నీటి శుద్ధిలో ఇజ్రాయిల్ టెక్నాలజీపై జగన్ దృష్టి

వైఎస్ కుటుంబం సంప్రదాయంగా ఏటా జెరూసలెం పర్యటనకు వెళ్తుంది. ఇది వైఎస్ హయాం నుంచే ఆనవాయితీ. జగన్ అధికారం చేపట్టాక మొదటి సారి అక్కడికి కుటుంబంతో వెళ్లారు. ముఖ్యమంత్రి అయ్యాక జగన్ మొదటి విదేశీ పర్యటన కూడా ఇదే. అయితే, ఈ పర్యటన కేవలం ఆధ్యాత్మిక పర్యటనగా జగన్ ముగించకపోవడం విశేషం. అవకాశమున్నంత మేర ప్రజోపయోగ పర్యటనగా కూడా చేశారు జగన్. ఈ రోజు కార్మిక టోపీ పెట్టుకుని - ఇన్ సర్ట్ చేసి కనిపించిన జగన్ పిక్స్ వైరల్ అవుతున్నాయి. ఇంతకీ అవి ఎక్కడివో తెలుసుకుందాం.

ఈరోజు ఇజ్రాయెల్‌ లోని హడేరా ప్రాంతంలో ఉన్న హెచ్‌2ఐడి డీశాలినేషన్ ప్లాంట్ ను ముఖ్యమంత్రి జగన్ సందర్శించారు. ఈ ప్లాంటు ఒక అత్యాధునిక నీటి శుద్ధి ప్రక్రియకు పేరుగాంచింది. టెల్ అవీవ్‌లోని ఇండియన్ మిషన్ డిప్యూటీ చీఫ్ షెరింగ్ తో పాటు జగన్ ఈ ప్లాంటును సందర్శించారు. ప్లాంట్ అధికారులు డీశాలినేషన్ (సముద్రపు నీటిని గృహ అవసరాలకు పనికొచ్చేలా శుద్ధిచేసే ప్రక్రియ) మెకానిజం గురించి జగన్ కు వివరించారు. ఈ ప్రాజెక్టుకు నిర్వహణ తీరు - ఖర్చుల గురించి ప్లాంట్ నిపుణులు జగన్ కు కూలంకుషంగా వివరించారు. ఈ సందర్భంగా ముఖ్యమంత్రి జగన్ డీశాలినేటెడ్ నీటిని రుచి చూశాడు.

సముద్రపు ఉప్పు నీటిని లవణ శాతం విపరీతంగా తగ్గించి తాగు నీటి - ఇతర గృహ అవసరాలకు వాడుకునేలా చేయడం అనేది ఒక విప్లవం. మన భూమ్మీద లభ్యమయ్యే నీటిలో 90 శాతానికి పైగా ఉప్పునీరే. ఈ శుద్ధి ప్రక్రియ తక్కువ ఖర్చులో అందుబాటులోకి వస్తే తాగునీటి సమస్య అనేది ప్రపంచానికి ఉండదు.

ఉదాహరణకు సముద్రం పక్కనే ఉన్నా ప్రకాశం జిల్లాలో తాగునీటి ఎద్దడి ఎక్కువ. ఈ ప్లాంట్ అక్కడ ఏర్పాటుచేస్తే ఆ జిల్లా ప్రజల దాహార్తిని తీర్చవచ్చు. బహుశా దీర్ఘకాలిక ప్రణాళికతో జగన్ దీనిని సందర్శించారేమో. ఇదిలా ఉండగా.... ఇదే పర్యటనలో ఆయన కొన్ని వ్యవసాయ క్షేత్రాలను కూడా సందర్శించారు. అధిక దిగుబడులకు ఇజ్రాయిల్ చాలా ప్రసిద్ధి.