విశాల్ సినిమా రిలీజ్ ఆపాలంటూ హైకోర్టు ఉత్త‌ర్వు

త‌మిళ హీరో విశాల్ మ‌రోసారి లీగ‌ల్ వివాదంలో చిక్కుకున్నారు. ఆయ‌న న‌టిస్తున్న తాజా చిత్రం విడుద‌ల‌ను నిలిపివేయాలంటూ మ‌ద్రాస్ హైకోర్టు మ‌ధ్యంత‌ర ఉత్త‌ర్వులు జారీ చేసింది. ద‌ర్శ‌కుడు ఎం.ఎస్ ఆనంద‌న్ ద‌ర్శ‌క‌త్వంలో విశాల్ న‌టించి నిర్మించిన చిత్రం `చ‌క్ర‌`. సైబ‌ర్ క్రైమ్ నేప‌థ్యంలో `అభిమ‌న్యుడు` చిత్రానికి సీక్వెల్ ‌గా రూపొందిన ఈ మూవీ రిలీజ్ ప్ర‌శ్నార్థ‌కంలో ప‌డిపోయింది. శ్ర‌ద్ధా శ్రీ‌నాథ్‌.. రెజీనా క‌సాండ్రా హీరోయిన్ లుగా న‌టించిన ఈ చిత్రాన్ని దీపావ‌ళికి ఓటీటీలో రిలీజ్ చేయాల‌ని
ప్లాన్ చేశారు.

ఈ మూవీ విడుద‌లను నిలిపివేయాలంటూ ట్రిడెంట్ ఆర్ట్స్ సంస్థ మ‌ద్రాస్ హైకోర్టులో పిటీష‌న్ దాఖ‌లు చేసింది. విశాల్ న‌టించిన `యాక్ష‌న్‌` చిత్రానికి తాము పెట్టిన పెట్టుబ‌డిని తిరిగి చెల్లించే వ‌ర‌కు ఈ చిత్ర రిలీజ్‌ని నిలిపివేయాలంటూ కోర్టుని కోరింది. దీంతో విచార‌ణ చేప‌ట్టిన ధ‌ర్మాస‌నం విశాల్ న‌టించిన `చ‌క్ర‌` చిత్ర రిలీజ్ ని నిలిపి వేస్తూ సంచ‌ల‌న తీర్పునిచ్చింది. `యాక్ష‌న్` చిత్రానికి 44 కోట్లు బ‌డ్జెట్ అయింది. అయితే ఆ అనుకున్న స్థాయిలో ఈ మూవీ క‌లెక్ట్ చేయ‌లేక‌పోయింది. 20 కోట్లకు పూచీగా వున్న విశాల్ త‌న త‌దుప‌రి చిత్ర‌మైన `చ‌క్ర`ని ఇదే సంస్థ‌కు చేస్తాన‌ని మాటిచ్చార‌ట‌.

అయితే ఆ మాట‌ని త‌ప్పి సొంత బ్యాన‌ర్ లో సినిమా చేసుకోవ‌డం త‌మ‌కు వ‌చ్చిన 8.20 కోట్ల న‌ష్టాన్ని తిరిగి చెల్లించ‌క‌పోవ‌డంతో ట్రిడెంట్ ఆర్ట్స్ వ‌ర్గాలు కోర్టుని ఆశ్ర‌యించాయి. ఆ మొత్తం తిరిగి త‌మ‌కు చెల్లించే వ‌ర‌కు `చ‌క్ర‌` రిలీజ్‌ని నిలిపివేయాల‌ని కోర‌డంతో మ‌ద్రాస్ హైకోర్టు ఈ మూవీ రిలీజ్‌పై స్టేవిధించ‌డం సంచ‌ల‌నంగా మారింది.