క్రియేటర్లకు యూట్యూబ్ వరం..రూ. 21,000 కోట్ల చెల్లింపులపై CEO కీలక నిర్ణయం!

డిజిటల్ ప్రపంచంలో సరికొత్త విప్లవం సృష్టిస్తున్న యూట్యూబ్, భారతదేశాన్ని 'క్రియేటర్ల దేశం' గా అభివర్ణించింది. ముంబైలో జరిగిన వరల్డ్ ఆడియో విజువల్ అండ్ ఎంటర్టైన్మెంట్ సమ్మిట్‌లో పాల్గొన్న యూట్యూబ్ సీఈఓ నీల్ మోహన్, భారతీయ క్రియేటర్ల సత్తాను కొనియాడారు. గత మూడేళ్లలో భారతీయ క్రియేటర్లకు ఏకంగా రూ. 21,000 కోట్లు చెల్లించామని వెల్లడించి అందరినీ ఆశ్చర్యపరిచారు. రాబోయే రెండేళ్లలో మరో రూ. 850 కోట్ల పెట్టుబడులు పెట్టబోతున్నట్లు ఆయన ప్రకటించారు.

భారతదేశం ఒక పవర్‌హౌస్:

యూట్యూబ్ సీఈఓ నీల్ మోహన్ మన దేశాన్ని ఎంటర్టైన్మెంట్ రంగంలో ఒక పవర్‌హౌస్‌గా అభివర్ణించారు. మన దేశంలోని క్రియేటర్లు తమ ప్రతిభతో ప్రపంచవ్యాప్తంగా గుర్తింపు తెచ్చుకుంటున్నారని ఆయన ప్రశంసించారు. ఒకప్పుడు కేవలం వినోదం కోసమే చూసే యూట్యూబ్, ఇప్పుడు లక్షలాది మందికి ఉపాధినిచ్చే ఒక పెద్ద వ్యాపార మార్గంగా మారిందని ఆయన ఆనందం వ్యక్తం చేశారు.

రూ. 21,000 కోట్ల చెల్లింపులు:

గడిచిన మూడు సంవత్సరాల్లో భారతీయ క్రియేటర్లు, కళాకారులు మరియు మీడియా సంస్థలకు యూట్యూబ్ సుమారు రూ. 21,000 కోట్లు చెల్లించింది. ఇది మన దేశ క్రియేటర్ ఎకానమీ ఏ స్థాయిలో ఎదుగుతుందో చెప్పడానికి నిదర్శనం. ఇక సామాన్య వ్యక్తులు కూడా తమ అభిరుచులను వ్యాపారాలుగా మార్చుకుని, భారీగా సంపాదించుకోవడానికి యూట్యూబ్ ఒక వరంలా మారిందని ఈ గణాంకాలు చెబుతున్నాయి.

10 కోట్ల ఛానెళ్లు.. 15 వేల మంది మిలియనీర్లు:

గతేడాది మన దేశం నుండి సుమారు రూ.10 కోట్ల ఛానెళ్లు కంటెంట్‌ను అప్‌లోడ్ చేశాయంటే పరిస్థితి అర్థం చేసుకోవచ్చు. ఇందులో విశేషం ఏమిటంటే.. 15,000 కంటే ఎక్కువ ఛానెళ్లు ఒక మిలియన్ (10 లక్షల) కంటే ఎక్కువ మంది సబ్‌స్క్రైబర్లను కలిగి ఉన్నాయి. అందుకే ఇక భారతదేశాన్ని 'క్రియేటర్ నేషన్' అని పిలవడానికి తాను ఎంతో ఉత్సాహంగా ఉన్నానని నీల్ మోహన్ పేర్కొన్నారు.

గ్లోబల్ క్రేజ్ సంపాదిస్తున్న ఇండియన్ వీడియోలు:

మన దేశంలో తయారైన వీడియోలు కేవలం ఇక్కడే కాదు, విదేశాల్లోనూ దుమ్ము రేపుతున్నాయి. గత సంవత్సరంలో భారతీయ వీడియోలను విదేశీయులు ఏకంగా 4,500 కోట్ల గంటల పాటు చూశారట. అంటే మన దేశ సంస్కృతి, సంగీతం మరియు వినోదం సరిహద్దులు దాటి ప్రపంచాన్ని అలరిస్తున్నాయి. ఇది మన క్రియేటర్ల శక్తికి దక్కిన అంతర్జాతీయ గుర్తింపు.

భవిష్యత్తులో రూ. 850 కోట్ల పెట్టుబడి:

రాబోయే రెండేళ్లలో భారతదేశంలోని క్రియేటర్ ఎకానమీని మరింత వేగవంతం చేయడానికి రూ. 850 కోట్ల పెట్టుబడి పెట్టనున్నట్లు యూట్యూబ్ ప్రకటించింది. క్రియేటర్లకు అవసరమైన కొత్త టూల్స్, ఫీచర్లు మరియు ట్రైనింగ్ కోసం ఈ నిధులు ఉపయోగించనున్నారు. ఇక యూట్యూబ్ ప్రారంభమై 20 ఏళ్లు పూర్తి చేసుకున్న సందర్భంగా, భారతదేశం ఇంతటి కీలక పాత్ర పోషించడం విశేషమని సీఈఓ ముగించారు.

ఒకప్పుడు కేవలం సినిమాలు, మ్యూజిక్‌కే పరిమితమైన మన దేశం, ఇప్పుడు డిజిటల్ కంటెంట్ సృష్టించడంలో ప్రపంచ దేశాలకు మార్గదర్శిగా నిలుస్తోంది. యూట్యూబ్ సీఈఓ ప్రకటించిన ఈ అంకెలు మన దేశ యువతలోని సృజనాత్మకతకు అద్దం పడుతున్నాయి.