అమెరికాలోని ఎన్నారైలకు బిగ్ షాక్!

అమెరికాలో నివసిస్తున్న విదేశీ పౌరులు, ముఖ్యంగా భారతీయ ఎన్నారైలు తమ స్వదేశాలకు డబ్బు పంపడంపై త్వరలో భారీ పన్ను భారం పడనుంది. పౌరసత్వం లేనివారు విదేశాలకు పంపే ప్రతి డాలర్‌పై 5 శాతం పన్ను విధించేందుకు ఉద్దేశించిన ఒక కొత్త బిల్లును అమెరికా ప్రతినిధుల సభలో ప్రవేశపెట్టారు. ఈ బిల్లు చట్టరూపం దాల్చితే, హెచ్-1బీ వీసా హోల్డర్లు, గ్రీన్ కార్డ్ హోల్డర్లు సహా అమెరికా పౌరసత్వం లేని ప్రతి ఒక్కరూ ఈ పన్ను పరిధిలోకి వస్తారు.

"ది వన్ బిగ్ బ్యూటిఫుల్ బిల్" అని అనధికారికంగా పిలవబడుతున్న ఈ బిల్లులో విదేశాలకు పంపే డబ్బు బదిలీలపై 5 శాతం పన్ను విధింపునకు సంబంధించిన నిబంధనలు పొందుపరిచారు. ఈ పన్నుకు ఎలాంటి కనీస పరిమితి లేకపోవడం గమనార్హం. అంటే, ఎంత తక్కువ మొత్తం పంపినా 5 శాతం పన్ను చెల్లించక తప్పదు. ధృవీకరించబడిన అమెరికా పౌరులు లేదా జాతీయులకు మాత్రమే ఈ పన్ను నుండి మినహాయింపు ఉంటుంది.

ఈ ప్రతిపాదన వెనుక డొనాల్డ్ ట్రంప్, రిపబ్లికన్ల మద్దతు ఉన్నట్లు తెలుస్తోంది. గతంలో ట్రంప్ మెక్సికో సరిహద్దు గోడ నిర్మాణానికి నిధులు సమకూర్చడానికి ఇలాంటి పన్నును ప్రతిపాదించారు. ఇప్పుడు, పన్ను తగ్గింపులు , సరిహద్దు భద్రతా ప్రాజెక్టులకు నిధులు సమకూర్చే విస్తృత బిల్లులో భాగంగా దీనిని తిరిగి తెరపైకి తెచ్చారు.

ఈ బిల్లు చట్టమైతే అమెరికాలో పనిచేస్తూ తమ కుటుంబాలకు, బంధువులకు డబ్బు పంపే సుమారు 45 లక్షల మంది భారతీయ ఎన్నారైలపై తీవ్ర ప్రభావం పడుతుంది. రిజర్వ్ బ్యాంక్ ఆఫ్ ఇండియా గణాంకాల ప్రకారం, 2023-24 ఆర్థిక సంవత్సరంలో భారతదేశానికి అందిన మొత్తం విదేశీ చెల్లింపులలో అమెరికా నుంచే సుమారు 32 బిలియన్ డాలర్లు వచ్చాయి. ఈ కొత్త పన్నుతో భారతీయ ప్రవాసులు ఏటా సుమారు 1.6 బిలియన్ డాలర్ల అదనపు భారం మోయాల్సి వస్తుందని అంచనా వేస్తున్నారు.

సాధారణంగా ఎన్నారైలు పంపే డబ్బు భారతదేశంలోని కుటుంబాల విద్య, వైద్య ఖర్చులు, దైనందిన అవసరాలు , పెట్టుబడులకు ఉపయోగపడుతుంది. ఈ 5 శాతం పన్ను వారి కష్టార్జితంపై అదనపు భారాన్ని మోపడమే కాకుండా, భారతదేశానికి వచ్చే విదేశీ మారక ద్రవ్యంపైనా ప్రభావం చూపే అవకాశం ఉంది.

ప్రతినిధుల సభలో ఈ బిల్లుపై త్వరలోనే ఓటింగ్ జరిగే అవకాశం ఉంది. ఆమోదం పొందితే, జూన్ లేదా జూలై 2025 నాటికి ఇది చట్టంగా మారే అవకాశం ఉందని నిపుణులు భావిస్తున్నారు. ఈ పరిణామం అమెరికాలోని భారతీయ సమాజంలో ఆందోళన కలిగిస్తోంది. తమ ఆర్థిక ప్రణాళికలను పునః పరిశీలించుకోవాల్సిన పరిస్థితి ఎన్నారైలకు ఏర్పడింది. విదేశాలకు డబ్బు పంపేవారు, ముఖ్యంగా పెద్ద మొత్తంలో పంపేవారు, చట్టం అమల్లోకి రాకముందే తమ లావాదేవీలను పూర్తి చేసుకోవడం గురించి ఆలోచిస్తున్నారు. ఈ బిల్లు భవిష్యత్తులో ఎన్నారైల ఆర్థిక స్వాతంత్ర్యంపై, అలాగే భారతదేశ ఆర్థిక వ్యవస్థపై ఎలాంటి ప్రభావం చూపుతుందో వేచి చూడాలి.