ఈసారి ఏపీ అసెంబ్లీలోకి ఆ మూడు ఛానళ్లకు ఎంట్రీ దక్కలేదు

ఏపీ అసెంబ్లీ సమావేశాల కవరేజ్ కు మూడు మీడియా ఛానళ్లకు అనుమతి ఇవ్వకపోవటం ఆసక్తికరంగా మారింది. నిన్నటి (సోమవారం) నుంచి ఏపీ అసెంబ్లీ శీతాకాల సమావేశాలు షురూ అయ్యాయి. గత అసెంబ్లీ సమావేశాల మాదిరే ఈసారి కూడా మూడు ఛానళ్ల(ఈటీవీ - ఏబీఎన్ ఆంధ్రజ్యోతి - టీవీ5)కు ఎంట్రీ దక్కలేదు.

మూడు ఛానళ్లకు అసెంబ్లీ ఎంట్రీ పాసులు ఎందుకు దక్కలేదన్న విషయంపై అధికారులు సూటిగా సమాధానం చెప్పలేకపోతున్నారు. అసెంబ్లీ సమావేశాల కవరేజ్ కు స్పీకర్ అనుమతి ఉండాలని..అలాంటిదేమీ రాకపోవటంతో అనుమతించలేదని చెబుతున్నారు.

దీంతో అసెంబ్లీ సమావేశాల మొదటి రోజున.. ఈ రోజు (మంగళవారం) కూడా అసెంబ్లీలోకి అనుమతించలేదు. ఇదే విషయాన్ని బీఏసీ సమావేశాలో విపక్ష నేత అచ్చెన్నాయుడు ప్రశ్నించినట్లుగా తెలుస్తోంది. అసెంబ్లీ సమావేశాలు లైవ్ ను ఆ మూడు ఛానళ్లకు ఎందుకు ఇవ్వలేదని అచ్చెన్న అడిగినట్లుగా తెలుస్తోంది. దీనికి బదులిచ్చిన సీఎం జగన్.. నిబంధనల్ని ఉల్లంఘించినట్లుగా పేర్కొన్నట్లు తెలిసింది.

అసెంబ్లీ సమావేశాలు ప్రారంభమయ్యాక అనుమతి ఇవ్వకపోవటం సరికాదన్న మాటకు.. ఆ అంశాన్ని తాను పరిశీలిస్తానని అసెంబ్లీ స్పీకర్ చెప్పినట్లుగా తెలిసింది. మరి.. ఆ మూడు ఛానళ్లకు ఈ సెషన్లో అయినా అనుమతి లభిస్తుందా? అన్నది ఇప్పుడు ప్రశ్నగా మారింది.