పార్కింగ్ ఫీజ్ వసూల్ కి టి ప్రభుత్వ అనుమతి.. కోర్టు తీర్పును దిక్కరించారన్న యాక్టివిస్ట్!!

Wed Jul 21 2021 15:00:01 GMT+0530 (IST)

Government permission for parking fee Regarding Movie Theaters

సింగిల్ స్క్రీన్ థియేటర్లలో పార్కింగ్ ఛార్జీలు వసూలు చేయడానికి అనుమతించాలని తెలంగాణ ప్రభుత్వం మంగళవారం ఆదేశాలు జారీ చేసింది. కరోనావైరస్ మహమ్మారి లాక్ డౌన్ల కారణంగా భారీగా నష్టపోయిన చిత్ర పరిశ్రమ నుండి వచ్చిన అనేక డిమాండ్లలో ఇది ఒకటి.



ఇకపై సినిమాలకు వెళ్లే వాళ్లు  ద్విచక్ర వాహనాన్ని పార్కింగ్ చేయడానికి రూ .20.. కారును పార్క్ చేయడానికి రూ .30 చెల్లించాలి. సింగిల్ థియేటర్ల వరకూ ఈ అవకాశం కల్పిస్తూ జీవో జారీ అయ్యింది.  మల్టీప్లెక్స్ లు  వాణిజ్య సముదాయాలలో ఉచిత పార్కింగ్ కోసం గతంలో జారీ చేసిన సూచనలు మునుపటిలాగే కొనసాగుతాయి. వాణిజ్య సంస్థలు.. మాల్స్ .. మల్టీప్లెక్స్ లలో పార్కింగ్ ఫీజులను నియంత్రించడానికి గతంలో జారీ చేసిన ప్రభుత్వ ఉత్తర్వులను అలానే కొనసాగిస్తారు. సినిమాలు చూడటానికి కాకుండా వేరే పనులతో వచ్చే వాళ్లు తమ వాహనాలను థియేటర్లలో పార్కింగ్ చేయడంతో పార్కింగ్ ప్రాంగణాన్ని నిర్వహించడం .. వాహనాల భద్రతకు భరోసా ఇవ్వడం థియేటర్ యజమానులకు సమస్యగా మారిందని తాజా ప్రభుత్వ ఉత్తర్వు పేర్కొంది.

సింగిల్ థియేటర్లలో పార్కింగ్ ఫీజుపై సానుకూల చర్య తీసుకున్నందుకు తెలంగాణ ఫిల్మ్ ఛాంబర్ ఆఫ్ కామర్స్ తరపున ప్రధాన కార్యదర్శి సునీల్ నారంగ్ ప్రభుత్వానికి కృతజ్ఞతలు తెలిపారు. సినిమాటోగ్రఫీ మంత్రి తలసానిని కలిసిన వెంటనే పార్కింగ్ ఫీజుపై తక్షణమే స్పందించిన సీఎం కేసీఆర్.. మంత్రి కేటీఆర్ లకు కృతజ్ఞతలు తెలియజేశారు. ఇటీవల సినిమాటోగ్రఫీ మంత్రి తలసాని శ్రీనివాస్ యాదవ్ తో తెలంగాణ ఛాంబర్ ప్రతినిధుల భేటీ గురించి తెలిసినదే. రాష్ట్రవ్యాప్తంగా ప్రస్తుతం మూసివేయబడిన థియేటర్లను తెరిపించేందుకు పరిష్కరించాల్సిన వివిధ సమస్యలకు సంబంధించి అధికారులు  తెలంగాణ ఫిల్మ్ ఛాంబర్ ఆఫ్ కామర్స్ ప్రతినిధులతో సమావేశం లో చర్చించారు.

అయితే ప్రభుత్వ నిర్ణయంపై సామాజిక కార్యకర్త విజయ్ గోపాల్ ప్రకటన షాకిస్తోంది. ``పార్కింగ్ సమస్యకు శాశ్వత పరిష్కారం కోసం పిలుపునిచ్చారు. జూలై 20 నాటి ప్రభుత్వ ఉత్తర్వు 121 చట్టం ప్రకారం ఈ నిర్ణయం చెల్లద``ని అన్నారు. ``పార్కింగ్ ఛార్జీలను ఎవరూ వసూలు చేయలేరని 2003 లో హైకోర్టు తీర్పు ఇచ్చింది. అలాంటప్పుడు ఈ ప్రభుత్వ ఉత్తర్వు కోర్టు ఆదేశాలను ధిక్కరించడమేనని అన్నారు.  దీనిని పరిష్కరించడానికి మేము అన్ని చట్టపరమైన చర్యలు తీసుకుంటాము`` అని ఆయన అన్నారు.