ఇజ్రాయెల్ శాస్త్రవేత్తలు కనిపెట్టిన మరో అద్భుతం

ఇటీవలి కాలంలో శ్వాస మీద ధ్యాస పెట్టడం ద్వారా శారీరక, మానసిక ఆరోగ్యాన్ని మెరుగుపర్చుకోవచ్చని అనేక మంది చెబుతున్నారు. అయితే ఇది కేవలం ఓ నమ్మకమా, లేక శాస్త్రీయంగా నిరూపితమైన విషయమా అనే సందేహం చాలా మందిలో ఉండేది. ఈ ప్రశ్నకు ఇప్పుడు స్పష్టమైన శాస్త్రీయ ఆధారం లభించింది. ఇజ్రాయెల్‌లోని ప్రముఖ వీజ్‌మన్ ఇన్‌స్టిట్యూట్ ఆఫ్ సైన్స్ కు చెందిన న్యూరో బయాలజీ ప్రొఫెసర్ నోమ్ సోబెల్‌ నేతృత్వంలోని బృందం నిర్వహించిన పరిశోధన ఈ అద్భుతమైన ఫలితాలను వెలుగులోకి తెచ్చింది. ఈ అధ్యయన ఫలితాలు ప్రఖ్యాత శాస్త్రీయ జర్నల్ ‘కరెంట్ బయాలజీ’ లో ఇటీవల ప్రచురితమయ్యాయి.

ప్రతి ఒక్కరికీ ప్రత్యేకమైన ‘శ్వాస ముద్ర’!

ఈ పరిశోధనలో భాగంగా 100 మందికి పైగా వ్యక్తుల శ్వాస తీరును 24 గంటల పాటు నిశితంగా పరిశీలించి, విశ్లేషించారు. ఇందుకోసం వారి ముక్కు వద్ద ప్రత్యేకమైన సెన్సార్ పరికరాలను అమర్చారు. వారు నిద్రలో ఉన్నా, మేల్కొని ఉన్నా, మాట్లాడుతున్నా, నడుస్తున్నా ఏ సమయంలోనైనా వారి శ్వాస తీరును నిరంతరం ట్రాక్ చేశారు. ఈ అధ్యయనం నుంచి వెలువడిన అత్యంత ఆశ్చర్యకరమైన ఫలితం ఏమిటంటే, ప్రతి ఒక్కరి శ్వాస తీరు ఇతరుల కంటే 96.8% వరకు ప్రత్యేకంగా ఉన్నట్టు తేలింది. అంటే, మన వేలిముద్రలే కాదు, మన శ్వాస ముద్ర కూడా ఎంతో ప్రత్యేకమైనదని ఈ అధ్యయనం స్పష్టం చేసింది. ఇది ఒకరిని మరొకరి నుండి వేరు చేసే ఒక విశిష్టమైన జీవ కారకం అని రుజువు చేసింది.

-శ్వాస తీరు ద్వారా వ్యాధులను పసిగట్టవచ్చు!

ఈ పరిశోధనలో మరింత కీలక అంశం ఏమిటంటే వ్యక్తుల శ్వాస తీరు ద్వారా వారి మానసిక స్థితి, ఆరోగ్య పరిస్థితులను కూడా అంచనా వేయవచ్చని శాస్త్రవేత్తలు గుర్తించారు. ఉదాహరణకు, వ్యాకులత (Anxiety)తో బాధపడేవారు తక్కువ గాలి పీల్చడం, శ్వాస తీసుకోవడంలో విరామాలు ఉండటం వంటి లక్షణాలను కనపర్చినట్టు గుర్తించారు.ఇంకా, నిద్రలో ఉన్నప్పుడు కూడా కొంతమంది శ్వాస తీరు మారుతుండగా, వ్యథ, ఆందోళనలో ఉన్నవారు మేల్కొని ఉన్నప్పుడు శ్వాసను బలవంతంగా తీసుకోవడం, తిరిగి శ్వాస తీసుకోవటానికి విరామం తీసుకోవడం వంటివి కనిపించాయి. ఈ లక్షణాల ఆధారంగా భవిష్యత్తులో మానసిక వ్యాధులను ముందుగానే గుర్తించవచ్చని శాస్త్రవేత్తలు అభిప్రాయపడుతున్నారు. ఇది డయాగ్నస్టిక్ రంగంలో ఒక విప్లవాత్మక మార్పుకు దారితీసే అవకాశం ఉంది.

-శ్వాస పద్ధతిని మార్చుకుంటే ఆరోగ్యం

ఈ పరిశోధన తెలియజేస్తున్న అత్యంత ముఖ్యమైన విషయం ఏమిటంటే మీరు తీసుకునే శ్వాస తీరును మార్చుకుంటే ఒత్తిడి, ఆందోళన వంటి సమస్యల నుండి విముక్తి పొందవచ్చని ప్రొఫెసర్ నోమ్ సోబెల్ అంటున్నారు. అంటే ధ్యానం, శ్వాసాభ్యాసం (ప్రాణాయామం) వంటి యోగ పద్ధతులు కేవలం ఆధ్యాత్మిక పద్ధతులు మాత్రమే కాదు, అవి శాస్త్రీయంగా కూడా ఆరోగ్యానికి మేలు చేస్తాయని ఈ అధ్యయనం మరోసారి నిరూపించింది. శ్వాసను నియంత్రించడం ద్వారా మన నాడీ వ్యవస్థపై, తద్వారా మానసిక స్థితిపై సానుకూల ప్రభావం చూపవచ్చని ఇది స్పష్టం చేసింది.

శ్వాస శక్తి – కేవలం నమ్మకం కాదు, శాస్త్రీయ సత్యం!

ఇప్పటివరకు మౌఖికంగా చెప్పుకొచ్చిన “శ్వాస మీద ధ్యాస” మహత్త్వం ఇప్పుడు శాస్త్ర విజ్ఞానంతో కూడా బలపడింది. ప్రతి ఒక్కరి శ్వాస ముద్ర ప్రత్యేకమని, దాన్ని అధ్యయనం చేయడం ద్వారా అనేక రుగ్మతలను ముందుగానే గుర్తించవచ్చని ఈ పరిశోధన తెలుపుతోంది. యోగ, ధ్యానం చేసే వారి ఆరోగ్య ప్రయోజనాలకు ఇది ఒక బలమైన శాస్త్రీయ మద్దతు.

శ్వాస మీద ధ్యాస పెడితే ఆయురారోగ్యాలు సమకూరుతాయనే మాట ఇక నుండి కేవలం నమ్మకం కాదు. అది ఒక తిరుగులేని శాస్త్రీయ సత్యం! ఈ పరిశోధన శ్వాస యొక్క అద్భుత శక్తిని ప్రపంచానికి మరోసారి చాటి చెప్పింది.