డల్లాస్‌లో భారతీయులకు తీవ్ర హెచ్చరిక

ఉన్నత చదువులు, మెరుగైన ఉద్యోగాల కోసం అమెరికా వెళ్లి స్థిరపడిన భారతీయులకు భద్రతా పరమైన సవాళ్లు రోజురోజుకూ ఎక్కువవుతున్నాయి. తాజాగా టెక్సాస్ రాష్ట్రంలోని డల్లాస్ పరిసర ప్రాంతాల్లో నివసిస్తున్న భారతీయ సమాజానికి తీవ్ర ఆందోళన కలిగించే ఒక సంఘటన వెలుగులోకి వచ్చింది. ముఖ్యంగా ప్రవాస భారతీయులు ఎక్కువగా నివసించే 'ఫ్రిస్కో' నగరంలో జరిగిన ఈ దొంగతనపు ప్రయత్నం స్థానికులను తీవ్ర భయాందోళనలకు గురి చేస్తోంది. ఈ ఘటన నేపథ్యంలో డల్లాస్ , పరిసర నగరాల్లోని భారతీయులు అత్యంత అప్రమత్తంగా ఉండాలని స్థానిక పెద్దలు, కమ్యూనిటీ లీడర్లు సూచిస్తున్నారు.

షాపింగ్ మాల్ వద్ద ఊహించని ప్రమాదం.. ఘటన ఎలా జరిగిందంటే?

బాధితులు అందించిన వివరాల ప్రకారం... ఫ్రిస్కో నగరంలోని ప్రముఖ ఇండియన్ గ్రోసరీ స్టోర్ పటేల్ బ్రదర్స్ సమీపంలో ఈ ఘటన చోటుచేసుకుంది. వీకెండ్ కావడంతో బాధితుడు తన కుటుంబంతో కలిసి నిత్యావసర వస్తువుల కోసం షాపింగ్‌కు వెళ్లాడు. షాపింగ్ అంతా పూర్తయిన తర్వాత బాధితుడు బిల్లింగ్ కోసం చెక్‌అవుట్ కౌంటర్ వద్ద వేచి ఉన్నాడు. సమయం వృథా కాకూడదని, అప్పటికే మార్కెట్ లోపల ఉన్న తన వృద్ధురాలైన తల్లిని కారు వద్దకు వెళ్లి కూర్చోమని పంపించాడు. అప్పటికే వారి కారులో అతని భార్య, చిన్న బిడ్డ కూర్చుని ఉన్నారు. బాధితుడి తల్లి ఒంటరిగా ట్రాలీతో కారు వైపు నడుచుకుంటూ వెళ్తుండగా ఒక గుర్తు తెలియని మహిళ ఆమెను అనుమానాస్పదంగా వెంబడించింది.

ఆ వృద్ధురాలు కారు డోర్ తీసి లోపల కూర్చునే క్రమంలో.. ఆ మహిళ ఆమెను సమీపించింది. మొదట ఏదో అడ్రస్ అడుగుతున్నట్లుగా లేదా పలకరిస్తున్నట్లుగా నటిస్తూ చాలా దగ్గరగా వచ్చింది. బాధితురాలికి తేరుకునే లోపే ఆ దుండగురాలు ఒక్కసారిగా వృద్ధురాలి మెడలోని బంగారు గొలుసును తెంచడానికి తీవ్రంగా ప్రయత్నించింది.

తృటిలో తప్పిన పెద్ద ప్రమాదం

ఈ పెనుగులాట జరుగుతున్న సమయంలోనే.. బాధితుడు బిల్లింగ్ పూర్తి చేసుకుని వేగంగా బయటకు వచ్చాడు. దూరం నుంచే కారు వద్ద ఏదో అలజడి జరుగుతోందని గమనించిన అతను గట్టిగా కేకలు వేస్తూ కారు వైపు పరుగెత్తాడు. బాధితుడు సమయానికి అక్కడికి చేరుకోవడంతో ఆ మహిళ భయపడిపోయింది. వెంటనే ఆమె గొలుసును వదిలేసి పక్కనే సిద్ధంగా ఉన్న తన అనుచరుల కారు ఎక్కి క్షణాల్లో అక్కడి నుంచి పరారైంది. బాధితుడి సమయస్ఫూర్తి వల్ల ఒక పెద్ద ప్రమాదం తృటిలో తప్పింది. అయినప్పటికీ పట్టపగలు అందరూ చూస్తుండగానే ఇలాంటి తెగింపుతో కూడిన చోరీ యత్నం జరగడం స్థానిక ప్రవాసుల్లో గుబులు రేపుతోంది.

అనుమానితుల వివరాలు.. పోలీసుల దర్యాప్తు

బాధితుడు, అక్కడ ఉన్న ప్రత్యక్ష సాక్షులు అందించిన వివరాల ప్రకారం పోలీసులు కేసు నమోదు చేసుకుని దర్యాప్తు చేస్తున్నారు. నిందితులు పరారవడానికి తెల్లటి రంగు గల 'ఎస్.యూవీ' రకం కారును ఉపయోగించారు. అది చూడటానికి ఫోర్డ్ మోడల్‌లా ఉందని బాధితులు చెప్తున్నారు. వృద్ధురాలిపై దాడి చేసిన మహిళ వయసు కాస్త ఎక్కువగా ఉంది. ఆమె చూడటానికి మిడిల్ ఈస్టర్న్ లేదా హిస్పానిక్ దేశాల మూలాలు ఉన్న మహిళలా కనిపించింది. పోలీసులు ఆ ప్రాంతంలోని సీసీటీవీ ఫుటేజీలను పరిశీలిస్తున్నారు. పక్కా ప్లాన్ ప్రకారమే భారతీయులే టార్గెట్‌గా ఈ ముఠా రంగంలోకి దిగినట్లు అనుమానిస్తున్నారు.

ప్రవాస భారతీయులు తీసుకోవాల్సిన కీలక జాగ్రత్తలు

ఈ సంఘటన కేవలం ఒక హెచ్చరిక మాత్రమేనని ఇలాంటి ముఠాలు భారతీయ కుటుంబాల అలవాట్లను ఆసరాగా చేసుకుని దాడులకు తెగబడుతున్నాయని భద్రతా నిపుణులు హెచ్చరిస్తున్నారు. ఈ నేపథ్యంలో కమ్యూనిటీ గ్రూపులు ఈ క్రింది జాగ్రత్తలు తప్పనిసరిగా పాటించాలని కోరుతున్నాయి పార్కింగ్ ప్రాంతాలలో లేదా నిర్మానుష్య ప్రదేశాలలో మహిళలు, వృద్ధులు, పిల్లలను ఎప్పుడూ ఒంటరిగా వదలకండి. ఎల్లప్పుడూ గుంపుగా లేదా తోడుతో వెళ్లడం మంచిది. సాధారణంగా భారతీయులు బంగారు నగలు ఎక్కువగా ధరిస్తారనే పేరుంది. అందుకే దొంగలు ఎక్కువగా భారతీయులనే లక్ష్యంగా చేసుకుంటారు. కాబట్టి బహిరంగ ప్రదేశాల్లో షాపింగ్ మాల్స్‌కు వెళ్లేటప్పుడు మెడలో బంగారు గొలుసులు, నగలు బయటకు కనిపించకుండా జాగ్రత్తపడండి. కారు ఎక్కేటప్పుడు లేదా దిగేటప్పుడు మీ చుట్టుపక్కల ఎవరున్నారనేది ఒకసారి గమనించండి. ఎవరైనా మిమ్మల్ని అనుసరిస్తున్నట్లు అనిపిస్తే వెంటనే అలర్ట్ అవ్వండి. ఏదైనా ఆపద వస్తే భయపడిపోకుండా గట్టిగా కేకలు వేసి ఇతరుల దృష్టిని ఆకర్షించండి. మీ పరిసరాల్లో ఎలాంటి అనుమానాస్పద వ్యక్తులు లేదా వాహనాలు కనిపించినా ఏమాత్రం ఆలస్యం చేయకుండా వెంటనే స్థానిక పోలీసులకు (911) సమాచారం అందించండి.

ఇలాంటి సంఘటనలు పెరుగుతున్న తరుణంలో అమెరికాలోని భారతీయులందరూ ఒకరికొకరు అండగా ఉంటూ సమాచారాన్ని పంచుకుంటూ మరింత అప్రమత్తంగా ఉండాలని సామాజిక కార్యకర్తలు కోరుతున్నారు.