అఖండ 2: ఈ డేట్ వెనుక అసలు కారణమిదే..

గత వారం రావాల్సిన 'అఖండ 2' విడుదల ఆగిపోవడంతో నందమూరి అభిమానులు ఎంత నిరాశకు గురయ్యారో అందరికీ తెలిసిందే. సరిగ్గా ప్రీమియర్స్ పడాల్సిన టైమ్ లో బ్రేక్ పడటంతో ఆ హైప్ మొత్తం ఒక్కసారిగా చల్లబడినట్లయింది. అయితే ఇప్పుడు సమస్యలు ఓ కొలిక్కి రావడంతో మేకర్స్ మాత్రం ఎక్కువ గ్యాప్ తీసుకోకుండా, వారం తిరక్కముందే డిసెంబర్ సినిమాను ప్రేక్షకుక ముందుకు తీసుకురావాలని నిర్ణయించుకోవడం ఇప్పుడు ఆసక్తికరంగా మారింది.

ఇది నిజంగా డ్యామేజ్ కంట్రోల్ కు సరైన నిర్ణయం అని చెప్పవచ్చు. నిజానికి లీగల్ ఇష్యూస్ క్లియర్ అయ్యాక, సినిమాను క్రిస్మస్ రేసులో నిలపాలని నిర్మాతలు భావించారట. కానీ అప్పటికి ఇంకా చాలా రోజులు సమయం ఉండటంతో, సినిమాపై ఉన్న క్రేజ్ తగ్గే ప్రమాదం ఉందని డిస్ట్రిబ్యూటర్లు భయపడ్డారు. 'ఆలస్యం అమృతం విషం' అన్నట్లు, ఇప్పటికే పీక్స్ లో ఉన్న అంచనాలను మరో 20 రోజులు మెయింటైన్ చేయడం కష్టమని భావించారు. అందుకే వేడిగా ఉన్నప్పుడే పని కానిచ్చేయాలని ఫిక్స్ అయ్యారు.

ఫైనల్ గా డిసెంబర్ 12న రిలీజ్ చేయాలని ఆలోచిస్తున్నట్లు తెలుస్తోంది. దీనికి తోడు అభిమానుల నుంచి వచ్చిన ఒత్తిడి కూడా ఈ నిర్ణయంలో కీలక పాత్ర పోషించింది. డిసెంబర్ 12నే సినిమా కావాలని సోషల్ మీడియాలో వారు చేసిన హడావిడి, ట్రెండింగ్ చూసి నిర్మాతలు వెనక్కి తగ్గక తప్పలేదు. ఫ్యాన్స్ ఎమోషన్ ను, వారి అగ్రెషన్ ను గౌరవించి రిస్క్ అయినా సరే ఏర్పాట్లు చకచకా పూర్తి చేస్తున్నారు.

వారం రోజులు ఆలస్యమైనా, ఇది ఇంకా మంచిదే అని విశ్లేషకులు అంటున్నారు. ఎందుకంటే ప్రేక్షకుల దృష్టి ఇంకా ఈ సినిమా మీదే ఉంది. ప్రమోషన్స్ ఊపు ఇంకా తగ్గలేదు. ఇప్పుడు మళ్ళీ కొత్తగా పబ్లిసిటీ మొదలుపెట్టాల్సిన అవసరం లేదు. ఉన్న బజ్ ను అలాగే కంటిన్యూ చేస్తూ థియేటర్లలోకి దిగితే ఓపెనింగ్స్ కు ఢోకా ఉండదు. అయితే వారం రోజులు ఆగడం వల్ల వడ్డీల రూపంలో నిర్మాతలకు డిస్ట్రిబ్యూటర్లకు కొంత నష్టం వాటిల్లడం సహజం.

ఆ నష్టాన్ని కవర్ చేయాలంటే సినిమాకు ఓపెనింగ్స్ భారీగా రావాలి. ఫ్యాన్స్ పంతం నెగ్గింది కాబట్టి, వారు బాధ్యతగా థియేటర్లకు క్యూ కడతారనడంలో సందేహం లేదు. చివరగా డేట్, టైమ్ అన్నీ బాగానే సెట్ అయ్యాయి కానీ.. అసలు విషయం కంటెంట్ లోనే ఉంది. ఇన్ని మలుపులు తిరిగాక వస్తున్న ఈ సినిమాకు 'పాజిటివ్ టాక్' రావడం చాలా ముఖ్యం. టాక్ గనక ఏమాత్రం తేడా కొట్టినా ఈ కష్టమంతా వృథా అవుతుంది. అదే బొమ్మ అదిరిపోయిందని టాక్ వస్తే మాత్రం, ఈ వారం రోజుల లేట్ ని ఎవరూ గుర్తుపెట్టుకోరు. బాక్సాఫీస్ దగ్గర వసూళ్ల జాతర జరగడం ఖాయం.