ఫ్యామిలీ సినిమా దెబ్బకు ఫ్యామిలీ సినిమా మాయం

సౌత్ సూపర్ స్టార్లలో ఒకడైన సూర్య నుంచి వచ్చిన కొత్త సినిమా ‘విశ్వనాథ్ అండ్ సన్స్’కు గత వారం అదిరిపోయే ఓపెనింగ్స్ వచ్చాయి. తొలి వీకెండ్లో ఆ సినిమా ఊపు చూస్తే చాలా పెద్ద రేంజికి వెళ్లేలా కనిపించింది. తమిళంలో రిలీజ్ ముంగిట అడ్వాన్స్ బుకింగ్స్ ఆశాజనకంగా లేకపోయినా.. రిలీజ్ తర్వాత పుంజుకుంది. తెలుగులో అయితే ఈ చిత్రం ఇక్కడి మిడ్ రేంజ్ స్టార్ల సినిమాల స్థాయిలో అదిరిపోయే వసూళ్లు రాబట్టింది. వీకెండ్ తర్వాత తమిళంలో జోరు తగ్గినా.. తెలుగులో మాత్రం సూర్య సినిమా బలంగానే నిలబడింది. ఈ మధ్య ఫ్యామిలీ టచ్ ఉన్న సినిమాలన్నీ బాగా ఆడుతుండగా.. ఆ కోవలోనే ‘విశ్వనాథ్ అండ్ సన్స్’ కూడా మంచి ప్రభావం చూపింది. తొలి వారంలోపే రూ.150 కోట్ల మార్కును దాటిన ఈ చిత్రానికి లాంగ్ రన్ ఉంటుందని.. ఇంకా పెద్ద రేంజికి వెళ్తుందని భావించారు ట్రేడ్ పండిట్లు.

కానీ ‘విశ్వనాథ్ అండ్ సన్స్’ రన్ సడెన్‌గా ఎండ్ అయిపోయిన పరిస్థితి కనిపిస్తోంది. తమిళంలో వీకెండ్ తర్వాత ఈ సినిమాను ప్రేక్షకులు పట్టించుకోలేదు. షేర్లు పడిపోయాయి. తెలుగులో గురువారం వరకు సినిమా పర్వాలేదనిపించినా.. శుక్రవారంతో ఆ సినిమా పనైపోయినట్లు కనిపిస్తోంది. రవితేజ సినిమా ‘ఇరుముడి’ ఉప్పెనలా వచ్చి సూర్య చిత్రంపై పడింది. మొత్తం ప్రేక్షకులు ఒక్కసారిగా ఈ సినిమా వైపు టర్న్ అయిపోయారు. ‘ఇరుముడి’ వేరే జానర్ మూవీ అయితే ఓకే కానీ.. అది కూడా ఫ్యామిలీ మూవీనే కావడంతో ఆ వర్గం ప్రేక్షకులకు అదే ఛాయిస్‌గా మారింది. ఇక అయ్యప్ప మాల నేపథ్యంలో నడిచే సినిమా కావడంతో అయ్యప్ప భక్తులు ఈ సినిమా కోసం ఊగిపోతున్నారు. ఇందులో మాస్ అంశాలు, థ్రిల్లర్ టచ్ ఉండడంతో ఆ వర్గం ప్రేక్షకులకూ ఇది నచ్చుతోంది. ‘విశ్వనాథ్ అండ్ సన్స్’ పూర్తిగా క్లాస్‌గా సాగే ఫ్యామిలీ మూవీ కావడంతో దాని పరిధి తగ్గిపోయింది. ఫ్యామిలీ సినిమాను ఫ్యామిలీ టచ్ ఉన్న సినిమానే రీప్లేస్ చేయడంతో సూర్య చిత్రానికి చెక్ పడిపోయింది. ఇక ఆ సినిమాకు పెద్దగా షేర్ వచ్చే అవకాశాలు కనిపించడం లేదు.