ఇది కేవలం ఒక రోజు కాదు... భారత క్రికెట్ ఆత్మగౌరవ పండుగ!

మైదానం ఏదైనా.. జెర్సీ రంగు ఏదైనా... "ఇండియా... ఇండియా" అని నాడు ప్రతి గుండె చేసే ఘోష ఒకటే. కానీ ఒకే ఒక్క రోజున.. వేర్వేరు సమయాల్లో.. రెండు మైదానాల్లో ఆ నీలి రంగు నీడలు వికసిస్తుంటే... కోట్లాది మంది అభిమానుల కళ్ళలో కనిపించే ఆనందం, ఒళ్ళు గగుర్పొడిచే అనుభూతి వర్ణనాతీతం. 28 ఏళ్ళ సుదీర్ఘ నిరీక్షణ తర్వాత... కాలం మళ్ళీ ఆ చరిత్రను పునరావృతం చేస్తోంది. కాకపోతే ఈసారి ఆ చరిత్ర వెనుక ఉన్న కథ వేరు.. దాని వెనుక ఉన్న ఆత్మవిశ్వాసం వేరు..

1998... ఆ జ్ఞాపకం ఒక మధుర భావన..

వెనక్కి వెళ్తే... 1998 సెప్టెంబర్ 12. అజహరుద్దీన్ నాయకత్వంలో ఒక జట్టు సహారా కప్‌‌లో శత్రుదేశంపై పోరాడుతుంటే.. అటు అజయ్ జడేజా సారథ్యంలో మరో బలగం కామన్వెల్త్ గేమ్స్‌లో త్రివర్ణ పతాకాన్ని ఎగరవేసింది. ఆ రోజు భారతదేశం సాధించిన ఆ రెండు విజయాలు... ఒక తరానికి మర్చిపోలేని జ్ఞాపకం. నాడు అది కేవలం షెడ్యూళ్ల అనుకోని సమ్మేళనం. కానీ నేడు ఒకే రోజున రెండు సమరాలు... కోట్లాది ఆశల స్వరాలు.. ఈ రోజు టీమ్‌‌ఇండియా ఒక జట్టు కాదు... రెండు వేర్వేరు గంభీర స్వరాలు..

బంగారు కల కోసం ఒకరు

ఆసియా ఖండపు అగ్రపీఠం కోసం, చిరకాల ప్రత్యర్థి పాకిస్థాన్‌తో ఫైనల్ పోరులో శ్రేయస్ అయ్యర్ సేన నిలబడనుంది. అక్కడ ప్రతీ బంతి ఒక ఆవేశం, ప్రతీ వికెట్ ఒక ఆత్మానందం, ప్రతీ పరుగు దేశ ప్రతిష్ట

ఆధిపత్యం కోసం మరొకరు

ఇటు కరేబియన్ గడ్డపై వెస్టిండీస్‌తో సిరీస్ కైవసం చేసుకునేందుకు శుభ్‌మన్ గిల్ బలగం సిద్ధమైంది. సముద్రాలు దాటినా మన కుర్రాళ్ళు చూపే పోరాటపటిమ భారత క్రికెట్ భవిష్యత్తుకు సాక్ష్యం.

ఒకే రోజు... ఒక మ్యాచ్ బంగారు పతకం కోసం.. మరో మ్యాచ్ సిరీస్ విజయం కోసం.. రెండు వేర్వేరు వేదికలపై భరతమాత ముద్దుబిడ్డలు బ్యాట్ పట్టి బరిలోకి దిగుతుంటే ఏ మైదానం వైపు చూడాలి? ఏ రికార్డును హృదయానికి హత్తుకోవాలి? అనే తియ్యని అయోమయంలో అభిమానుల గుండెలు కొట్టుకుంటున్నాయి.

ఇది రికార్డు కాదు... భారత క్రికెట్ గర్జన

ఒకప్పుడు ఏడో నంబర్ బ్యాటర్‌ను వెతుక్కోవడానికి తిప్పలు పడ్డ రోజులు ఉన్నాయి. కానీ ఈ రోజు ఏకకాలంలో ఇద్దరు సముర్థులైన నాయకులు, రెండు ప్రతిభావంతులైన జట్లు అంతర్జాతీయ స్థాయి వేదికలపై భారత్‌కు ప్రాతినిధ్యం వహిస్తున్నాయి. ఇది బెంచ్ స్ట్రెంగ్త్ గురించి చెప్పే గణాంకం మాత్రమే కాదు... ప్రపంచ క్రికెట్ సామ్రాజ్యంలో భారత సీనియర్ క్రికెటర్లు ఎంత బలంగా వేళ్లూనుకున్నారో చాటిచెప్పే గర్వకారణం..

చరిత్ర మళ్ళీ నిలబడుతోంది..

28 ఏళ్ళ క్రితం ఆ రెండు జట్లు విజయజెండా ఎగరేసి చరిత్ర సృష్టించాయి. ఈ రోజు కూడా ఆ నీలిరంగు జెర్సీలు రెండూ విజయోత్సాహంతో మురిసిపోవాలని కోట్లాది మంది భారతీయులు ఒకే స్వరంతో ప్రార్థిస్తున్నారు. ఇది ఒక్క రోజు ఆటే కావచ్చు... కానీ ఒక భారతీయుడిగా, క్రికెట్ ప్రేమికుడిగా ఈ క్షణం గర్వంతో ఛాతీ ఉప్పొంగే సమయం. ఆల్ ది బెస్ట్ టీమ్ ఇండియా.. గెలుపు మీదే... చరిత్ర మనదే..