గ్రౌండ్‌లో ప్రతి నిమిషం కోట్ల వర్షం…రొనాల్డో రికార్డ్ సంపాదన!

ప్రపంచ ఫుట్‌బాల్ దిగ్గజం, పోర్చుగల్ సూపర్‌స్టార్ క్రిస్టియానో రొనాల్డో పేరు వింటేనే రికార్డులు మోత మోగుతాయి. కేవలం ఆటలోనే కాదు, సంపాదనలోనూ ఆయనకు తిరుగులేదని మరోసారి నిరూపితమైంది. ఫోర్బ్స్ జాబితా ప్రకారం ప్రపంచంలోనే అత్యధికంగా ఆర్జించే క్రీడాకారుడిగా రొనాల్డో రికార్డ్ సృష్టించాడు. ఆయన మైదానంలో అడుగుపెట్టి ఆడే ప్రతి నిమిషానికి కురిసే కోట్ల వర్షం చూస్తే ఎవరైనా ముక్కున వేలేసుకోవాల్సిందే. రొనాల్డో సంపాదనకు సంబంధించిన ఆసక్తికరమైన లెక్కలు ఇప్పుడు సోషల్ మీడియాలో హాట్ టాపిక్‌గా మారాయి. ఆ విశేషాలు చూద్దాం..

నిమిషానికి 33 లక్షలు.. నమ్మశక్యం కాని నిజం:

క్రిస్టియానో రొనాల్డో మైదానంలో ఉన్న ప్రతి నిమిషానికీ సగటున అక్షరాలా రూ. 33.33 లక్షలు సంపాదిస్తున్నాడు. అంటే మనం ఒక చిన్న కాఫీ తాగి ముగించే లోపే ఆయన ఖాతాలో లక్షల రూపాయలు జమైపోతాయన్నమాట. ఇక సౌదీ అరేబియాకు చెందిన ప్రముఖ క్లబ్ 'అల్ నస్ర్' తో చేసుకున్న భారీ ఒప్పందం వల్లే రొనాల్డోకు ఈ స్థాయి రేంజ్‌లో ఆదాయం లభిస్తోంది.

ఏడాదికి వేల కోట్ల ఆదాయం:

కేవలం క్లబ్ ఒప్పందం ద్వారానే రొనాల్డో ఏడాదికి దాదాపు రూ. 1,700 కోట్లు ఆర్జిస్తున్నాడు. ఇక ఇతర బ్రాండ్ ఎండార్స్‌మెంట్లు, యాడ్స్ అన్నీ కలుపుకుంటే గత 12 నెలల్లో ఆయన మొత్తం సంపాదన అక్షరాలా రూ. 2,356 కోట్లు. ఈ అద్భుతమైన సంపాదనతో ఫోర్బ్స్ అత్యధిక ఆదాయ గల క్రీడాకారుల జాబితాలో వరుసగా మూడో ఏడాది కూడా రొనాల్డో నంబర్ వన్ స్థానాన్ని కైవసం చేసుకున్నాడు.

ఒక్క మ్యాచ్ ఆడితే రూ. 30 కోట్లు:

రొనాల్డో సాధారణంగా తన దేశం తరఫున ఆడే అంతర్జాతీయ మ్యాచ్‌లకు ఎలాంటి డబ్బు తీసుకోడు. కేవలం క్లబ్స్ తరఫున మాత్రమే మ్యాచ్ ఫీజ్ తీసుకుంటాడు.ఇక ఓవరాల్‌గా ఏడాదికి ఆయన సుమారు 55 గేమ్స్ ఆడతారని అనుకుంటే.. ఒక్కో మ్యాచ్‌కు ఆయనకు రూ. 30 కోట్లకు పైనే అందుతోంది. ఈ లెక్కలు చూస్తుంటే రొనాల్డో బ్రాండ్ వాల్యూ ఏ రేంజ్‌కు చేరిందో అర్థం చేసుకోవచ్చు.

మన ఇండియన్ ప్లేయర్స్‌తో పోల్చితే?:

రొనాల్డో సంపాదనతో పోల్చి చూస్తే ఒక సాధారణ ఇండియన్ ప్రొఫెషనల్ ఫుట్‌బాల్ ప్లేయర్ ఏడాది జీతం సగటున రూ. 12 లక్షలు మాత్రమే ఉంటుంది. అంటే ఒక భారతీయ ఆటగాడు ఏడాది మొత్తం కష్టపడి సంపాదించే డబ్బును, రొనాల్డో గ్రౌండ్‌లోకి దిగిన కేవలం అర నిమిషం లోపే సంపాదిస్తున్నాడన్నమాట. ఈ పోలిక వినడానికి కాస్త ఆశ్చర్యంగా ఉన్నా ఇది పచ్చి నిజం.

చరిత్ర సృష్టించిన ఏకైక క్రీడాకారుడు:

ఫుట్‌బాల్ చరిత్రలోనే కాకుండా మొత్తం క్రీడా ప్రపంచంలోనే తన కెరీర్ సంపాదనలో 2 బిలియన్ డాలర్ల దాదాపు రూ. 16,000 కోట్లకు పైగా మార్కును దాటిన మొట్టమొదటి యాక్టివ్ ప్లేయర్‌గా రొనాల్డో సరికొత్త రికార్డు సృష్టించాడు. ఇక మైదానంలో కేవలం ఆటతోనే కాకుండా, ప్రపంచంలోనే అత్యంత శక్తివంతమైన పర్సనల్ బ్రాండ్‌ను నిర్మించుకుని రొనాల్డో ఈ ఘనత సాధించాడు.

క్రిస్టియానో రొనాల్డో కేవలం ఒక ఫుట్‌బాల్ ఆటగాడు మాత్రమే కాదు, ఒక గ్లోబల్ బ్రాండ్. వయసు పెరుగుతున్నా కొద్దీ ఆటలోనూ, సంపాదనలోనూ ఆయన రేంజ్ అస్సలు తగ్గడం లేదు. అసాధ్యం అనుకున్న రికార్డులను సైతం చాలా ఈజీగా బద్దలు కొడుతూ దూసుకుపోతున్న రొనాల్డో, రాబోయే రోజుల్లో ఇంకెన్ని వండర్స్ క్రియేట్ చేస్తాడో చూడాలి.