ఐపీఎల్‌లో కోహ్లీ రికార్డుల వర్షం.. ఆరెంజ్ క్యాప్‌తో దూసుకెళ్తున్న కింగ్

క్రికెట్ మారుతోంది.. ఫార్మాట్లు మారుతున్నాయి.. బౌలర్ల వేగం పెరుగుతోంది. కానీ, ఐపీఎల్ పిచ్‌లపై ఒకే ఒక్కడి పరుగుల దాహం మాత్రం తనివితీరా తీరడం లేదు. అతడే విరాట్ కోహ్లీ. టీ20 క్రికెట్ అంటే కేవలం బలం కాదు, అది ఒక ‘కళ’ అని కోహ్లీ తన బ్యాటింగ్‌తో మరోసారి ప్రపంచానికి చాటిచెప్పాడు. గుజరాత్ టైటాన్స్‌తో జరిగిన తాజా మ్యాచ్‌లో కోహ్లీ ప్రదర్శన కేవలం ఒక ఇన్నింగ్స్ మాత్రమే కాదు, అది ఒక అద్భుత కావ్యం.

అగ్రెషన్ @ 200 స్ట్రైక్ రేట్

ప్రస్తుత టీ20 ట్రెండ్‌లో 200 స్ట్రైక్ రేట్ అనేది ఒక బెంచ్ మార్క్. అయితే, నిలకడను కోల్పోకుండా ఆ వేగాన్ని అందుకోవడం అందరికీ సాధ్యం కాదు. కగిసో రబాడా వంటి అంతర్జాతీయ గజదొంగలు 150 కి.మీ వేగంతో విసిరే నిప్పులు చెరిగే బంతులను, కోహ్లీ అంతే వేగంతో బౌండరీలకు తరలించడం అతని ఆత్మవిశ్వాసానికి నిదర్శనం. 81 పరుగుల ఆ విధ్వంసకర ఇన్నింగ్స్‌లో మనకు పాత కోహ్లీలోని క్లాస్, కొత్త కోహ్లీలోని మాస్.. రెండూ కనిపించాయి.

రికార్డుల రారాజు

ఈ మ్యాచ్‌తో కోహ్లీ ఐపీఎల్ చరిత్రలో మరికొన్ని పేజీలను తన సొంతం చేసుకున్నాడు. అతని ఖాతాలో చేరిన అరుదైన మైలురాళ్లు ఉన్నాయి. ఐపీఎల్‌లో 800 ఫోర్లు కొట్టి చరిత్రలో తొలి బ్యాటర్ గా రికార్డు నెలకొల్పాడు. 300 సిక్సర్లుతో గేల్, రోహిత్ తర్వాత మూడో ఆటగాడు ఓపెనర్‌గా 50 హాఫ్ సెంచరీలు చేసిన వార్నర్ తర్వాత రెండో స్థానంలో నిలిచాడు.

వయసు కేవలం అంకె మాత్రమే!

37 ఏళ్ల వయసులో చాలా మంది ఆటగాళ్లు రిటైర్మెంట్ గురించి ఆలోచిస్తుంటారు. కానీ కోహ్లీ మాత్రం ఫిట్‌నెస్‌లో యువకులకు సవాల్ విసురుతున్నాడు. మైదానంలో అతని ఉత్సాహం, ప్రతి పరుగు కోసం ఆరాటం చూస్తుంటే.. అతను ఇప్పుడే కెరీర్ మొదలుపెట్టాడా అన్న సందేహం కలగక మానదు. కొత్త తరం క్రికెట్ అవసరాలకు అనుగుణంగా తనను తాను మలచుకుంటూనే, తనదైన ‘టెక్స్ట్ బుక్’ షాట్లను వదలకుండా ఆడటం కోహ్లీకే సాధ్యమైన విద్య.

రాయల్ ఛాలెంజర్స్ బెంగళూరు ఆశలన్నీ ఇప్పుడు ఈ ‘కింగ్’ చుట్టూనే తిరుగుతున్నాయి. జట్టు విజయాల్లో తన వంతు పాత్ర పోషిస్తూ, రికార్డుల వేటలో దూసుకుపోతున్న కోహ్లీ, ఈ సీజన్‌లో మరిన్ని సంచలనాలు సృష్టించడం ఖాయం. పరుగుల పర్వం కొనసాగుతోంది.. కింగ్ ఆకలి ఇంకా తీరలేదు! ఈ సీజన్ ముగిసేసరికి కోహ్లీ బ్యాట్ ఇంకెన్ని అద్భుతాలు చేస్తుందో చూడాలి.