనంలో హోటల్‌కు చేరుకుంది. ఎలాంటి ప్రాణనష్టం జరగకపోవడంతో యాజమాన్యంతో పాటు అభిమానులు కూడా ఊపిరి పీల్చుకున్నారు.

టీమ్‌లో ‘ఎలక్ట్రిషియన్’ కూడా మస్త్ ఇంపార్టెంట్!

ఈ ఘోర ప్రమాదం గుజరాత్ టైటాన్స్ ఫ్రాంచైజీకి ఒక కొత్త పాఠాన్ని నేర్పింది. టీమ్‌లో కేవలం భారీ షాట్లు కొట్టే స్టార్ బ్యాటర్లు, గంటకు 150 కిలోమీటర్ల వేగంతో బౌలింగ్ చేసే ఫాస్ట్ బౌలర్లు, వికెట్లు తీసే స్పిన్నర్లు ఉంటే సరిపోదు... బస్సు వైరింగ్‌ను సరిగ్గా చూసుకోవడానికి ఒక మంచి ఎలక్ట్రిషియన్ కూడా చాలా అవసరమని మేనేజ్‌మెంట్ భావిస్తోందేమో!

ఎందుకంటే మైదానంలో ప్రత్యర్థి జట్లు విసిరే సవాళ్లనైనా ఎదుర్కోవచ్చు కానీ... రోడ్డు మీద అకస్మాత్తుగా వచ్చే షార్ట్ సర్క్యూట్లను తట్టుకోవడం ఎవరి తరం కాదు కదా.. ఏది ఏమైనా ఐపీఎల్ కప్ చేతికి రాకపోయినా పర్వాలేదు... తమ ప్రియతమ ఆటగాళ్లు క్షేమంగా బయటపడటమే అభిమానులకు నిజమైన విజయం. ఈ దెబ్బతో గుజరాత్ టైటాన్స్ బస్సుకు సోషల్ మీడియాలో "ఫైర్ పవర్" అనే కొత్త నిక్‌నేమ్ వచ్చేసినా ఆశ్చర్యపోనక్కర్లేదు..