రణబలి.. గెటప్పులతోనే మెంటలెక్కిస్తున్నారు!
రణబలి చిత్రం కోసం విజయ్ దేవరకొండ మేకోవర్ నిజంగా ఆశ్చర్యపరుస్తోంది. అతడు కోరమీసం తెల్ల పంచెకట్టుతో ప్రత్యేకంగా కనిపిస్తున్నాడు.;
రణబలి చిత్రం కోసం విజయ్ దేవరకొండ మేకోవర్ నిజంగా ఆశ్చర్యపరుస్తోంది. అతడు కోరమీసం తెల్ల పంచెకట్టుతో ప్రత్యేకంగా కనిపిస్తున్నాడు. అదే సమయంలో రష్మిక మందన్న చీరకట్టులో ఎంతో సాంప్రదాయ బద్ధంగా కనిపిస్తోంది. అసలు ఆ ఇద్దరి పాత్రలు సంగతేంటో కానీ...! రణబలిగా విజయ్.. జయమ్మగా రష్మిక.. రెండు పాత్రలు క్యూరియాసిటీని పెంచుతున్నాయి...
విజయ్ దేవరకొండ, రష్మిక మందన్న జంటగా నటిస్తున్న తాజా చిత్రం `రణబలి` ప్రస్తుతం సినీ వర్గాల్లో హాట్ టాపిక్గా మారింది. రాహుల్ సాంకృత్యన్ దర్శకత్వంలో పీరియడ్ డ్రామాగా తెరకెక్కుతున్న ఈ సినిమా కోసం విజయ్ దేవరకొండ మేకోవర్ నిజంగా ఆశ్చర్యపరుస్తోంది. కోరమీసం, తెల్లటి పంచెకట్టుతో విజయ్ ఒక పవర్ఫుల్ భూస్వామి లేదా ఒక తెగకు నాయకుడిలా అత్యంత గంభీరంగా కనిపిస్తుండగా.. రష్మిక మందన్న జయమ్మగా చీరకట్టులో ఎంతో సాంప్రదాయబద్ధంగా కట్టుబొట్టుతో ఆకట్టుకుంటోంది. వీరిద్దరి పాత్రల మధ్య ఉండే కెమిస్ట్రీ , సంఘర్షణ థియేటర్లలో ప్రేక్షకులకు సరికొత్త అనుభూతిని ఇస్తుందనడంలో సందేహం లేదు.
పెళ్లి తర్వాత విజయ్, రష్మిక మళ్ళీ మేకప్ వేసుకుని `రణబలి` సెట్స్లో అడుగు పెట్టడం విశేషం. ఈ సందర్భంగా చిత్ర బృందం వారికి ఘనస్వాగతం పలుకుతూ కేక్ కట్ చేయించి తమ ఆనందాన్ని షేర్ చేసింది. కేవలం గెటప్పులతోనే కాకుండా... విజయ్ ఈ పాత్ర కోసం పడుతున్న శ్రమ కూడా అసాధారణంగా ఉంది. పాత రాయలసీమ మాండలికాన్ని నేర్చుకోవడంతో పాటు.. దాదాపు ఆరు నెలల పాటు గుర్రపు స్వారీలో ప్రత్యేక శిక్షణ పొందారు. ఈ సినిమాలో గుర్రం కూడా ఒక కీలక పాత్ర పోషిస్తుందని, దాని కోసం మహారాష్ట్ర నుండి ప్రత్యేక గుర్రాలను తీసుకొచ్చి శిక్షణ ఇచ్చామని దర్శకుడు వెల్లడించడం సినిమాపై ఉన్న అంకితభావాన్ని చాటిచెబుతోంది.
దర్శకుడు రాహుల్ సాంకృత్యన్ ఈ కథను వాస్తవ సంఘటనలు.. లోతైన పరిశోధన ఆధారంగా రూపొందించారు. 19వ శతాబ్దపు మద్రాస్ ప్రెసిడెన్సీ (ప్రస్తుత చెన్నై, తెలుగు ప్రాంతాలు, బెంగళూరు) నేపథ్యంలో అప్పట్లో జరిగిన అణచివేత- తిరుగుబాటు గాథలను ఈ సినిమా ప్రతిబింబిస్తుంది. చరిత్ర పుస్తకాల్లో కనిపించని పల్లెల్లోని ఆచారాలు , జానపద కథల్లో దాగి ఉన్న నిజాలను వెలికితీసే ప్రయత్నం చేశామని దర్శకుడు పేర్కొన్నారు. ముఖ్యంగా క్లైమాక్స్ సన్నివేశం దర్శకుడి సొంత ఊరిలోని ఒక పురాతన ఆచారం ఆధారంగా రూపొందించడం విశేషం.
ఈ చిత్రంలో మరో ప్రధాన ఆకర్షణ అంతర్జాతీయ నటుడు ఆర్నాల్డ్ వోస్లూ.. బ్రిటీష్ ఆఫీసర్ `సర్ థియోడర్ హెక్టర్` పాత్రలో నటిస్తున్నారు. హాలీవుడ్ స్థాయి విలనీని ఇండియన్ స్క్రీన్పై చూపించేందుకు దర్శకుడు ఈ సాహసోపేతమైన నిర్ణయం తీసుకున్నారు. వోస్లూ కూడా ఈ కథలోని ఎమోషన్స్కు కనెక్ట్ అయ్యి.. తన పాత్ర కోసం ప్రత్యేకంగా బ్రిటీష్ యాసను నేర్చుకోవడం సినిమాకు మరింత సహజత్వాన్ని ఇస్తుంది. మైత్రీ మూవీ మేకర్స్ - టి-సిరీస్ సంయుక్తంగా నిర్మిస్తున్న ఈ భారీ బడ్జెట్ చిత్రం అత్యున్నత సాంకేతిక విలువల తో రూపొందుతోంది.
ప్రస్తుత ప్రేక్షకులు రొటీన్ ప్రేమకథల కంటే చారిత్రక, పౌరాణిక కాన్సెప్టులు.. లార్జర్ దాన్ లైఫ్ కథలకే ప్రాధాన్యత ఇస్తున్నారు. ఆ అభిరుచులకు అనుగుణంగానే `రణబలి`ని ఒక పాన్-ఇండియా విజువల్ వండర్గా తీర్చిదిద్దుతున్నారు. పాశ్చాత్య దేశాల గుర్తింపు కోసం కాకుండా.. మన మూలాలను వెతుక్కుంటూ సాగే ఈ ప్రయాణం ప్రేక్షకులకు గొప్ప అనుభూతిని మిగిలిస్తుందని చిత్ర బృందం ధీమా వ్యక్తం చేస్తోంది. పెళ్లి తర్వాత సెట్స్ పైకి వచ్చిన కొత్త జంట కోసం మైత్రి అధినేతలు దగ్గరుండి మరీ కేక్ కటింగ్ కార్యక్రమం జరిపించారు. ఈవెంట్లో రణబలి నటీనటుల లుక్స్ అందరినీ ఆకట్టుకున్నాయి. 11 సెప్టెంబర్ 2026న విడుదల కానున్న ఈ సినిమా బాక్సాఫీస్ వద్ద ఎటువంటి రికార్డులు సృష్టిస్తుందో వేచి చూడాలి.