$3Kకి ఉద్యోగమా? OPT విద్యార్థులపై మోసగాళ్ల దాడి
OPT ద్వారా ఉద్యోగం పొందిన విద్యార్థులు ఎదుర్కొంటున్న ప్రమాదకరమైన పరిస్థితికి ఇటీవల జరిగిన ఒక సంఘటనే నిదర్శనం.
By: A.N.Kumar | 29 Sept 2025 1:11 AM IST
అమెరికాలో ఉన్నత విద్యను అభ్యసిస్తున్న అంతర్జాతీయ విద్యార్థులు ప్రస్తుతం ఆప్షనల్ ప్రాక్టికల్ ట్రైనింగ్ (OPT) ద్వారా ఉద్యోగాలు పొందే క్రమంలో తీవ్ర సంక్షోభాన్ని ఎదుర్కొంటున్నారు. ఒకవైపు కఠినమైన వీసా నిబంధనలు, మరోవైపు ఉద్యోగాల పేరిట విద్యార్థుల ఆందోళనను సొమ్ము చేసుకుంటున్న మోసపూరిత కన్సల్టెన్సీల దాడితో వారి భవిష్యత్తు అంధకారంలో పడుతోంది.
ఉద్యోగం దొరికినా ఆందోళనే: అడుగడుగునా అనిశ్చితి
OPT ద్వారా ఉద్యోగం పొందిన విద్యార్థులు ఎదుర్కొంటున్న ప్రమాదకరమైన పరిస్థితికి ఇటీవల జరిగిన ఒక సంఘటనే నిదర్శనం. ఒక విద్యార్థి జూలై 2025లో ఉద్యోగంలో చేరిన తొమ్మిది రోజులకే, ఆ ఎంప్లయర్ (యాజమాన్యం) ఊహించని విధంగా వెనక్కి పంపారు. దీనికి తోడు, H-1B వీసా ఇంటర్వ్యూలు కూడా నిలిచిపోవడంతో అమెరికాలో ఉద్యోగం, నివాసంపై ఆశలు పెట్టుకున్న విద్యార్థుల పరిస్థితి మరింత సంక్లిష్టమైంది.
STEM OPT: కేవలం 90 రోజుల టైమ్ బాంబ్
అంతర్జాతీయ విద్యార్థులకు జారీ చేసే F-1 వీసాపై ఉన్న అత్యంత కఠినమైన నిబంధనలలో ఒకటి - 90 రోజుల నిరుద్యోగ వ్యవధి పరిమితి. STEM OPT పొందిన విద్యార్థులకు ఈ గడువులోనే ఉద్యోగం దొరకాలి. అలా దొరకకపోతే, వారి వీసా ఆటోమేటిక్గా రద్దు అవుతుంది.
ఉదాహరించబడిన విద్యార్థి ఇప్పటికే 66 రోజులు నిరుద్యోగంగా గడిపిన నేపథ్యంలో, అతనికి మిగిలింది కేవలం కొన్ని రోజులు మాత్రమే. ఈ కొద్ది సమయం లోపల కొత్త ఉద్యోగం దొరకకపోతే, ఆ విద్యార్థి తమ విద్య, కలలు, పెట్టుబడిని కోల్పోయి స్వదేశానికి తిరిగి వెళ్లాల్సిన దుస్థితి ఏర్పడుతుంది. ఈ 90 రోజుల కౌంట్డౌన్ అనేక మంది విద్యార్థుల భవిష్యత్తును ప్రమాదంలో పడేస్తోంది.
మోసగాళ్ల వల: వేల డాలర్లు వసూలు చేస్తున్న కన్సల్టెన్సీలు
విద్యార్థుల ఈ ఆందోళన.. అశక్తతను కొందరు మోసగాళ్లు కన్సల్టెన్సీలు పూర్తిగా ఉపయోగించుకుంటున్నారు.
ఉద్యోగం కోల్పోయిన లేదా వీసా గడువు ముగుస్తున్న విద్యార్థులను లక్ష్యంగా చేసుకుని ఈ ఏజెన్సీలు అక్రమాలకు పాల్పడుతున్నాయి. ఉద్యోగం కొనుగోలు పేరుతో ఆన్బోర్డింగ్ కోసం: 800–900 డాలర్లు, పేచెక్ సెట్అప్ కోసం: 1,500–2,000 డాలర్లు... చొప్పున మొత్తం వేల డాలర్లు వసూలు చేస్తున్నాయి.
ఈ డబ్బు తీసుకున్నా కూడా, వారికి నిజమైన ఉద్యోగం లేదా గ్యారంటీ ఇవ్వడం లేదు. ఇవి కేవలం విద్యార్థుల డబ్బును దోచుకోవడమే తప్ప, వారి కెరీర్కు ఏమాత్రం ఉపయోగపడవు. ఈ మోసాల వల్ల విద్యార్థులు తమ సొమ్ము, వీసా స్టేటస్, భవిష్యత్తు అన్నింటినీ పణంగా పెట్టే దయనీయ పరిస్థితి తలెత్తింది.
అమెరికా అధికారుల కఠిన చర్యలు: ఫ్రాడ్ ప్లేస్మెంట్స్పై ఉక్కుపాదం
ఇటీవలి కాలంలో అమెరికా ప్రభుత్వం ఫేక్ ఎంప్లయర్స్ , ఫ్రాడ్ ప్లేస్మెంట్స్పై పట్టు బిగించింది. ఇమ్మిగ్రేషన్ అధికారులు ప్రతి విద్యార్థి ఉద్యోగ వివరాలను, పని చేసే విధానాన్ని ప్రతి స్టెప్ను ట్రాక్ చేస్తున్నారు.
ఈ నేపథ్యంలో మోసపూరిత కన్సల్టెన్సీల ద్వారా డబ్బు చెల్లించి ఉద్యోగం కొనుగోలు చేసే ఏ చిన్న ప్రయత్నం అయినా సరే, విద్యార్థి యొక్క కెరీర్ను వెంటనే ఖతం చేయగలదు. భవిష్యత్తులో అమెరికా వీసా అవకాశాలను పూర్తిగా దూరం చేయగలదు.
ఈ దారుణమైన ఘటన మరోసారి అంతర్జాతీయ విద్యార్థుల యొక్క బలహీనతను.. అవసరాన్ని బయటపెట్టింది. వారి అశక్తతను కొద్దిమంది మోసగాళ్లు దోపిడీ చేస్తున్నారు.
అందువల్ల, ప్రభుత్వాలు , విశ్వవిద్యాలయాలు కఠిన చర్యలు తీసుకుని, మోసగాళ్లపై ఉక్కుపాదం మోపాల్సిన అవసరం ఉంది. విద్యార్థులు సురక్షితంగా న్యాయబద్ధంగా ఉద్యోగాలు పొందేలా సహాయపడటం, వారికి సరైన మార్గనిర్దేశం చేయడం అత్యవసరం. లేదంటే, అమెరికాలో ఉన్నత విద్యకు వెళ్లాలనుకునే వేలాది మంది విద్యార్థుల కలలు అక్రమార్కుల చేతుల్లో చితికిపోతాయి.