నిశ్శబ్దంగా ఓటీటీలోకి వచ్చేసిన హరిహర వీరమల్లు..ఎక్కడ చూడొచ్చంటే?

పవర్ స్టార్ పవన్ కళ్యాణ్ ఆంధ్రప్రదేశ్ కి డీసీఎంగా బాధ్యతలు చేపట్టిన తర్వాత మరింత బిజీగా మారిపోయారు. కానీ అభిమానులను అలరించడానికి ముందే ఒప్పుకున్న మూడు సినిమాలను వేగంగా పూర్తి చేస్తున్న విషయం తెలిసిందే. అందులో భాగంగానే జ్యోతి కృష్ణ దర్శకత్వంలో 'హరిహర వీరమల్లు' సినిమాను జూలై 24న విడుదల చేశారు. కానీ ఇప్పటివరకు ఈ సినిమా ఎంత కలెక్షన్స్ వసూలు చేసింది అనే విషయంపై అధికారిక పోస్టర్ మాత్రం మేకర్స్ రివీల్ చేయలేదు. శ్రీ మెగా సూర్య ప్రొడక్షన్స్ బ్యానర్ పై ఏ.ఎం.రత్నం భారీ బడ్జెట్ తో ఈ చిత్రాన్ని నిర్మించారు. నిధి అగర్వాల్ హీరోయిన్ గా నటించగా సత్యరాజ్ , బాబి డియోల్ తో పాటు మరికొంతమంది కీలక పాత్రలు పోషించారు.

4వారాలకే ఓటీటీలోకి వచ్చేసిన హరిహర వీరమల్లు..

సాధారణంగా థియేటర్లలోకి వచ్చిన ప్రతి సినిమా.. విడుదల తర్వాత ఫలితాన్ని బట్టి.. థియేటర్లలో విడుదలైన 6 వారాలు లేదా 8 వారాల తర్వాత ఓటీటీలోకి వస్తున్న విషయం తెలిసిందే. ఈ క్రమంలోనే హరిహర వీరమల్లు కూడా సైలెంట్ గా ఓటీటీలోకి వచ్చేసి అందర్నీ ఆశ్చర్యపరిచింది. ముఖ్యంగా థియేటర్లలో విడుదలైన 4 వారాలకే ఓటీటీలోకి రావడంతో ఓటీటీ ప్రియులు మాత్రం సంతోషం వ్యక్తం చేస్తున్నారు. మరి ఇది ఏ ఓటీటీ ప్లాట్ఫారం వేదికగా అందుబాటులోకి వచ్చింది అనే విషయం ఇప్పుడు చూద్దాం..

అమెజాన్ ప్రైమ్ వేదికగా అందుబాటులోకి..

ఆగస్టు 20వ తేదీ నుండి ప్రముఖ ఓటీటీ ప్లాట్ఫామ్ అమెజాన్ ప్రైమ్ వీడియోలో 'హరిహర వీరమల్లు: పార్ట్1 స్వాడ్ వర్సెస్ స్పిరిట్' స్ట్రీమింగ్ కి వచ్చేసింది. తెలుగు, తమిళ్, మలయాళం, హిందీ భాషల్లో అందుబాటులోకి వచ్చేసింది..ఇదిలా ఉండగా మరొకవైపు ఈ సినిమా దాదాపు 15 నిమిషాల తక్కువ నిడివితో ఓటీటీలోకి అందుబాటులోకి వచ్చింది. ప్రస్తుతం 2గంటల 33నిమిషాల నిడివితో మాత్రమే స్ట్రీమింగ్ అవుతోంది. మొదటి రోజు థియేటర్లలో సినిమా చూసిన వారు ఇప్పుడు ఓటీటీలో సినిమా చూస్తే మాత్రం తేడాలను ఈజీగా కనిపెట్టవచ్చు అని సమాచారం. ముఖ్యంగా ఈ సినిమా ఓటీటీ వెర్షన్లో చాలా మార్పులు జరిగాయని, హార్స్ రైడింగ్ సీన్స్, పవన్ కళ్యాణ్ విల్లు పట్టిన సన్నివేశాలతో పాటు ఇంటర్వెల్ తర్వాత వచ్చే వీఎఫ్ఎక్స్ పై కూడా విమర్శలు రావడంతో వాటిని ఇంకాస్త మెరుగుపరచినట్లు సమాచారం. మరి ఓటీటీలో ఈ సినిమా ప్రేక్షకులను ఎలా ఆకట్టుకుంటుందో చూడాలి.

30% షూటింగ్ పూర్తి చేసుకున్న హరిహర వీరమల్లు 2..

హరిహర వీరమల్లు సినిమా విషయానికి వస్తే.. నిధి అగర్వాల్ తో పాటు వెన్నెల కిషోర్, రఘుబాబు, కబీర్ దుహాన్ సింగ్, సచిన్ ఖేడ్ ఖర్, కోటా శ్రీనివాసరావు, సునీల్ తదితరులు కీలకపాత్రలు పోషించారు. ఏ.ఎం.రత్నం సమర్పించగా.. ఏ. దయాకర్ రావు నిర్మించారు. ఎం.ఎం.కీరవాణి ఈ చిత్రానికి సంగీతాన్ని అందించారు. ఈ సినిమాకి సీక్వెల్ రాబోతుందని.. 30% షూటింగ్ కూడా పూర్తయిందని ఈ చిత్ర హీరోయిన్ నిధి అగర్వాల్ ప్రమోషన్స్ లో చెప్పుకొచ్చింది. మరొకవైపు పవన్ కళ్యాణ్ సుజీత్ దర్శకత్వంలో ఓజీ , హరీష్ శంకర్ దర్శకత్వంలో ఉస్తాద్ భగత్ సింగ్ సినిమాలు చేస్తున్నారు. ఈ రెండు సినిమాలు పూర్తయిన తర్వాత ఈ సినిమా పూర్తి చేస్తారేమో చూడాలి.