జైలు నుంచే లేపేసే ప్లాన్.. ఖేమ్కా హత్య కేసులో సంచలన నిజాలివీ

బీహార్‌ను కుదిపేసిన ప్రముఖ వ్యాపారవేత్త గోపాల్ ఖేమ్కా హత్య కేసులో షాకింగ్ విషయాలు వెలుగులోకి వస్తున్నాయి. ఎన్నికలు సమీపిస్తున్న వేళ రాష్ట్ర రాజకీయాల్లో హాట్ టాపిక్‌గా మారిన ఈ ఘటన వెనుక ఉన్న కుట్రలు ఒక్కొక్కటిగా బయటపడుతున్నాయి. ముఖ్యంగా, ఈ హత్య జైలు నుంచే పన్నబడిందనే విషయం ఇప్పుడు సంచలనంగా మారింది.

ఎన్‌కౌంటర్‌లో నిందితుడి మృతి

ఈ కేసులో కీలక నిందితుడిగా భావించిన వికాస్ అలియాస్ రాజా, పాట్నాలో పోలీసుల గాలింపు చర్యల మధ్య ఎదురుకాల్పుల్లో మృతి చెందాడు. ఆయుధ సరఫరా, అక్రమ ఆయుధాల తయారీతో సంబంధాలున్న వికాస్‌పై పోలీసులకు పలు ఆధారాలు లభించాయి. అతడిని పట్టుకునే ప్రయత్నంలో పాట్నాలో సోదాలు జరుపుతున్న సమయంలో కాల్పులు జరపగా, ప్రతిస్పందనగా జరిగిన కాల్పుల్లో మృతి చెందినట్లు పోలీసులు వెల్లడించారు.

హత్యకు మూలకారణం: వ్యాపార వాదాలేనా?

దర్యాప్తులో బహిర్గతమైన అంశాల ప్రకారం, గోపాల్ ఖేమ్కా హత్య వెనుక వ్యాపార పరమైన విభేదాలు ఉండొచ్చని అనుమానాలు వ్యక్తమవుతున్నాయి. అశోక్ కుమార్ సాఫ్ అనే మరో వ్యాపారవేత్త ఈ హత్యకు ప్రధాన సూత్రధారి అని పోలీసులు గుర్తించారు. అతను సుపారీ గ్యాంగ్‌కు రూ. 3.5 లక్షలు చెల్లించినట్లు తెలుస్తోంది.

-మరోసారి బైక్‌పై కాల్పులే

పాట్నాలోని ప్రముఖ మగధ హాస్పిటల్ యజమాని అయిన గోపాల్ ఖేమ్కాను గాంధీ మైదాన్ పోలీస్ స్టేషన్ పరిధిలోని ఓ హోటల్ సమీపంలో బైక్‌పై వచ్చిన వ్యక్తులు అతి సమీపం నుంచి కాల్చిచంపారు. ఈ ఘటన 2018లో జరిగిన ఆయన కుమారుడు గుంజన్ ఖేమ్కా హత్యను గుర్తుకు తెస్తోంది. ఆ హత్య కూడా ఇదే తరహాలో జరగడం, ఆ కేసు నిందితులు ఇంకా పట్టుబడకపోవడం పోలీసుల వైఫల్యాన్ని ఎత్తిచూపుతోంది.

జైలు నుంచే స్కెచ్

ఈ హత్యకు సంబంధించిన కీలక సమాచారాన్ని బీహార్ డీజీపీ వినయ్ కుమార్ వెల్లడించారు. పాట్నాలోని బీర్ సెంట్రల్ జైలు నుంచే ఈ హత్యకు స్కెచ్ వేసినట్లు తెలుస్తోంది. జైలులో ఉన్న నిందితులు బయట ఉన్న వారి సాయంతో ఈ ప్లాన్‌ను అమలు చేసినట్లు సమాచారం. ఇప్పటికే జైలు నుంచి మొబైల్ ఫోన్లు, సిమ్ కార్డులు స్వాధీనం చేసుకున్నట్లు డీజీపీ తెలిపారు. ఈ విషయాలన్నింటినీ త్వరలోనే మీడియా ముందు అధికారికంగా వెల్లడిస్తామని చెప్పారు.

అరెస్టులు, రాజకీయ దుమారం

ఈ కేసులో ఉమేష్ యాదవ్ అనే షూటర్‌తో పాటు, అంత్యక్రియలకు హాజరైన రోషన్ కుమార్ అనే నిందితుడిని కూడా పోలీసులు అరెస్ట్ చేశారు. మరోవైపు, గోపాల్ ఖేమ్కాకు బీజేపీతో సన్నిహిత సంబంధాలున్న నేపథ్యంలో ఈ హత్య రాజకీయంగా కొత్త చర్చకు దారి తీసింది.

విపక్ష పార్టీలు ఈ హత్యను తీవ్రంగా విమర్శిస్తున్నాయి. కాంగ్రెస్ నేత రాహుల్ గాంధీ, “నీతీశ్ కుమార్ పాలనలో బీహార్ నేరాల రాజధానిగా మారింది” అంటూ తీవ్రంగా స్పందించారు. ఆర్జేడీ నేత తేజస్వి యాదవ్ కూడా వ్యాపారవేత్తలకు, ప్రజలకు రక్షణ లేకుండా పోయిందని విమర్శించారు.

ఎన్నికలు సమీపిస్తున్న వేళ, వ్యాపారవర్గాల్లో భయాందోళనలు పెరుగుతున్న తరుణంలో గోపాల్ ఖేమ్కా హత్య కేసు బీహార్ రాజకీయాల్లో పెనుదుమారం రేపింది. జైలు నుంచే పన్నిన కుట్రలు, ప్రణాళికాబద్ధమైన నేరాల తీరు బయటపడటం రాష్ట్రంలో నేరగాళ్ల వ్యవస్థపై తీవ్ర ప్రశ్నలు రేపుతున్నాయి. విచారణను వేగవంతం చేసి, న్యాయం జరగాలని ప్రజలు ఆశిస్తున్నారు.