RRR సెన్సార్‌ రిపోర్ట్‌

రాజమౌళి దర్శకత్వంలో రూపొందిన ఆర్ ఆర్ ఆర్‌ సినిమా విడుదలకు ఇంకా నెలన్నర సమయం ఉంది. అప్పుడే సెన్సార్‌ కార్యక్రమాలు పూర్తి అయ్యాయి అంటూ సోషల్‌ మీడియాలో ప్రచారం జరుగుతోంది. సాదారణంగా అయితే సినిమా విడుదలకు కేవలం వారం పది రోజుల ముందు మహా అయితే రెండు వారాల ముందు సెన్సార్‌ కు వెళ్తారు. కాని ఆర్ ఆర్‌ ఆర్‌ సినిమాకు మాత్రం నెలన్నర ముందే సెన్సార్‌ కార్యక్రమాలు పూర్తి చేశారని అంటున్నారు. వీఎఫ్‌ఎక్స్ వర్క్‌ కూడా కంప్లీట్‌ అవ్వడంతో సినిమాను భారీ ఎత్తున విడుదల చేయడం కోసం డిసెంబర్‌ మొదటి వారంలో ప్రమోషన్స్ మొదలు పెట్టే ఉద్దేశ్యంతో ముందుగానే సెన్సార్‌ కార్యక్రమాలను ముగించారు అనేది కొందరి అభిప్రాయం.

ఇక సోషల్‌ మీడియా మరియు ఇండస్ట్రీ వర్గాల నుండి అందుతున్న సమాచారం ప్రకారం ఈ సినిమా దాదాపుగా మూడు గంటల నిడివి వచ్చిందట. ఈమద్య కాలంలో రెండు గంటలకు కాస్త అటు ఇటుగానే సినిమాలు ఉంటున్నాయి. అలాంటిది ఈ సినిమా మూడు గంటలు అంటే ఖచ్చితంగా ఎంత కంటెంట్‌ జక్కన్న సినిమాలో పెట్టి ఉంటాడో అర్థం చేసుకోవచ్చు. జక్కన్న సినిమా మూడు గంటలు కాదు అయిదు గంటలు ఉన్నా బోర్‌ కొట్టకుండా చూడగలం. ఆయన అద్బుతమైన విజువల్స్ తో సినిమాను తెరకెక్కించి ఉంటాడు. కనుక మూడు గంటలు అనేది పెద్ద విషయం కాదని అంటున్నారు. టికెట్ల రేట్లు కొన్ని చోట్ల బారీగా పెరిగాయి. కనుక ఆ రేటుకు తగ్గట్లుగా మూడు గంటల వినోదంను అందించడం మంచి విషయం అంటూ నెటిజన్స్ చర్చించుకుంటున్నారు.

ఎన్టీఆర్‌ మరియు రామ్‌ చరణ్‌ వంటి ఇద్దరు స్టార్స్ ను రెండు గంటలు రెండుపావు గంటల్లో చూపించడం అంటే చాలా కష్టం. ఇద్దరు కూడా పవర్ ప్యాక్‌ నటనతో ఆకట్టుకుంటారని మొదటి నుండి అంతా నమ్ముతున్నారు. సెన్సార్ బోర్డు ఈ సినిమా కు యూ/ఎ సర్టిఫికెట్‌ ఇచ్చినట్లుగా తెలుస్తోంది. సినిమా లో యుద్ద సన్నివేశాలు ఉండటం వల్ల యూ/ ఏ వచ్చిందట. సినిమాలో ఉన్న కంటెంట్‌ ప్రేక్షకులను మంత్ర ముగ్దులను చేస్తుందనే నమ్మకంను యూనిట్‌ సభ్యులు వ్యక్తం చేస్తున్నారు. సెన్సార్ బోర్డు సభ్యులు ఈ సినిమాను స్క్రీనింగ్‌ చేసిన తర్వాత మరో బాహుబలి అన్నట్లుగా కామెంట్స్ చేశారట. మొత్తానికి ఈ సినిమా మూడు గంటల వినోదం కోసం ఇంకా నెలన్నర రోజులు వెయిట్‌ చేయాల్సిందే.