తలపొగరు దించేసింది.. ఆస్ట్రేలియా పతనం ఓ గుణపాఠం

ఒకప్పుడు ప్రపంచ క్రికెట్‌ను శాసించిన సామ్రాజ్యం అది. ప్రత్యర్థి ఎవరైనా సరే.. మైదానంలోకి దిగితే గెలుపు ఆస్ట్రేలియాదే అనేంత ధీమా. కానీ కాలం ఎప్పుడూ ఒకేలా ఉండదు. 2023 వన్డే వరల్డ్‌కప్ గెలిచిన తర్వాత ఆ జట్టు ప్రదర్శించిన అతివిశ్వాసం, ఇప్పుడు వారిని పరాజయాల ఊబిలోకి నెట్టేసినట్లు కనిపిస్తోంది. గెలుపు తెచ్చిన గర్వం.. ఓటమి రూపంలో పాఠాలు నేర్పుతోంది.

అహంకారం కూలదోసిన కథ

వరల్డ్‌కప్ గెలిచిన మత్తులో ఆస్ట్రేలియా ఆటగాడు మిచెల్ మార్ష్ ట్రోఫీపై కాలు పెట్టి కూర్చున్న ఫోటో అప్పట్లో క్రీడా ప్రపంచాన్ని విస్మయానికి గురిచేసింది. అది కేవలం ఒక ఫోటో కాదు.. ఆ జట్టులో పెరిగిన 'అతిశయోక్తి'కి అద్దం పట్టింది. ప్రత్యర్థులను గౌరవించని ఏ క్రీడైనా, ఆటగాడైనా పతనం వైపు పయనించక తప్పదని విశ్లేషకులు హెచ్చరించారు. ఇప్పుడు అదే జరుగుతోంది.

వరుస ఓటముల పరంపర.. గణాంకాలు చెబుతున్న సత్యం

వరల్డ్‌కప్ తర్వాత ఆస్ట్రేలియా ప్రయాణం 'అజేయ శక్తి' నుంచి 'అస్థిరమైన జట్టు'గా మారిపోయింది. టీ20 వరల్డ్‌కప్ 2024లో పసికూన అఫ్గానిస్తాన్ చేతిలో షాకింగ్ ఓటమి.. కనీసం సెమీస్‌కు కూడా చేరలేకపోయింది. ద్వైపాక్షిక సిరీస్‌లలో పాకిస్తాన్, ఇండియా, సౌతాఫ్రికా వంటి జట్ల చేతిలో వైట్ బాల్ క్రికెట్‌లో వరుస పరాజయాలు ఎదురయ్యాయి.. గబ్బాలో వెస్టిండీస్ చేతిలో ఓటమి, తాజాగా జింబాబ్వే వంటి జట్లతో కూడా తడబడటం ఆస్ట్రేలియా క్రికెట్ ప్రమాణాల పతనాన్ని సూచిస్తున్నాయి.

- ఫామ్ లోపమా? లేక మైండ్‌సెట్ సమస్యా?

ఆస్ట్రేలియా క్రికెటర్లలో మునుపటి కఠిన పోరాట పటిమ మృగ్యమైందనే విమర్శలు వినిపిస్తున్నాయి. ఒకప్పుడు ప్రత్యర్థికి కంటి మీద కునుకు లేకుండా చేసే ఆసీస్.. ఇప్పుడు అతి విశ్వాసం.. ప్రత్యర్థులను తక్కువ అంచనా వేసే ధోరణి వల్ల దెబ్బతింటోంది. ఆధునిక క్రికెట్‌లో అఫ్గానిస్తాన్, జింబాబ్వే వంటి జట్లు తమ స్థాయిని పెంచుకుంటున్న తరుణంలో ఆ మార్పును గుర్తించకుండా పాత గర్వంతోనే ఆడటం ఆసీస్‌ను దెబ్బతీసింది.

గెలుపు వినయాన్ని నేర్పాలి

క్రీడల్లో గెలుపు-ఓటములు సహజం. కానీ గెలిచినప్పుడు ఉండాల్సిన వినయం.. ప్రత్యర్థి పట్ల ఉండాల్సిన గౌరవం ఆస్ట్రేలియా జట్టులో తగ్గిందనేది జగమెరిగిన సత్యం. "గెలుపు మీది కావచ్చు.. కానీ క్రీడ పట్ల గౌరవం అందరి బాధ్యత" అనే సూత్రాన్ని వారు విస్మరించారు. నేడు వారు ఎదుర్కొంటున్న వరుస పరాజయాలు.. ఆనాడు వారు ప్రదర్శించిన గర్వానికి ప్రతిఫలమే అని క్రీడాభిమానులు అభిప్రాయపడుతున్నారు.

పుంజుకుంటారా?

ఆస్ట్రేలియా క్రికెట్ చరిత్రలో ఇలాంటి గడ్డు కాలాలు గతంలోనూ వచ్చాయి. ప్రతిసారి వారు ఫీనిక్స్ పక్షిలా పైకి లేచారు. అయితే ఈసారి వారు కేవలం టెక్నిక్‌ను మాత్రమే కాదు.. తమ మైండ్‌సెట్‌ను కూడా మార్చుకోవాల్సిన అవసరం ఉంది. గెలిచిన శిఖరం నుంచి పడిపోవడం ఎంత సులువో ఈ పరాజయాలు నిరూపించాయి. మళ్ళీ ఆ శిఖరాన్ని చేరాలంటే.. ప్రతిభకు 'వినయం' తోడవ్వాలి. "గెలుపు తల పొగరుకు దారి తీస్తే.. ఓటమి వినయాన్ని నేర్పుతుంది." ఆస్ట్రేలియా జట్టు ఇప్పుడు ఆ కఠినమైన పాఠాన్ని నేర్చుకుంటోంది. ఇప్పటికైనా వారు మేల్కొని, క్రీడాస్ఫూర్తితో ఆడితేనే పూర్వవైభవం సాధ్యం.