డొనాల్డ్ ట్రంప్ నిర్ణయం.. భారతీయ వలస కుటుంబాలకు తీవ్ర ఆర్థిక భారం

అమెరికా అధ్యక్షుడు డొనాల్డ్ ట్రంప్ ఇటీవల తీసుకున్న నిర్ణయం భారతీయ వలస కుటుంబాలకు పెద్ద షాక్. భారతదేశం నుంచి దిగుమతి అయ్యే బంగారం , ప్లాటినం ఆభరణాలపై 57% దిగుమతి సుంకం విధించారు. ఈ కొత్త పాలసీ, వ్యక్తిగతంగా ఆభరణాలను తీసుకువచ్చినా లేదా అమెరికాలో ప్రదర్శనల నుండి కొనుగోలు చేసినా వర్తిస్తుంది. ఇది అమెరికాలో స్థిరపడిన భారతీయుల జేబులపై తీవ్ర ప్రభావం చూపనుంది.

- ధరల్లో పెరుగుదల

ఈ కొత్త సుంకం వల్ల ధరలు ఎలా పెరుగుతాయో ఒక ఉదాహరణతో చూద్దాం. ఒక నెక్లెస్ ధర సాధారణంగా $20,000 (సుమారు రూ. 16.5 లక్షలు) ఉంటే, ఇప్పుడు దానిపై అదనంగా 57% సుంకం కట్టాలి. అంటే, నెక్లెస్ ధర $31,400 (సుమారు రూ. 26 లక్షలు) అవుతుంది. ఇది మధ్యతరగతి కుటుంబాలకు భారీ భారం. ముఖ్యంగా పెళ్లిళ్లు, పండుగలు మరియు సంప్రదాయ పెట్టుబడుల కోసం ఆభరణాలు కొనుగోలు చేసేవారికి ఇది పెద్ద ఇబ్బంది.

-వ్యాపార రంగంపై ప్రభావం

ఈ నిర్ణయం కేవలం కొనుగోలుదారులకే కాకుండా, వ్యాపారులకు కూడా నష్టాలను తెచ్చిపెడుతుంది. ప్రతి సంవత్సరం $2 బిలియన్ల విలువైన భారత బంగారు ఆభరణాల వాణిజ్యంపై ఇది తీవ్ర ప్రభావం చూపుతుంది. అమెరికాలో ఉన్న చిన్న వ్యాపార జ్యువెలర్స్ , భారతీయ వలస వ్యాపారులు దీని వల్ల ఎక్కువగా నష్టపోతారు.

- ప్రస్తుత పరిస్థితుల్లో ఏం చేయాలి?

ఈ కొత్త నిబంధనల నేపథ్యంలో పరిశ్రమ నిపుణులు కొన్ని సూచనలు ఇస్తున్నారు. మీరు విదేశీ ప్రయాణం చేసే ముందు ఆభరణాలపై ఉన్న కస్టమ్స్ నిబంధనలను పూర్తి వివరాలు తెలుసుకోండి. అమెరికాలోని జ్యువెలరీ దుకాణాల్లో కొనుగోలు చేసేటప్పుడు, మీరు చెల్లించే ధరలో సుంకం కలిసి ఉందా లేదా అని అడగండి. ప్రస్తుతానికి పెద్ద మొత్తంలో ఆభరణాలు కొనుగోలు చేయడాన్ని వాయిదా వేసుకోవడం మంచిది.

ట్రంప్ తీసుకున్న ఈ నిర్ణయం వల్ల ఇప్పుడు ఆభరణాల ఖరీదు కేవలం బంగారం ధరపైనే కాకుండా, కొత్తగా విధించిన 57% సుంకంపై కూడా ఆధారపడి ఉంటుంది. ఈ పరిణామాలు వలస భారతీయుల ఆర్థిక ప్రణాళికలపై దీర్ఘకాలిక ప్రభావం చూపనున్నాయి.