విమానం.. ప్రయాణికులు అగ్నికి ఆహుతి.. చెక్కుచెదరని భగవద్గీత.. వైరల్

గుజరాత్‌లోని అహ్మదాబాద్‌లో ఇటీవల జరిగిన ఎయిరిండియా విమాన ప్రమాదం యావత్ దేశాన్ని, ప్రపంచాన్ని దిగ్భ్రాంతికి గురిచేసింది. ఎయిరిండియా బోయింగ్ 787-8 విమానం కూలిపోయిన ఘటనలో 265 మంది ప్రాణాలు కోల్పోయారు. వీరిలో 229 మంది ప్రయాణికులు, 12 మంది సిబ్బంది కాగా, అహ్మదాబాద్ ఎయిర్‌పోర్ట్ సమీపంలోని బీజీ వైద్య కళాశాల భవనంపై విమానం పడటంతో మరో 24 మంది వైద్య విద్యార్థులు కూడా దుర్మరణం చెందారు.

ఘోర ప్రమాదం, భీకర మంటలు

625 అడుగుల ఎత్తు నుంచి ఒక్కసారిగా కుప్పకూలిన విమానం, దాదాపు 1.25 లక్షల లీటర్ల ఇంధనంతో మంటలకు ఆహుతైంది. కేంద్ర హోం మంత్రి అమిత్ షా తెలిపిన వివరాల ప్రకారం, ఈ భీకర అగ్నిప్రమాదంలో సహాయక చర్యలు చేపట్టడం అసాధ్యంగా మారింది. దాదాపు 1000 డిగ్రీల ఉష్ణోగ్రతతో మంటలు ఎగిసిపడ్డాయి. మృతుల శరీర భాగాలు గుర్తుపట్టలేనంతగా కాలిపోయాయి. ఈ ప్రమాదంలో పక్షులు, కుక్కలు కూడా అగ్నికి ఆహుతి అయ్యాయని అధికారులు తెలిపారు.

-మంటల్లోనూ చెక్కుచెదరని భగవద్గీత.. వైరల్ అవుతున్న వీడియో

ఈ దారుణమైన ప్రమాదంలో విమాన శకలాల మధ్య ఓ భగవద్గీత పుస్తకం చెక్కుచెదరకుండా ఉండటం అందరినీ ఆశ్చర్యానికి గురిచేసింది. వెయ్యి డిగ్రీల ఉష్ణోగ్రతలోనూ మంటలకు కాలిపోకుండా ఆ పుస్తకం అలాగే ఉండటం గమనార్హం. దీనికి సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది. ఈ వీడియో చూసిన నెటిజన్లు "ఇదొక అద్భుతం" అంటూ కామెంట్స్ చేస్తున్నారు. కొందరు దీనిని ఆధ్యాత్మిక కోణంలో చూస్తుండగా, మరికొందరు యాదృచ్చికంగా జరిగిందని అభిప్రాయపడుతున్నారు.

-ప్రమాదంపై దర్యాప్తు, కీలక నిర్ణయాల యోచనలో కేంద్రం

అహ్మదాబాద్ విమాన ప్రమాద ఘటనపై కేంద్ర ప్రభుత్వం కీలక నిర్ణయం తీసుకునే యోచనలో ఉన్నట్లు తెలుస్తోంది. బోయింగ్ 787-8 విమానాలను నిలిపివేసే అవకాశాలను పరిశీలిస్తున్నట్లు సమాచారం. మరోవైపు, నేషనల్ ఇన్వెస్టిగేషన్ ఏజెన్సీ (NIA) బృందం ప్రమాద స్థలాన్ని పరిశీలించి, విమాన ప్రమాద కారణాలపై ఆరా తీస్తోంది. ఈ ఘటనకు గల అసలు కారణాలు ఏమిటనే దానిపై పూర్తిస్థాయి దర్యాప్తు జరుగుతోంది.