Begin typing your search above and press return to search.

పాక్‌కు చెమటలు పట్టించిందిలా.. భారత వాయుసేన వీడియో వైరల్

1971 యుద్ధం నుండి ఇటీవల జరిగిన ఆపరేషన్‌ సిందూర్‌ వరకు, ప్రతి సందర్భంలోనూ పాక్‌ పరువు తీసి భారత్‌ తన సాహసాన్ని చాటుకున్న తీరును ఈ వీడియోలో కళ్లకు కట్టినట్లు చూపించారు.

By:  A.N.Kumar   |   11 Aug 2025 5:45 PM IST
పాక్‌కు చెమటలు పట్టించిందిలా.. భారత వాయుసేన వీడియో వైరల్
X

భారత వాయుసేన విడుదల చేసిన ఒక శక్తివంతమైన వీడియో ఇప్పుడు దేశవ్యాప్తంగా చర్చనీయాంశంగా మారింది. భారత సైన్యం, ముఖ్యంగా వాయుసేన పాకిస్థాన్‌కు ఎప్పటికప్పుడు గట్టి బుద్ధి చెప్పిన వీరోచిత గాధలను ఈ 6 నిమిషాల వీడియోలో చూపించారు. 1971 యుద్ధం నుండి ఇటీవల జరిగిన ఆపరేషన్‌ సిందూర్‌ వరకు, ప్రతి సందర్భంలోనూ పాక్‌ పరువు తీసి భారత్‌ తన సాహసాన్ని చాటుకున్న తీరును ఈ వీడియోలో కళ్లకు కట్టినట్లు చూపించారు.

ఈ వీడియోలో 1971 యుద్ధంలో పాక్‌పై భారత్‌ సాధించిన ఘనవిజయం, కార్గిల్‌ యుద్ధంలో మన వాయుసేన పోషించిన కీలక పాత్ర, 2019 పుల్వామా దాడికి ప్రతీకారంగా చేసిన మెరుపు దాడుల దృశ్యాలను పొందుపరిచారు. ఇవే కాకుండా ఇటీవల జమ్మూ కశ్మీర్‌లోని పహల్గాంలో ఉగ్రదాడికి ప్రతీకారంగా భారత్‌ చేపట్టిన ఆపరేషన్‌ సిందూర్‌ తాలూకు దృశ్యాలను కూడా ఈ వీడియోలో చూపిస్తారు.

"ఆకాశంలో చీకటి కమ్మినప్పుడు... భూమి లేదా సముద్రం నుంచి ముప్పు వచ్చినప్పుడు... ఒక శక్తి నిర్భయంగా ఎదిరిస్తుంది. అదే భారత వాయుసేన" అంటూ వీడియోలో వినిపించిన వాయిస్‌ఓవర్‌ దేశభక్తిని రేకెత్తిస్తుంది. పహల్గాం దాడి అనంతరం ప్రధాని నరేంద్ర మోదీ అధ్యక్షతన జరిగిన ఉన్నత స్థాయి సమావేశాలు, ఆ తర్వాత ఆపరేషన్‌ సిందూర్‌ ప్రారంభమైన క్షణాలను వీడియోలో చూపించారు. పాకిస్థాన్‌, పాక్ ఆక్రమిత కశ్మీర్‌లోని (PoK) జైషే మహ్మద్, లష్కరే తయిబా ఉగ్రవాద శిబిరాలపై మన యుద్ధ విమానాలు ఎలా విరుచుకుపడ్డాయో కూడా ఈ వీడియోలో చూపిస్తారు.

ఆపరేషన్‌ సిందూర్‌ గురించి ఎయిర్‌ చీఫ్ మార్షల్‌ ఏపీ సింగ్ మాట్లాడుతూ, మే 7న జరిగిన ఈ దాడుల్లో 100 మందికి పైగా ఉగ్రవాదులు హతమయ్యారని తెలిపారు. ఈ దాడుల్లో పాకిస్థాన్‌కు చెందిన ఐదు యుద్ధ విమానాలు, ఒక పెద్ద విమానాన్ని కూడా మన వాయుసేన కూల్చివేసినట్లు ఆయన వెల్లడించారు. ఈ వీడియో ఇప్పుడు దేశ ప్రజల్లో గర్వాన్ని నింపుతోంది. నెటిజన్లు సోషల్ మీడియాలో “మన వాయుసేన పరాక్రమం గర్వకారణం”, “పాక్‌కు ఎప్పటికప్పుడు పాఠం చెప్పే భారత్‌ జై” అంటూ ప్రశంసల వర్షం కురిపిస్తున్నారు. ఇది కేవలం వీడియో మాత్రమే కాదు, దేశ రక్షణ కోసం మన సైనికులు చేస్తున్న పోరాటాలకు నిలువుటద్దం. మన సైనికుల త్యాగాలను, ధైర్యసాహసాలను గుర్తుచేసుకుంటూ, వారిని అభినందించడం మనందరి బాధ్యత.