వేల ఉద్యోగాలకు ఎసరు పెడుతున్న ఏఐ.. ప్రపంచవ్యాప్తంగా భారీ కోతలు

ఆర్టిఫిషియల్ ఇంటెలిజెన్స్ (AI) అనూహ్యంగా రోజురోజుకూ అభివృద్ధి చెందుతోంది. ఇది ప్రపంచవ్యాప్తంగా ఉద్యోగ మార్కెట్‌పై తీవ్ర ప్రభావాన్ని చూపుతోంది. ఒకవైపు వేగం, కచ్చితత్వంతో కూడిన ఆటోమేషన్ ద్వారా సంస్థలకు ఎన్నో ప్రయోజనాలు కల్పిస్తున్న AI, మరోవైపు వేలాది మంది ఉద్యోగుల గుండెల్లో గుబులు పుట్టిస్తోంది. మనిషి ప్రమేయం లేకుండానే పనులు చక్కబెట్టే ఏఐ సామర్థ్యం పెరిగిపోవడంతో, పెద్ద పెద్ద సంస్థలు సైతం ఏఐకి ప్రాధాన్యం ఇస్తూ ఉద్యోగాలను తొలగిస్తున్నాయి. దీంతో సిలికాన్ వ్యాలీ నుంచి మన హైదరాబాద్‌లోని హైటెక్ సిటీ వరకు ఎంతోమంది ఐటీ ఉద్యోగులు, ఎప్పుడు ఉద్యోగం ఊడుతుందోనన్న భయంతో జీవిస్తున్నారు.

AI టూల్స్, సిస్టమ్స్ చాలా వేగంగా అభివృద్ధి చెందుతున్నాయి. గతంలో మనుషులు గంటలు, రోజుల పాటు చేసే పనులను ఇప్పుడు ఏఐ నిమిషాల్లో లేదా క్షణాల్లో చేసేస్తోంది. యూట్యూబ్‌లో వీడియో క్రియేషన్ నుంచి కోడింగ్, పెద్ద పెద్ద కంపెనీల సమస్యలను పరిష్కరించేంత వరకు ప్రతిచోట ఏఐని వాడుతున్నారు. దీనితో ఆటోమేషన్ పెరిగి, మానవ వనరుల అవసరం తగ్గుతోంది.

గోల్డ్‌మన్ సాచ్స్ నివేదిక ప్రకారం, AI వల్ల ప్రపంచవ్యాప్తంగా 300 మిలియన్ (30 కోట్లు) ఉద్యోగాలు ప్రభావితమవుతాయని అంచనా వేశారు. ఇందులో సాఫ్ట్‌వేర్ డెవలప్‌మెంట్ ప్రముఖంగా ఉంటుందని పేర్కొన్నారు. వరల్డ్ ఎకనామిక్ ఫోరమ్ (WEF) నివేదిక 2020లో 2025 నాటికి AI ప్రపంచవ్యాప్తంగా 75 మిలియన్ (7.5 కోట్లు) ఉద్యోగాలను తొలగిస్తుందని అంచనా వేసింది. అయితే, అదే సమయంలో 133 మిలియన్ (13.3 కోట్లు) కొత్త ఉద్యోగాలను కూడా సృష్టిస్తుందని పేర్కొంది. అంటే, నికరంగా 58 మిలియన్ల ఉద్యోగాలు పెరుగుతాయని, కానీ కొన్ని రంగాలలో గణనీయమైన ఉద్యోగ నష్టం ఉంటుందని హెచ్చరించింది.

ఐఎల్ఓ (International Labour Organization), పోలాండ్‌లోని NASK సంయుక్త అధ్యయనం ప్రకారం.. ప్రపంచవ్యాప్తంగా ప్రతీ నలుగురు ఉద్యోగుల్లో ఒకరి ఉద్యోగం (25%) జనరేటివ్ AI (GenAI) వల్ల ప్రభావితమయ్యే అవకాశం ఉంది. అయితే, పూర్తిగా ఉద్యోగం పోవడం కంటే ఉద్యోగ స్వభావం మారడమే ఎక్కువగా జరుగుతుంది.

ఏఐ వలన ఎక్కువగా ప్రభావితమయ్యే కొన్ని రంగాలు, ఉద్యోగాలు:

ఐటీ రంగం: టెస్టింగ్, డిబగ్గింగ్, బేసిక్ కోడింగ్, క్వాలిటీ అష్యురెన్స్, డేటా ఎంట్రీ వంటి పునరావృత పనులను ఏఐ సిస్టమ్స్ సులభంగా చేయగలవు. కొంతమంది టెక్ నిపుణులు ఏఐ సాఫ్ట్‌వేర్ డెవలపర్ల కంటే మెరుగైన కోడ్‌ను జనరేట్ చేస్తోందని చెబుతున్నారు. ఇది మిడ్-లెవెల్ రోల్స్‌పై ఒత్తిడిని పెంచుతుంది. అమెరికాలోని సేల్స్‌ఫోర్స్ వంటి ప్రముఖ కంపెనీలు ఇప్పటికే ఏఐ వల్ల పెరిగిన ఉత్పాదకత కారణంగా సాఫ్ట్‌వేర్ ఇంజనీర్ల నియామకాలను నిలిపివేశాయి.

క్లరికల్ ఉద్యోగాలు: జనరేటివ్ AI వల్ల అనేక క్లరికల్ పనులు ఆటోమేట్ అవుతాయి.

వినియోగదారుల సేవలు (Customer Service): చాట్‌బాట్‌లు, వర్చువల్ అసిస్టెంట్‌లు వినియోగదారుల సేవలను పెద్ద ఎత్తున భర్తీ చేయగలవు.

రవాణా: ఆటోమేటిక్ వాహనాలు డ్రైవర్ ఉద్యోగాలను ప్రభావితం చేయగలవు.

తయారీ రంగం (Manufacturing): రోబోటిక్స్, ఆటోమేషన్ వల్ల కార్మికుల అవసరం తగ్గుతుంది.

రిటైల్ అమ్మకాలు: రిటైల్ సేల్స్ జాబ్స్‌లో AI ప్రభావం వల్ల గణనీయమైన తగ్గుదల నమోదైంది.

భారతదేశంలో కూడా AI వినియోగం పెరుగుతోంది. ఐటీ కంపెనీలు తమ ఉద్యోగులకు AIపై ట్రైనింగ్ ఇస్తున్నాయి. చాలా భారతీయ ఉద్యోగులు తమ పనిలో AIని ఉపయోగిస్తున్నారని, AI లేకుండా తమ పనులను పూర్తి చేయలేరని కూడా నివేదికలు చెబుతున్నాయి.