నాన్న‌గారి ఆశ‌యాలు నెర‌వేరుస్తా: రాధా ఫ‌స్ట్ స్పీచ్‌

విజ‌య‌వాడ కార్పొరేష‌న్ ప‌రిధిలో జ‌న‌సేన పార్టీ త‌ర‌ఫున మేయ‌ర్ అభ్య‌ర్థిగా విజ‌యం ద‌క్కించుకున్న వంగ‌వీటి రంగా వార‌సుడు వంగ‌వీటి రాధాకృష్ణ‌.. తాజాగా మీడియా ముందుకు వ‌చ్చారు. ఈ ఎన్నికల్లో విజ‌య‌వాడ‌లో 52 శాతం మాత్ర‌మే పోలింగ్ న‌మోదైంది. అయిన‌ప్ప‌టికీ.. రాధాకు ల‌క్షా 35 వేల ఓట్ల మెజారిటీ ద‌క్కింది. వాస్త‌వానికి పోటీ కూడా తీవ్రంగానే సాగింది. ఇండిపెండెంట్ అభ్య‌ర్థిగా దిగిన మాజీ ఐపీఎస్ ఏబీవీ గ‌ట్టి పోటీ ఇస్తార‌ని అనుకున్నారు. ఇక వైసీపీ త‌ర‌ఫున మాజీ మేయ‌ర్ రాయ‌న భాగ్య‌ల‌క్ష్మి సైతం గ‌ట్టి పోటీనే ఇచ్చారు.

అయిన‌ప్ప‌టికీ.. ప్ర‌జ‌లు మాత్రం రంగా వార‌సుడి వెంటే నిలిచిన‌ట్టు స్ప‌ష్టం అయింది. అదేస‌మ‌యంలో కులాల కు, సామాజిక వ‌ర్గ పోరుకు భిన్నంగా కూడా ఈఎన్నిక‌లు ప్ర‌భావం చూపాయి. ఈ నేప‌థ్యంలో రాధా మీడియాతో మాట్లాడుతూ.. త‌న తండ్రి రంగా ఆశీస్సుల‌తోనే ఈ విజ‌యం ద‌క్కింద‌ని భావిస్తున్న‌ట్టు తెలిపారు. కూట‌మి పార్టీల నాయ‌కులు త‌న‌కు అన్ని విధాలా స‌హ‌కారం అందించార‌ని.. ప్ర‌తి ఒక్క‌రూ స‌హ‌క‌రించార‌ని తెలిపారు. విజ‌య‌వాడ న‌గ‌రంతోనే త‌మ కుటుంబ రాజ‌కీయాలు ప్రారంభ‌మ‌య్యాయ‌న్నారు.

త‌న తండ్రి, తాను కూడా విజ‌య‌వాడ న‌గ‌ర ప్ర‌జ‌ల‌కు ఎంతో రుణ‌ప‌డి ఉన్నామ‌న్న రాధా.. తండ్రి ఆశ‌యాల‌ను నెర‌వేర్చేందుకు కృషి చేస్తాన‌ని చెప్పారు. అదేస‌మ‌యంలో కూట‌మి ప్ర‌భుత్వం, కేంద్రంలోని ఎన్డీయే ప్ర‌భుత్వ స‌హ‌కారంతో న‌గ‌రాన్ని అభివృద్ధి చేయ‌నున్న‌ట్టు చెప్పారు. ఈ విష‌యం ప్ర‌జ‌ల‌దేన‌ని వ్యాఖ్యానించారు. రంగా అభిమానులు, రాధా-రంగా మిత్ర‌మండ‌లి కూడా ఈ విజ‌యానికి ఎంతో కృషి చేసిన‌ట్టు రాధా చెప్పారు. న‌గ‌రంలో అనేక స‌మ‌స్య‌లు ఉన్నాయ‌ని.. వాటిని ప‌రిష్క‌రించేందుకు ప్ర‌య‌త్నం చేస్తాన‌ని తెలిపారు.

సుదీర్ఘ విరామం..

రాధాకు సుదీర్ఘ విరామం త‌ర్వాత‌.. ఈ విజ‌యం ద‌క్క‌డం గ‌మ‌నార్హం. 2004లో తొలిసారి విజ‌య‌వాడ తూర్పు నుంచి ఆయ‌న పోటీ చేసి అసెంబ్లీకి ఎన్నిక‌య్యారు. ఆ త‌ర్వాత‌.. ప‌లు పార్టీలు మారి పోటీ చేసినా ఆయ‌న విజ‌యం ద‌క్కించుకోలేదు. గ‌త ఎన్నిక‌ల్లో అస‌లు టికెట్ కూడా ద‌క్క‌లేదు. ఇక‌, తాజాగా జ‌న‌సేన తీర్థం పుచ్చుకుని కూట‌మి త‌ర‌ఫున మేయ‌ర్ అభ్య‌ర్థిగా పోటీ చేసి విజ‌యం ద‌క్కించుకోవ‌డంతో రంగా అభిమానులు.. పాత‌త‌రం నాయ‌కులు కూడా రాధాను అభినందిస్తున్నారు.