కేంద్రంతో ఫైట్.. హైకోర్టు షాక్.. దేశ నిబంధనలు పాటించాల్సిందే.. హక్కులపై 'ఎక్స్' ఆందోళన

సోషల్ మీడియా దిగ్గజం 'ఎక్స్' (X) , భారత ప్రభుత్వం మధ్య కంటెంట్ నియంత్రణపై జరుగుతున్న న్యాయ పోరాటం మరింత ఉద్రిక్తతకు దారితీసింది. కొన్ని ఖాతాలను బ్లాక్ చేయాలంటూ అధికారులు ఇచ్చిన ఆదేశాలను పాటించాల్సిందేనని కర్ణాటక హైకోర్టు ఇచ్చిన తాజా తీర్పుపై 'ఎక్స్' తీవ్ర ఆందోళన వ్యక్తం చేసింది. కంటెంట్‌ను తొలగించడానికి అధికారులు వినియోగిస్తున్న ఐటీ చట్టం సెక్షన్ 79(3)(b)ని సవాలు చేస్తూ 'ఎక్స్' దాఖలు చేసిన పిటిషన్‌ను హైకోర్టు కొట్టివేసింది. హైకోర్టు ఈ తీర్పు ద్వారా, భారత్‌లో సోషల్ మీడియా వేదికలు ఎలాంటి "నియంత్రణ లేకుండా" పనిచేయలేవని, స్వేచ్ఛా హక్కులు సహేతుకమైన పరిమితులకు లోబడి ఉంటాయని స్పష్టం చేసింది.

'ఎక్స్' ఆందోళనకు కారణాలివే

కర్ణాటక హైకోర్టు తీర్పు భవిష్యత్తులో దుర్వినియోగమయ్యే ప్రమాదం ఉందని 'ఎక్స్' సంస్థ ఆందోళన వ్యక్తం చేసింది. ఈ తీర్పు కారణంగా, భవిష్యత్తులో లక్షలాది మంది పోలీస్ అధికారులు ఏకపక్షంగా, పారదర్శకత లేకుండా పోస్టుల తొలగింపుకు ఆదేశాలు జారీ చేసే పరిస్థితి ఏర్పడే ప్రమాదం ఉందని 'ఎక్స్' వ్యాఖ్యానించింది. కంటెంట్‌ను బ్లాక్ చేయడానికి సెక్షన్ 69A అనే ప్రత్యేక ప్రక్రియ ఉన్నప్పటికీ, అధికారులు సులభమైన మార్గంగా భావించి సెక్షన్ 79(3)(b)ను ఉపయోగిస్తున్నారని 'ఎక్స్' ఆరోపించింది. సెక్షన్ 79(3)(b) ప్రకారం, ఆదేశాలను పాటించకపోతే సోషల్ మీడియా సంస్థలు తమ చట్టబద్ధమైన రక్షణను కోల్పోతాయి. ఇది తమపై అనధికారిక సెన్సార్‌షిప్ విధించడమేనని సంస్థ పేర్కొంది.

భావవ్యక్తీకరణ స్వేచ్ఛకు సంబంధించి తమ వాదనలో 'ఎక్స్' అమెరికన్ న్యాయ సూత్రాలను ప్రస్తావించగా.. హైకోర్టు వాటిని తిరస్కరించింది. భారత రాజ్యాంగం ప్రకారం హక్కులు పరిమితంగా ఉంటాయని స్పష్టం చేసింది.

* కోర్టు తీర్పులో కీలకాంశాలు

కోర్టు తీర్పు ప్రభుత్వ నియంత్రణ అవసరాన్ని బలంగా సమర్థించింది. సోషల్ మీడియా "స్వేచ్ఛారహిత స్థితిలో" ఉండకూడదని, సమాచార ప్రవాహాన్ని నియంత్రించడం తప్పనిసరి అని కోర్టు అభిప్రాయపడింది. ముఖ్యంగా మహిళలపై నేరాలు వంటి కేసులలో పౌరుల గౌరవ హక్కు ను కాపాడటానికి నియంత్రణ అవసరమని నొక్కి చెప్పింది. "అమెరికా న్యాయ తార్కికతను ఇక్కడికి తేగూడదు. భారత్‌లో పనిచేసే ఏ సోషల్ మీడియా వేదిక అయినా భారతీయ చట్టాలకు కట్టుబడి ఉండాలి" అని హైకోర్టు స్పష్టం చేసింది.

*తదుపరి అడుగు: సుప్రీంకోర్టుకు అప్పీల్

కర్ణాటక హైకోర్టు తీర్పును సవాలు చేస్తామని 'ఎక్స్' ప్రకటించింది. భావ వ్యక్తీకరణ స్వేచ్ఛను రక్షించడానికి అవసరమైన న్యాయ పోరాటం చేస్తామని, ఈ తీర్పు స్వేచ్ఛాయుత వాక్‌కు ముప్పు కలిగిస్తుందని తెలిపింది.

ప్రభుత్వం నియంత్రణ .. పౌరుల స్వేచ్ఛా వ్యక్తీకరణ మధ్య జరుగుతున్న ఈ 'టగ్ ఆఫ్ వార్' రానున్న రోజుల్లో సుప్రీంకోర్టుకు చేరే అవకాశం ఉంది. ఈ తుది తీర్పు భారతదేశంలో డిజిటల్ స్వేచ్ఛ భవిష్యత్తును.. సోషల్ మీడియా సంస్థల కార్యకలాపాల పరిధిని నిర్ణయించనుంది.