అమెరికాలో హెచ్-1బీ వీసా మోసం: తెలుగు వ్యక్తికి జైలు శిక్ష, భారీ జరిమానా!

అమెరికా వీసా నిబంధనలు కఠినతరం అవుతున్న నేపథ్యంలో ముఖ్యంగా డొనాల్డ్ ట్రంప్ హయాంలో నిశిత పర్యవేక్షణ పెరిగింది. ఈ క్రమంలోనే హెచ్-1బీ వీసాలకు సంబంధించి జరిగిన ఓ పెద్ద మోసం వెలుగులోకి వచ్చింది. ఈ మోసంలో అమెరికాలో నివసిస్తున్న ఓ తెలుగు వ్యక్తి దోషిగా తేలారు.

నానోసెమాంటిక్స్ అనే సంస్థ సహ వ్యవస్థాపకుడైన దత్తాపురం కిషోర్ ఈ హెచ్-1బీ వీసా మోసానికి పాల్పడినట్లు నిర్ధారణ అయింది. ఉద్యోగాలు అందుబాటులో లేనప్పటికీ, వీసాలు పొందే ఉద్దేశంతో తప్పుడు దరఖాస్తులను సమర్పించినట్లు విచారణలో తేలింది. ఈ కేసులో దత్తాపురం కిషోర్‌తో పాటు మరో ఇద్దరు భారతీయులు - కుమార్ అసపతి (55), సంతోష్ గిరి (48)లపైనా ఆరోపణలు ఉన్నాయి.

గతేడాది నవంబర్‌లో ఈ కేసు బయటపడగా, తాజాగా కోర్టు తుది తీర్పు వెలువరించింది. దత్తాపురం కిషోర్‌కు 14 నెలల జైలు శిక్ష విధించింది. జైలు శిక్షతో పాటు, నిబంధనలు ఉల్లంఘించినందుకు గానూ 1.25 లక్షల డాలర్లు, ఇతర కారణాల కింద 7,500 డాలర్లు, ప్రత్యేక రుసుము కింద 1,100 డాలర్లు సహా మొత్తం 1.33 లక్షల డాలర్లు (భారత కరెన్సీలో దాదాపు రూ. 1.1 కోటి) జరిమానా విధించింది.

అక్రమ మార్గాల్లో వీసాలు పొందడానికి ప్రయత్నించినట్లుగా దత్తాపురం కిషోర్‌పై వచ్చిన అభియోగాలను దర్యాప్తులో నిజమని తేలింది. గత ఏడాదే కిషోర్ తన నేరాన్ని అంగీకరించగా, తాజాగా శిక్ష ఖరారైంది. జైలు నుంచి విడుదలైన తర్వాత కూడా దత్తాపురం కిషోర్ మూడేళ్ల పాటు పర్యవేక్షణలో ఉంటారని అధికారులు తెలిపారు.

కాలిఫోర్నియాకు చెందిన 55 ఏళ్ల దత్తాపురం కిషోర్, బే ఏరియాలోని టెక్ కంపెనీలకు నానోసెమాంటిక్స్ ద్వారా నైపుణ్యం కలిగిన ఉద్యోగులను అందించేవాడు మరియు కమీషన్ పొందేవాడు. ఈ క్రమంలోనే, 2019లో ఉద్యోగాలు లేనప్పటికీ వీసాలు పొందే ప్రయత్నాలు చేసినట్లు ఆరోపణలు వచ్చాయి. ఈ వ్యవహారం బయటపడటంతో, హెచ్-1బీ వీసాల్లో అక్రమాలకు పాల్పడుతున్నారని గుర్తించిన అధికారులు, దత్తాపురం కిషోర్‌తో పాటు మరో ఇద్దరిపై వీసా మోసం, కుట్ర కేసులు నమోదు చేశారు.

అమెరికాలో హెచ్-1బీ వీసా పొందాలంటే, సంస్థ యజమాని తప్పనిసరిగా యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS)కు ఫారం I-129 పిటిషన్‌ను సమర్పించాలి. దీంతో పాటు ఉద్యోగం లభ్యత, వ్యవధి, వేతనం వంటి ముఖ్య వివరాలను కూడా వెల్లడించాలి. ఈ కేసులో, దత్తాపురం కిషోర్, కుమార్ అసపతి, సంతోష్ గిరి కలిసి సమర్పించిన నకిలీ హెచ్-1బీ దరఖాస్తుల్లో ఉద్యోగాలు ఉన్నాయని తప్పుగా చూపించినట్లు ఆరోపణలు రుజువయ్యాయి.