అమెరికాలో 29 ఏళ్లకే నిండు నూరేళ్లు నిండాయి.. తెలుగు విద్యార్థి దుర్మరణం

ఉన్నత విద్య కోసం అగ్రరాజ్యం అమెరికాకు వెళ్లిన తెలుగు విద్యార్థిని సాయి నితిన్ (29) అకాల మరణం చెందారు. కేవలం 29 ఏళ్లకే గుండెపోటు రూపంలో మృత్యువు కబళించడంతో విజయవాడకు చెందిన ఆ కుటుంబంలో తీవ్ర విషాదం అలుముకుంది. భవిష్యత్తుపై ఎన్నో కలలు కన్న యువకుడు నిద్రలోనే కుప్పకూలడం స్థానిక తెలుగు వర్గాలను, ముఖ్యంగా విద్యార్థులను దిగ్భ్రాంతికి గురిచేసింది.

* అర్ధరాత్రి గుండెపోటు: ఆగిపోయిన నితిన్ కల

వివరాల్లోకి వెళితే... ఆంధ్రప్రదేశ్‌లోని విజయవాడకు చెందిన సాయి నితిన్ టెక్సాస్‌లోని హ్యూస్టన్‌కు సమీపంలో ఉన్న లిమా ప్రాంతంలో నివసిస్తున్నారు. లామార్ యూనివర్సిటీ నుంచి కంప్యూటర్ సైన్స్‌లో మాస్టర్స్ డిగ్రీని ఇటీవలే పూర్తి చేసిన నితిన్, ప్రస్తుతం OPT (Optional Practical Training) పై ఉండి, ఉద్యోగ వేటలో తన కెరీర్‌ను ప్రారంభించేందుకు సన్నద్ధమవుతున్నారు.

అంతా సవ్యంగా సాగుతుందనుకున్న తరుణంలో నిన్న అర్ధరాత్రి దాటిన తర్వాత సుమారు 3:30 గంటల సమయంలో తన నివాసంలో నిద్రలోనే నితిన్ గుండెపోటుకు గురయ్యారు. కుప్పకూలి పడకపై నుంచి కింద పడిపోయిన నితిన్‌ను వెంటనే ఆసుపత్రికి తరలించే ప్రయత్నం చేసినప్పటికీ, ఫలితం దక్కలేదు. ఆసుపత్రికి చేరేలోపే ఆయన మరణించినట్లు సమాచారం.

* కన్నీరుమున్నీరవుతున్న తల్లి

నితిన్ కుటుంబం ఆర్థికంగా ఇబ్బందులు ఉన్నప్పటికీ, తన కుమారుడి విద్య కోసం ఎంతో కష్టపడి ప్రోత్సహించింది. కుటుంబానికి నితిన్ ఒక్కడే ఆధారమన్న నేపథ్యంలో ఈ అనూహ్య మరణ వార్త ఆయన తల్లిని తీవ్ర విషాదంలో ముంచెత్తింది. తన కొడుకు పెద్ద చదువులు చదివి, మంచి ఉద్యోగం సంపాదించి తమ కష్టాలు తీరుస్తాడనుకున్న తల్లికి ఈ వార్త గుండెకోత మిగిల్చింది.

"నితిన్ చాలా మంచివాడు, ప్రశాంత స్వభావం కల యువకుడు. తన భవిష్యత్తుపై ఎన్నో ఆశలు పెట్టుకున్నాడు. ఈ చిన్న వయసులో గుండెపోటుతో మరణించడం నమ్మలేకపోతున్నాం." అని నితిన్ స్నేహితులు, పొరుగువారు ఆవేదన వ్యక్తం చేస్తున్నారు.

* మృతదేహం తరలింపునకు నిధుల సేకరణ

ప్రస్తుతం నితిన్ మృతదేహాన్ని స్వదేశంలోని విజయవాడకు తరలించేందుకు పెద్ద మొత్తంలో ఖర్చు అవసరం అవుతోంది. ఈ విషయాన్ని తెలుసుకున్న హ్యూస్టన్‌లోని తెలుగు సమాజం నితిన్ మిత్రులు, పొరుగువారితో కలిసి మానవతా దృక్పథంతో నిధులు సేకరించే కార్యక్రమాన్ని ప్రారంభించింది. మృతదేహాన్ని వీలైనంత త్వరగా స్వదేశానికి పంపి, నితిన్ తల్లికి అండగా నిలబడేందుకు అందరూ కృషి చేస్తున్నారు.

అగ్రరాజ్యంలో వరుసగా జరుగుతున్న ఇలాంటి విషాదకర ఘటనలు, ముఖ్యంగా విద్యార్థులు గుండెపోటుతో మరణించడంపై తెలుగు వర్గాల్లో తీవ్ర ఆందోళన, దిగ్భ్రాంతి వ్యక్తమవుతోంది. సాయి నితిన్ ఆత్మకు శాంతి చేకూరాలని ప్రవాస భారతీయులు ప్రార్థిస్తున్నారు.