చిచ్చాతో విజ్జిపాప సెల్ఫీ..

అమెరికాలో ప్ర‌తీ రెండేళ్ల‌కు ఒక‌సారి జ‌రిగే నాట్స్ ఉత్స‌వాల‌కు టాలీవుడ్ నుంచి ప‌లువురు సెల‌బ్రిటీలు హాజ‌ర‌య్యారు. టంపాలో జ‌రిగిన నాట్స్ 8వ తెలుగు సంబ‌రాల్లో అల్లు అర్జున్, సుకుమార్, రాఘ‌వేంద్ర‌రావు, బాల‌కృష్ణ‌, శ్రీలీల హాజ‌ర‌య్యారు. ఎంతో ఘ‌నంగా జ‌రిగిన ఈ వేడుక‌ల్లో టాలీవుడ్ సెలబ్రిటీలు పాల్గొని ఆ వేడుక‌ల‌ను మ‌రింత ఘ‌నంగా జ‌రిగేలా చేశారు.

ఈ వేడుక‌లకు సంబంధించిన ఫోటోల‌ను ఆయా సెల‌బ్రిటీలు త‌మ సోష‌ల్ మీడియాలో పోస్ట్ చేయ‌గా అవి నెట్టింట వైర‌ల్ అవుతున్నాయి. అయితే ఇప్పుడు ఈ ఈవెంట్ లో నుంచి ఓ క్యూట్ వీడియో ఒక‌టి బ‌య‌టికొచ్చి వైర‌ల్ అవుతుంది. నంద‌మూరి బాల‌కృష్ణతో శ్రీలీల సెల్ఫీ తీసుకుంటుండ‌గా దాన్ని ఎవరో త‌మ వీడియోలో బంధించ‌గా ఆ వీడియోను నెటిజ‌న్లు లైక్ చేస్తూ వైర‌ల్ చేస్తున్నారు.

ఈ వీడియోలో శ్రీలీల‌, బాల‌కృష్ణ‌తో సెల్పీ తీసుకుంటుండ‌గా ఆ ఫోటోకు బాల‌య్య చిల్ అవుతూ పోజులిచ్చారు. మ‌ధ్య‌లో త‌న ష‌ర్ట్ కాల‌ర్ స‌రిగా లేద‌ని, ఆ కాల‌ర్ ను ఎత్తి మ‌రీ శ్రీలీలతో సెల్ఫీలు దిగారు బాల‌య్య‌. అయితే ఈ వీడియో ఇంత‌లా వైర‌ల్ అవ‌డానికి కార‌ణాలు లేక‌పోలేదు. బాల‌య్య‌, శ్రీలీల క‌లిసి గ‌తంలో భ‌గ‌వంత్ కేస‌రి అనే సినిమా చేసిన సంగ‌తి తెలిసిందే.

అనిల్ రావిపూడి ద‌ర్శ‌క‌త్వంలో వ‌చ్చిన ఈ సినిమాలో బాల‌య్య‌, శ్రీలీల తండ్రీ కూతుళ్లుగా క‌నిపించారు. సినిమాలో వీరిద్ద‌రి మ‌ధ్య బాండింగ్ గురించి అప్ప‌ట్లో తెగ చ‌ర్చ‌లు న‌డిచాయి. ఇప్ప‌టికీ చిచ్చా అంటూ శ్రీలీల, విజ్జి పాప అంటూ బాల‌య్య ఒక‌రినొక‌రు ఎంతో ప్రేమ‌గా పిలుచుకుంటూ ఉంటారు.