అమెరికాలో ఆరిపోతున్న ‘తెలుగు’ దీపాలు: వరుస ప్రమాదాలు.. మిగులుస్తున్న గుండెకోత!

కంటికి రెప్పలా పెంచుకున్న పిల్లలు ఉన్నత చదువులు చదివి, విదేశాల్లో గొప్పగా స్థిరపడాలని ఏ తల్లిదండ్రులైనా కోరుకుంటారు. దండలు వేసి, దిష్టి తీసి, ఆశలతో విమానం ఎక్కించిన ఆ బిడ్డలే... రేపో మాపో సొంత ఊరికి వస్తారనుకుంటే, పెను ప్రమాదాల రూపంలో శవపేటికల్లో తిరిగివస్తుంటే ఆ కడపుకోత వర్ణనాతీతం.. ఇటీవలి కాలంలో అగ్రరాజ్యం అమెరికాలో తెలుగువారిపై శోకఛాయలు అలుముకుంటున్నాయి. వారం గడవకముందే ఏదో ఒక మూల ప్రమాదం జరగడం, వికసించాల్సిన తెలుగు జీవితాలు అర్ధాంతరంగా తునిగిపోవడం నిత్యకృత్యంగా మారింది. అసలు అమెరికాలో తెలుగువారికి ఏంటీ శాపం? వరుసగా ఆరిపోతున్న ఈ 'తెలుగు' దీపాలకు అడ్డుకట్ట పడేదెప్పుడు?

ఉన్నత విద్య అభ్యసించి.. మెరుగైన భవిష్యత్తును నిర్మించుకోవాలనే లక్ష్యంతో అగ్రరాజ్యం అమెరికా వెళ్లిన ఒక తెలుగు యువకుడి జీవితం రోడ్డు ప్రమాదం రూపంలో అనూహ్యంగా ముగిసిపోయింది. అమెరికాలోని అర్కాన్సాస్ రాష్ట్రంలో జరిగిన ఘోర రోడ్డు ప్రమాదంలో ఆంధ్రప్రదేశ్ రాష్ట్రంలోని అనంతపురం జిల్లాకు చెందిన నిస్సార్ అనే యువకుడు అక్కడిక్కడే ప్రాణాలు కోల్పోయాడు. ఈ సమాచారం అందుకోవడంతో అనంతపురంలోని ఆయన కుటుంబ సభ్యులు కన్నీరుమున్నీరవుతుండగా.. అమెరికాలోని తెలుగు కమ్యూనిటీలో తీవ్ర విషాద ఛాయలు అలముకున్నాయి.

అర్కాన్సాస్ రాష్ట్రంలోని లిటిల్ రాక్ ప్రాంతంలో ఈ కారు ప్రమాదం చోటుచేసుకుంది. ప్రమాదం జరిగిన తీరు.. దానికి దారితీసిన పరిస్థితులపై స్థానిక పోలీసులు కేసు నమోదు చేసి దర్యాప్తు చేస్తున్నారు. వాహనం అదుపుతప్పి ప్రమాదానికి గురైందా లేక మరొక వాహనం ఢీకొట్టిందా అనే కోణంలో అధికారులు ఆధారాలు సేకరిస్తున్నారు. ఈ ఘటనకు సంబంధించిన పూర్తి వివరాలు అధికారిక విచారణ అనంతరం వెలువడనున్నాయి.

విద్యాభ్యాసం.. కమ్యూనిటీతో అనుబంధం

నిస్సార్ ఉన్నత విద్య కోసం అమెరికా వెళ్లి ఓహియోలోని ప్రసిద్ధ 'కెంట్ స్టేట్ యూనివర్సిటీ' నుంచి తన డిగ్రీని పూర్తి చేశారు. చదువులో రాణించడమే కాకుండా అక్కడి భారతీయ, తెలుగు సంఘాల కార్యక్రమాల్లో ఆయన చురుగ్గా పాల్గొనేవారు. ఎల్లప్పుడూ నవ్వుతూ అందరితో ఆప్యాయంగా మెలిగే నిస్సార్ ఆకస్మిక మరణాన్ని ఆయన స్నేహితులు, తోటి విద్యార్థులు జీర్ణించుకోలేకపోతున్నారు. సహాయపడే గుణం ఉన్న మంచి మిత్రుడిని కోల్పోయామని వారు ఆవేదన వ్యక్తం చేస్తున్నారు.

భౌతికకాయం స్వదేశానికి తరలింపు

ప్రమాద వార్త తెలియగానే అమెరికాలోని తెలుగు సంఘాలు తానా, ఆటా వంటి సంస్థల ప్రతినిధులు, స్థానిక భారతీయ మిత్రులు తక్షణమే స్పందించారు. నిస్సార్ భౌతికకాయానికి స్థానిక ఆసుపత్రిలో పోస్ట్‌మార్టం ప్రక్రియ.. చట్టపరమైన అనుమతులు.. క్లియరెన్సులు పూర్తి చేసే పనిలో ఉన్నారు. వీలైనంత త్వరగా ఆయన మృతదేహాన్ని స్వస్థలమైన అనంతపురానికి తరలించేందుకు అవసరమైన ఏర్పాట్లు వేగవంతం చేశారు.

ప్రవాస భారతీయుల్లో పెరుగుతున్న ఆందోళన

గత కొన్ని నెలలుగా విదేశాల్లో ముఖ్యంగా అమెరికాలో వరుసగా జరుగుతున్న రోడ్డు ప్రమాదాల్లో పలువురు తెలుగు విద్యార్థులు.. ఉద్యోగులు ప్రాణాలు కోల్పోతుండటం ప్రవాస భారతీయులను తీవ్రంగా కలచివేస్తోంది. కంటికి రెప్పలా పెంచి పెద్ద చేసిన పిల్లలు విదేశాల్లో ఉన్నట్టుండి ప్రమాదాల బారిన పడి దేహాలుగా తిరిగి వస్తుండటంతో స్వదేశంలోని తల్లిదండ్రులు ఆందోళన చెందుతున్నారు. నిస్సార్ మృతితో అనంతపురంలోని ఆయన నివాస ప్రాంతంలో శోకసంద్రం అలుముకుంది.