Begin typing your search above and press return to search.

భారీ అంచనాలతో వచ్చి.. నెలలోనే ఓటీటీ బాట!

వెంకటేశ్, త్రివిక్రమ్ కాంబినేషన్‌లో వచ్చిన ‘ఆదర్శ కుటుంబం’ నవంబర్ 27 నుంచి నెట్‌ఫ్లిక్స్‌లో స్ట్రీమింగ్ కానున్నట్లు సమాచారం. అక్టోబర్ 30న విడుదలైన ఈ సినిమా బాక్సాఫీస్ వద్ద ఆశించిన స్థాయిలో ఆడలేదు. తెలుగు సహా ఐదు భాషల్లో అందుబాటులోకి రానున్నట్లు ప్రచారం జరుగుతోంది. అయితే స్ట్రీమింగ్ తేదీపై నెట్‌ఫ్లిక్స్ అధికారిక ప్రకటన చేయలేదు.

By:  M Prashanth   |   22 Nov 2026 5:05 PM IST
భారీ అంచనాలతో వచ్చి.. నెలలోనే ఓటీటీ బాట!
X

వెంకటేశ్, త్రివిక్రమ్ కాంబినేషన్ అంటేనే ఆడియన్స్‌లో ఒక స్పెషల్ క్రేజ్ ఉంది. అలాంటి ఇద్దరూ కలిసి చేసిన 'ఆదర్శ కుటుంబం' థియేటర్లలో మాత్రం ఆశించిన స్థాయిలో ఆడలేదు. ఇప్పుడు ఈ సినిమా నెల తిరక్కుండానే ఓటీటీలోకి వచ్చేందుకు సిద్ధమవుతోంది. నవంబర్ 27 నుంచి నెట్‌ఫ్లిక్స్‌లో స్ట్రీమింగ్ ఉంటుందని సమాచారం. పెద్ద కాంబినేషన్‌తో వచ్చిన సినిమా ఇంత త్వరగా డిజిటల్ రిలీజ్‌కు వెళ్తుండటం వెనుక బాక్సాఫీస్ లెక్కలూ ఉన్నాయి.

అక్టోబర్ 30న విడుదలైన ఈ సినిమాపై మొదట్లో అంచనాలు బాగానే ఉన్నాయి. 'నువ్వు నాకు నచ్చావ్', 'మల్లీశ్వరి' చిత్రాలకు త్రివిక్రమ్ కథ, మాటలు అందించారు. అయితే వెంకటేశ్‌ను డైరెక్ట్ చేయడం ఇదే మొదటిసారి. పైగా 'సంక్రాంతికి వస్తున్నాం' విజయంతో వెంకీ మార్కెట్ కూడా మంచి ఊపులో ఉంది. ఈ రెండు అంశాలతో 'ఆదర్శ కుటుంబం'కు ఓపెనింగ్స్‌పై అంచనాలు పెరిగాయి.

కానీ రిలీజ్ తర్వాత పరిస్థితి మారింది. ఫ్యామిలీ కామెడీ, యాక్షన్ కథకు ప్రేక్షకుల నుంచి మిక్స్ డ్ రెస్పాన్స్ వచ్చింది. ట్రేడ్ ట్రాకింగ్ లెక్కల ప్రకారం సినిమా ప్రపంచవ్యాప్తంగా సుమారు రూ.76 కోట్ల గ్రాస్ దగ్గరే ఆగిపోయింది. భారీ బడ్జెట్‌తో తెరకెక్కిన చిత్రానికి ఈ వసూళ్లు సరిపోలేదనే అంచనాలు ఉన్నాయి. వెంకీ గత సినిమా స్థాయిలో ఈసారి థియేటర్లలో సందడి కనిపించలేదు.

ఇప్పుడు ఓటీటీ రిలీజ్ టైమింగ్ మరో ఆసక్తికరమైన పాయింట్. అక్టోబర్ 30 నుంచి నవంబర్ 27 వరకు సరిగ్గా నాలుగు వారాల గ్యాప్ మాత్రమే ఉంటుంది. అయితే ఓటీటీ డీల్‌లో ఈ నాలుగు వారాల గ్యాప్ ముందే ఫిక్స్ అయిందా, లేక తర్వాత మార్చారా అన్న విషయం బయటకు రాలేదు. పెద్ద హీరోల సినిమాలన్నింటికీ ఒకే స్ట్రీమింగ్ విండో ఉండదు. కానీ ఈ మధ్య కొన్ని చిత్రాలు నెల రోజుల్లోనే డిజిటల్ ప్లాట్‌ఫామ్స్‌లోకి వస్తున్నాయి. థియేటర్‌లో మిస్ అయిన వాళ్లకు కూడా అదే నెలలో ఇంట్లో చూసే అవకాశం దొరుకుతోంది.

నెట్‌ఫ్లిక్స్‌లో తెలుగు మాత్రమే కాకుండా తమిళం, కన్నడ, మలయాళం, హిందీ భాషల్లోనూ అందుబాటులోకి రానున్నట్లు సమాచారం. ఈ సినిమా డిజిటల్ హక్కులను నెట్‌ఫ్లిక్స్ ముందుగానే తీసుకుంది. హారిక అండ్ హాసిని క్రియేషన్స్ నిర్మించిన ఈ సినిమాలో శ్రీనిధి శెట్టి, నివేదా పేతురాజ్, నారా రోహిత్ కీలక పాత్రల్లో నటించారు. సత్య, యువినా, రాజా ప్రజ్వల్ కూడా కనిపించారు. థమన్ సంగీతం అందించారు. నవంబర్ 27 స్ట్రీమింగ్ డేట్‌పై ఇప్పటివరకు నెట్‌ఫ్లిక్స్ అధికారిక పోస్టర్ విడుదల చేయలేదు. ఒకటి రెండు రోజుల్లో అనౌన్స్‌మెంట్ వచ్చే అవకాశం ఉందని ప్రచారం జరుగుతోంది.