అమెరికా పతనం.. ఇతర దేశాలకు వరం

అంతర్జాతీయ పర్యాటక రంగంలో అనూహ్యమైన మార్పులు చోటు చేసుకుంటున్నాయి. ఒకప్పుడు విదేశీ పర్యాటకులకు ప్రధాన గమ్యస్థానంగా ఉన్న అమెరికా ఇప్పుడు తన ఆకర్షణను కోల్పోతోంది. అదే సమయంలో కెనడా, మెక్సికో, యూరప్, ఆసియా దేశాలు రికార్డు స్థాయిలో పర్యాటకులను ఆకర్షిస్తున్నాయి. ఈ పరిణామం ప్రపంచ పర్యాటక ఆర్థిక వ్యవస్థలో కొత్త ధోరణులకు నాంది పలుకుతోంది.

* అమెరికాకు తగ్గిన ఆదరణ

2019తో పోలిస్తే అమెరికా అంతర్జాతీయ పర్యాటక మార్కెట్లో తన వాటాను కోల్పోతోంది. అధిక ప్రయాణ ఖర్చులు, వీసా విధానాల్లో కఠిన నిబంధనలు, కొన్ని సందర్భాల్లో రాజకీయ వాతావరణం పర్యాటకులను అమెరికాకు దూరంగా ఉంచుతున్నాయి. ప్రత్యేకించి దక్షిణ, తూర్పు ఆసియా పర్యాటకులు, అమెరికాకు బదులుగా ఇతర సమీప, తక్కువ ఖర్చుతో కూడిన దేశాలను ఎంచుకుంటున్నారు. ఒక సర్వే ప్రకారం దక్షిణాసియా పర్యాటకుల్లో దాదాపు సగం మంది ఆస్ట్రేలియా, న్యూజిలాండ్‌లను అమెరికాకు ప్రత్యామ్నాయంగా చూస్తున్నారు.

*ఇతర దేశాలకు లాభం

అమెరికా కోల్పోతున్న పర్యాటక ఆదాయం ఇతర దేశాలకు వరంగా మారుతోంది. ఈ మార్పుల వల్ల లాభపడుతున్న కొన్ని దేశాలున్నాయి.

కెనడా: అమెరికా సరిహద్దుకు సమీపంలో ఉండటం, సులభమైన ప్రయాణ నిబంధనలు, ఆకర్షణీయమైన పర్యాటక ప్రాంతాల కారణంగా కెనడా పర్యాటక రంగం పుంజుకుంది. అమెరికా పర్యటనలను మానుకున్న పర్యాటకులు ఇప్పుడు కెనడాను ఎంచుకుంటున్నారు.

యూరప్: యూరప్ ఖండం పర్యాటక రంగంలో చురుకుదనాన్ని సాధించింది. ఫ్రాన్స్, ఇటలీ, స్పెయిన్, గ్రీస్ వంటి దేశాలు విదేశీ పర్యాటకులను ఆకర్షిస్తూ తమ స్థానాన్ని మరింత బలపరుచుకుంటున్నాయి. యూరప్ లోని వివిధ దేశాల మధ్య ప్రయాణాలు సులభం కావడం కూడా దీనికి ఒక కారణం.

మెక్సికో - లాటిన్ అమెరికా: అమెరికా , కెనడా పర్యాటకులు మెక్సికో, లాటిన్ అమెరికా , కరీబియన్ ప్రాంతాలపై దృష్టి పెడుతున్నారు. తక్కువ ఖర్చుతో కూడిన పర్యాటక ప్యాకేజీలు, ఆహ్లాదకరమైన వాతావరణం, సాపేక్షంగా తక్కువ వీసా ఆంక్షలు ఈ ప్రాంతాలను పర్యాటకులకు ఆకర్షణీయంగా మార్చాయి.

మధ్యప్రాచ్యం: సౌదీ అరేబియా, టర్కీ వంటి దేశాలు రికార్డు స్థాయిలో పర్యాటకులను ఆహ్వానిస్తున్నాయి. సాంస్కృతిక వారసత్వం , విలాసవంతమైన పర్యాటక ప్రాజెక్టులతో ఈ దేశాలు కొత్త పర్యాటక గమ్యస్థానాలుగా ఉద్భవిస్తున్నాయి.

*భవిష్యత్తుపై అంచనాలు

ఈ మార్పుల పర్యాటకుల ప్రాధాన్యతలలో స్పష్టమైన మార్పును సూచిస్తున్నాయి. భవిష్యత్తులో పర్యాటకులు దగ్గరగా ఉండే, తక్కువ ఖర్చుతో కూడిన, రాజకీయంగా ఆతిథ్యపూర్వకంగా వ్యవహరించే దేశాలకు ఎక్కువ ప్రాధాన్యత ఇస్తారని ఈ గణాంకాలు స్పష్టం చేస్తున్నాయి. అమెరికా పర్యాటక మార్కెట్లో తన స్థానాన్ని తిరిగి పొందాలంటే, ప్రయాణ ఖర్చులను తగ్గించడం, వీసా విధానాలను సరళీకరించడం వంటి చర్యలు తీసుకోవడం అవసరమని నిపుణులు అభిప్రాయపడుతున్నారు. ఈ కొత్త ధోరణులు ప్రపంచ పర్యాటక ఆర్థిక వ్యవస్థలో శక్తుల సమతుల్యతను మార్చనున్నాయి.