ఏనుగు ఘటన మరువక ముందే...గర్భిణి ఆవును కూడా ...!

కేరళ గర్భిణి అయిన ఏనుగుకి టపాసులు కూర్చిన పైనాపిల్ తినిపించి దాని ప్రాణాలు తీసిన విషయం తెలిసిందే. దీని పై సెలబ్రిటీల దగ్గరనుండి సామాన్యుల వరకు తీవ్ర ఆగ్రహాన్ని, నిరసనను వ్యక్తం చేసిన విషయం తెలిసిందే. ఈ ఘటన మరవక ముందే హిమాచల్ ప్రదేశ్‌ లో మరో దారుణం చోటుచేసుకుంది. కడుపుతో ఉన్న ఆవుకు పేలుడు పదార్థాలు తినిపించి ఘోరానికి పాల్పడ్డారు. హిమాచల్ ప్రదేశ్‌ లోని బిలాస్పూర్ జిల్లా జాందుత్తలో ఈ ఉదంతం చోటుచేసుకుంది.

పొలంలోని గడ్డిలో దాచిన పేలుడు పదార్థాన్ని తిన్న ఆవు దవడ పేలిపోయి రక్తసిక్తమైంది. ఈ వీడియోను యజమాని గురుదయాళ్ సింగ్ సోషల్ మీడియాలో పోస్ట్ చేశారు. తన పొరుగింట్లోని నందలాల్ అనే వ్యక్తే ఈ దురాగతానికి పాల్పడ్డాడని, అతనిపై చర్యలు తీసుకోవాలని డిమాండ్ చేశారు. ఈ ఘటన తర్వాత నందలాల్ పారిపోవడం అనుమానాలకూ బలం చేకూరుస్తోంది. కాగా బాంబు కారణంగా ఆవు దవడ ఛిద్రమైపోయింది. దాంతో ఆ ఆవు గడ్డి కూడా తినలేకపోతుంది. ఈ ఘటనపై కేసునమోదు చేసుకున్న పోలీసులు నిందితుడి కోసం గాలిస్తున్నారు.