మాజీ ఓనర్ గోయెంక గూబగుయ్యిమనేలా ‘హ్యాండ్’ ఇచ్చిన కేఎల్ రాహుల్.. వీడియో

గత ఐపీఎల్ సీజన్ లో లక్నో కెప్టెన్ గా ఉన్న కేఏల్ రాహుల్ ను మైదానంలో అందరూ చూస్తుండగా అవమానించాడు ఆ ఫ్రాంచైజీ ఓనర్ సంజీవ్ గోయెంకా.. దీంతో కేఎల్ రాహుల్ గత ఐపీఎల్ వేలంలో లక్నో ఫ్రాంచైజీని వదిలేశాడు. వేలంలో ఢిల్లీ క్యాపిటల్స్ లో చేరాడు. అయితే తాజాగా ఇండియన్ ప్రీమియర్ లీగ్ (ఐపీఎల్)లో ఢిల్లీ క్యాపిటల్స్ వర్సెస్ లక్నో సూపర్ జెయింట్స్ మధ్య జరిగిన మ్యాచ్ లో కసిగా ఆడిన కేఎల్ రాహుల్ .. లక్నోను వారి సొంత గడ్డపై ఓడించాడు. ఈ మ్యాచ్ అనంతరం లక్నో యజమాని సంజీవ్ గోయెంకా, ఢిల్లీ ఆటగాడు కేఎల్ రాహుల్ మధ్య జరిగిన హ్యాండ్‌షేక్ ఇప్పుడు వార్తల్లోకెక్కింది. దీనిని 'కోల్డ్ హ్యాండ్‌షేక్'గా అభివర్ణిస్తూ వీడియోలు సోషల్ మీడియాలో వైరల్ అవుతున్నాయి. గతేడాది రాహుల్ లక్నో కెప్టెన్‌గా ఉన్నప్పుడు, ఒక మ్యాచ్ ఓటమి అనంతరం గోయెంకా మైదానంలోనే రాహుల్‌తో ఆగ్రహంగా మాట్లాడటం చూశాం. ఇది రాహుల్‌కు అవమానకరంగా అనిపించిందని చాలా మంది భావించారు. ఈ సంఘటనే రాహుల్ లక్నోను వీడి ఈ ఏడాది ఢిల్లీ క్యాపిటల్స్‌లో చేరడానికి కారణమని కూడా విశ్లేషకులు అభిప్రాయపడుతున్నారు.

నిన్న రాత్రి లక్నోపై ఢిల్లీ విజయంలో రాహుల్ కీలక పాత్ర పోషించాడు. అతను అజేయంగా 57 పరుగులు చేశాడు. మ్యాచ్ అనంతరం ఆటగాళ్లు కరచాలనం చేసుకుంటున్న సమయంలో, గోయెంకా కూడా రాహుల్‌ను పలకరించడానికి వచ్చాడు. అయితే, రాహుల్ గోయెంకా వైపు సరిగా చూడకుండానే హడావిడిగా కరచాలనం చేసి ముందుకు వెళ్లిపోయాడు. గోయెంకా ఏదో చెప్పడానికి ప్రయత్నించినా, రాహుల్ పట్టించుకోకుండా వెళ్ళిపోవడం వీడియోలో స్పష్టంగా కనిపించింది. ఈ దృశ్యమే ప్రస్తుతం 'కోల్డ్ హ్యాండ్‌షేక్' పేరుతో ట్రెండింగ్‌లో ఉంది.

గతంలో రాహుల్ లక్నో నుండి వెళ్లిపోయినప్పుడు, సంజీవ్ గోయెంకా ఒక ఇంటర్వ్యూలో రాహుల్ తన కుటుంబ సభ్యుడితో సమానమని, తన శుభాకాంక్షలు ఎప్పుడూ ఉంటాయని పేర్కొన్నారు. "కేఎల్ రాహుల్ నాకు ఎప్పుడూ కుటుంబమే, అలాగే ఉంటాడు. అతను మూడు సంవత్సరాలు లక్నోకు కెప్టెన్‌గా వ్యవహరించి మంచి ఫలితాలు అందించాడు. అతను చాలా నిజాయితీపరుడు, అలాంటి నిజాయితీపరుడికి అంతా మంచే జరగాలని నేను కోరుకుంటున్నాను. అతను చాలా ప్రతిభావంతుడు, తన ప్రతిభను ప్రపంచానికి చూపించాలని ఆశిస్తున్నాను. అతను ఖచ్చితంగా బాగా రాణిస్తాడని నేను నమ్ముతున్నాను. ఏం జరిగినా నేను అతనికి మనస్ఫూర్తిగా మంచి జరగాలని కోరుకుంటాను" అని గోయెంకా అప్పట్లో అన్నారు.

మరోవైపు, లక్నోను వీడటంపై రాహుల్ అధికారిక కారణం చెప్పనప్పటికీ, ఇటీవల ఒక ఇంటర్వ్యూలో తాను మరింత స్వేచ్ఛతో ఆడాలని.. ప్రశాంతమైన డ్రెస్సింగ్ రూమ్ వాతావరణంలో ఉండాలని కోరుకున్నట్లు పేర్కొన్నాడు. ఈ వ్యాఖ్యలు రాహుల్ లక్నో జట్టు , యజమాని నుండి వచ్చే ఒత్తిడిని ఉద్దేశించి చేశారని చాలా మంది భావించారు.

ప్రస్తుతం రాహుల్ ఢిల్లీ క్యాపిటల్స్‌లో ప్రశాంతమైన వాతావరణంలో ఉండగా, లక్నో ప్రస్తుత కెప్టెన్ రిషబ్ పంత్ మాత్రం ఒత్తిడిని ఎదుర్కొంటున్నట్లు కనిపిస్తోంది. నిన్నటి మ్యాచ్‌లో ఎప్పుడూ సరదాగా కనిపించే పంత్ నిరాశగా కనిపించాడు. బ్యాటింగ్ ఆర్డర్‌లో ముందుగా రాకుండా ఆలస్యంగా వచ్చాడు. డగౌట్‌లో జహీర్ ఖాన్‌పై అసహనం వ్యక్తం చేశాడు. అవుటైన తర్వాత కూడా అతను కోపం కోల్పోయాడు. మైదానంలో కూడా సహచరులపై ఆగ్రహం చూపించాడు. సాధారణంగా ఇలా ఉండని పంత్, జట్టు యజమాని నుండి వస్తున్న ఒత్తిడి కారణంగానే ఇలా ప్రవర్తిస్తున్నాడని చాలా మంది భావిస్తున్నారు.

ఇదిలా ఉండగా నిన్నటి మ్యాచ్‌లోనే కేఎల్ రాహుల్ ఇండియన్ ప్రీమియర్ లీగ్‌లో వేగంగా 5000 పరుగులు పూర్తి చేసిన ఆటగాడిగా రికార్డు సృష్టించాడు. రాహుల్ 130 ఇన్నింగ్స్‌లలో ఈ మైలురాయిని చేరుకుని, డేవిడ్ వార్నర్ (135), విరాట్ కోహ్లీ (157), ఏబీ డివిలియర్స్ (161), శిఖర్ ధావన్ (168) వంటి దిగ్గజాలను అధిగమించాడు. తన అద్భుత ఫామ్.. నిన్నటి మ్యాచ్ విజయంతో రాహుల్ తనపై ఉన్న విమర్శలకు, ముఖ్యంగా లక్నో నుండి నిష్క్రమించడంపై వచ్చిన వాటికి బ్యాట్‌తోనే సమాధానం చెప్పాడని అతని అభిమానులు ఆనందం వ్యక్తం చేస్తున్నారు. సంజీవ్ గోయెంకాతో జరిగిన కోల్డ్ హ్యాండ్‌షేక్ ఈ మొత్తం వ్యవహారానికి మరింత ఆజ్యం పోసింది.