చట్టం vs మానవత్వం....బ్రెయిన్‌డెడ్‌ తల్లి.. కడుపులోని బిడ్డ కోసం కుటుంబం పోరాటం

అమెరికాలోని జార్జియాలో ఒక హృదయ విదారకమైన సంఘటన చోటుచేసుకుంది. గర్భం దాల్చిన ఒక యువతి తీవ్ర అనారోగ్యం కారణంగా బ్రెయిన్‌డెడ్‌కు గురైంది. అయితే, ఆమె కడుపులోని పిండాన్ని బతికించడానికి వైద్యులు ప్రయత్నిస్తున్నారు. ఇక్కడ విషాదం ఏమిటంటే..రాష్ట్రంలోని కఠినమైన అబార్షన్ చట్టాలు పిండాన్ని తొలగించడానికి అనుమతించకపోవడంతో, కుటుంబ సభ్యుల అభీష్టం లేకుండానే ఈ చికిత్స కొనసాగుతోంది. ఇది ఒకవైపు ప్రాణాపాయ స్థితిలో ఉన్న తల్లి, మరోవైపు పుట్టబోయే బిడ్డ భవిష్యత్తు గురించి ఆందోళన చెందుతున్న కుటుంబ సభ్యుల మధ్య ఒక సంక్లిష్టమైన పరిస్థితిని సృష్టించింది.

జార్జియాలోని అట్లాంటాకు చెందిన ఆడ్రియానా స్మిత్ ఒక నర్సు. ఆమె ఎమోరీ యూనివర్సిటీ హాస్పిటల్‌లో పనిచేస్తున్నారు. ఫిబ్రవరిలో ఆమె తొమ్మిది వారాల గర్భవతిగా ఉన్న సమయంలో తీవ్రమైన తలనొప్పితో బాధపడ్డారు. వరుసగా తలనొప్పి రావడంతో ఆమె దగ్గర్లోని ఆసుపత్రికి వెళ్లి వైద్యులను సంప్రదించారని ఆమె తల్లి ఏప్రిల్ న్యూకిర్క్ తెలిపారు. వారు కొన్ని మందులు ఇచ్చారు. కానీ ఎలాంటి పరీక్షలు లేదా స్కానింగ్ చేయలేదు. ఒకవేళ వారు సరిగ్గా పరీక్షించి ఉంటే, సమస్య ఏమిటో తెలిసిపోయేది. కానీ ఆమె ఇంటికి వచ్చిన తర్వాత పరిస్థితి మరింత విషమించింది. దాంతో స్మిత్ పనిచేసే ఆసుపత్రికి తీసుకెళ్లారు. అక్కడ స్కానింగ్ చేయగా, ఆమె మెదడులో రక్తం గడ్డకట్టినట్లు గుర్తించారు. వైద్యులు ఆమె బ్రెయిన్‌డెడ్ అయిందని నిర్ధారించారు.

అప్పటినుంచి స్మిత్ కేవలం లైఫ్ సపోర్ట్ మీదనే ఉంది. జార్జియాలోని అబార్షన్ చట్టాల ప్రకారం.. పిండంలో హృదయ స్పందన ఉంటే గర్భస్రావానికి అనుమతి లేదు. దీనినే అక్కడ 'హార్ట్‌బీట్ లా' అని పిలుస్తారు. ఈ నిబంధన కారణంగా స్మిత్ విషయంలో ఆమె కుటుంబం ఎటువంటి నిర్ణయం తీసుకోలేని దుస్థితి ఏర్పడింది. ప్రస్తుతం ఆ గర్భస్థ శిశువు వయస్సు 21 వారాలు. "ఇదంతా నాకు చాలా బాధాకరంగా ఉంది. ఆసుపత్రిలో నా ఎదురుగా నా బిడ్డ ఉంది. కానీ ఆమె నిజంగా అక్కడ లేదు" అని ఆమె తల్లి విచారం వ్యక్తం చేశారు. ఆ శిశువు బయట ప్రపంచంలో జీవించడానికి తగినంత పరిణతి చెందే వరకు స్మిత్‌ను లైఫ్ సపోర్ట్ మీదనే కొనసాగించనున్నారు.

ఈ ఘటన అమెరికాలోని గర్భస్రావ చట్టాల సంక్లిష్టతను, దాని వలన వ్యక్తులు, కుటుంబాలు ఎదుర్కొంటున్న మానసిక వేదనను స్పష్టంగా తెలియజేస్తోంది. ఒకవైపు వైద్యులు పిండం ప్రాణాలను కాపాడటానికి ప్రయత్నిస్తుంటే, మరోవైపు కుటుంబ సభ్యులు తమ కుమార్తె పరిస్థితిని చూసి తీవ్రంగా కలత చెందుతున్నారు. ఈ పరిస్థితికి ఎప్పుడు ముగింపు వస్తుందో వేచి చూడాలి.