ఈ వారం ప్రేక్షకుల ముందుకు రాబోతున్న కొత్త సినిమాలు ఇవే..!

Wed Nov 24 2021 05:00:01 GMT+0530 (IST)

New movies coming out to the audience this week

కరోనా సెకండ్ వేవ్ పాండమిక్ తర్వాత సినిమాలన్నీ వరుసగా విడుదల అవుతున్నాయి. కొన్ని థియేట్రికల్ రిలీజ్ అవుతుంటే.. మరికొన్ని ఓటీటీ బాట పడుతున్నాయి. వేదిక ఏదైనా చిన్నవో పెద్దవో వారానికి అర డజనుకు పైగా చిత్రాలు ప్రేక్షకుల ముందుకు వస్తున్నాయి. ఈ క్రమంలో రాబోయే శుక్రవారం కూడా పలు ఆసక్తికరమైన సినిమాలు అటు థియేటర్ తో పాటు ఇటు ఓటీటీలోనూ అలరించేందుకు రెడీ అవుతున్నాయి. ఈ వారం ప్రేక్షకుల ముందుకు రాబోతున్న కొత్త సినిమాల జాబితాను ఇప్పుడు పరిశీలిద్దాం!



'దృశ్యం 2': ఇది విక్టరీ వెంకటేష్ హీరోగా జీతూ జోసఫ్ దర్శకత్వంలో రూపొందిన క్రైమ్ థ్రిల్లర్. మలయాళ బ్లాక్ బస్టర్ 'దృశ్యం 2' యొక్క తెలుగు రీమేక్.. 2014లో వచ్చిన 'దృశ్యం' చిత్రానికి సీక్వెల్. థియేట్రికల్ రిలీజ్ స్కిప్ చేస్తూ ఈ సినిమాని డైరెక్ట్ ఓటీటీ విధానంలో విడుదల చేస్తున్నారు. అమెజాన్ ప్రైమ్ వీడియోలో నవంబర్ 25 నుండి ఈ సినిమా స్ట్రీమింగ్ కానుంది. ఇటీవల విడుదలైన ట్రైలర్ కు మంచి రెస్పాన్స్ లభించింది. అనూప్ రూబెన్స్ ఈ చిత్రానికి సంగీతం సమకూర్చారు. సురేశ్ ప్రొడక్షన్స్ బ్యానర్ పై సురేష్ బాబు ఈ సినిమాని నిర్మించారు.

'అనుభవించు రాజా': రాజ్ తరుణ్ హీరోగా శ్రీను గావిరెడ్డి తెరకెక్కించిన చిత్రమిది. ఇందులో కషికా ఖాన్ హీరోయిన్ గా నటించింది. అవుట్ అండ్ అవుట్ ఎంటర్టైనర్ గా రూపొందుతున్న ఈ చిత్రాన్ని నవంబర్ 26న థియేట్రికల్ రిలీజ్ చేస్తున్నారు. ఇప్పటికే విడుదల చేసిన ప్రచార చిత్రాలు - టీజర్ - ట్రైలర్ మంచి స్పందన తెచ్చుకున్నాయి. అన్నపూర్ణ స్టూడియోస్ - శ్రీ వేంకటేశ్వర సినిమాస్ వంటి అగ్ర నిర్మాణ సంస్థలు సంయుక్తంగా నిర్మిస్తున్న ఈ సినిమాపై అందరి దృష్టి పడింది. గోపీ సుందర్ ఈ చిత్రానికి సంగీతం సమకూర్చారు.

'క్యాలీఫ్లవర్': బర్నింగ్ స్టార్ సంపూర్ణేష్ బాబు హీరోగా ఆర్కే మలినేని తెరకెక్కించిన వినోదాత్మక చిత్రమిది. 'శీలో రక్షతి రక్షితః' అన్నది దీనికి ఉపశీర్షిక. ప్రచార కార్యక్రమాలతో మేకర్స్ ఈ సినిమాపై ఆసక్తిని కలిగించారు. ఆడాళ్ల శీలానికే కాదు.. మగాళ్ల శీలానికి కూడా విలువ ఉంటుందనే విభిన్నమైన కాన్సెప్టుతో ఆద్యంతం కడుపుబ్బా నవ్వించేలా ఈ సినిమాని తీర్చిదిద్దారని తెలుస్తోంది. మధుసూధన క్రియేషన్స్ - రాధాకృష్ణ టాకీస్ పతాకాలపై ఆశా జ్యోతి గోగినేని నిర్మించిన ఈ చిత్రం నవంబరు 26న థియేటర్లలోకి వస్తోంది.

'ఆశ ఎన్ కౌంటర్': యావత్ దేశాన్ని ఉలిక్కిపడేలా చేసిన హైదరాబాద్ గ్యాంగ్ రేప్ దుర్ఘటన ఆధారంగా ఈ చిత్రాన్ని రూపొందించారు. 2019 నవంబర్ 26న నగరశివారులోని చటాన్ పల్లి వద్ద ఓ యువతిపై కొందరు యువకులు సామూహిక అత్యాచారానికి పాల్పడి.. దారుణంగా హత్య చేశారు. ఇదే నేపథ్యాన్ని చేసుకుని తెరకెక్కించిన ఈ సినిమాని నవంబర్ 26వ తేదీనే థియేటర్లలో విడుదల చేస్తుండటం గమనార్హం. సెన్సేషనల్ డైరెక్టర్ రామ్ గోపాల్ వర్మ పర్యవేక్షణలో రూపొందిన ఈ చిత్రానికి ఆనంద్ చంద్ర దర్శకత్వం వహించారు. ఆర్జీవీ సమర్పణలో అనురాగ్ కంచర్ల నిర్మించారు.

'ది లూప్': తమిళ స్టార్ హీరో శింబు నటించిన ఈ చిత్రానికి వెంకట్ ప్రభు దర్శకత్వం వహించారు. పాన్ ఇండియా స్థాయిలో రూపొందుతున్న ఈ సినిమాని తెలుగులో గీతా ఆర్ట్స్ డిస్ట్రిబ్యూషన్ వారు రిలీజ్ చేస్తున్నారు. ఇది టైం లూప్ కాన్సెప్ట్ తో సైన్స్ ఫిక్షన్ అంశాలతో తెరకెక్కుతున్న పొలిటికల్ యాక్టన్ థ్రిల్లర్. ఇందులో కళ్యాణి ప్రియదర్శన్ - ఎస్ జె సూర్య కీలక పాత్రలు పోషించారు. యువన్ శంకర్ రాజా సంగీతం సమకూర్చారు. వి.హౌస్ పతాకంపై సురేష్ కామాక్షి నిర్మించిన ఈ చిత్రం నవంబర్ 26న ప్రేక్షకుల ముందుకు రాబోతోంది.

#BRO: టాలెంటెడ్ యాక్టర్ నవీన్ చంద్ర - అవికా గోర్ ప్రధాన పాత్రల్లో రూపొందిన సినిమా ఇది. ఇందులో వీరిద్దరూ హీరో హీరోయిన్లుగా కాకుండా అన్నాచెల్లెళ్లుగా కనిపించనున్నారు. కార్తీక్ తురుపాని దర్శకత్వం వహించిన ఈ చిత్రానికి శేఖర్ చంద్ర సంగీతం సమకూర్చారు. మ్యాంగో మాస్ మీడియా సంస్థ సమర్పణలో జేజేఆర్ ఎంటర్టైన్మెంట్స్ - ఎస్టీటీవీ ఫిలిమ్స్ సంస్థలు ఈ చిత్రాన్ని నిర్మించాయి. #బ్రో మూవీని సోనీ లివ్ ఓటీటీలో నవంబర్ 26న రిలీజ్ చేస్తున్నారు.

వీటితోపాటుగా '1997' - 'కార్పోరేట్' - 'భగత్ సింగ్ నగర్' వంటి చిన్న సినిమాలు ఈ శుక్రవారం థియేటర్లలోకి వస్తున్నాయి. అలానే ఆల్రెడీ థియేట్రికల్ రిలీజ్ అయిన 'రొమాంటిక్' 'రిపబ్లిక్' వంటి సినిమాలు కూడా నవంబర్ 26 నుంచి ఓటీటీలో స్ట్రీమింగ్ కానున్నాయి.