అబ్బురపరుస్తున్న 'అవతార్ 2' కాన్సెప్ట్ పోస్టర్స్..

హాలీవుడ్ డైరెక్టర్ జేమ్స్ కెమెరూన్ సృష్టించిన గ్రాఫిక్ వండర్ ''అవతార్''. 2009లో ప్రేక్షకుల ముందుకు వచ్చిన ఈ సినిమా వసూళ్ల వర్షం కురిపించి.. వరల్డ్ వైడ్ బాక్సాఫీస్ వద్ద సరికొత్త రికార్డులు నమోదు చేసింది. ఈ విజువల్ వండర్ అన్ని దేశాలతో పాటుగా ఇండియాలోనూ భారీ కలెక్షన్స్ రాబట్టింది. ఒక దశాబ్దానికి పైగా ప్రపంచంలో అత్యధిక వసూళ్లు సాధించిన చిత్రంగా 'అవతార్' నిలవగా.. 2019లో 'అవెంజర్స్ -ఎండ్ గేమ్' ఆ రికార్డుల్ని బ్రేక్ చేసింది. అయితే చైనాలో రీ-రిలీజ్ కలెక్షన్స్ తో మళ్ళీ వరల్డ్ నెం.1 గా 'అవతార్' అవతరించింది.

ఈ అద్భుత సృష్టికి సీక్వెల్ గా మరో నాలుగు సినిమాలు రెడీ చేయనున్నట్లు దర్శకుడు జేమ్స్ కేమరూన్ ఇది వరకే ప్రకటించారు. ప్రస్తుతం ''అవతార్ 2'' సినిమా వర్క్ చేస్తున్నారు. అందులో భాగంగా అవతార్ పార్ట్-2 కోసం రెడీ చేసిన కొన్ని కాన్సెప్ట్ ఆర్ట్ ఇమేజెస్ ని మేకర్స్ సోషల్ మీడియా వేదికగా విడుదల చేశారు. స్టన్నింగ్ గా ఉన్న ఈ పోస్టర్స్ అందరిని ఆకట్టుకుంటున్నాయి. ఫస్ట్ పార్ట్ కు మించి 'అవతార్-2' విజువల్ వండర్ గా రూపొందుతోందని ఈ కాన్సెప్ట్ పోస్టర్స్ చూస్తే అర్థం అవుతోంది. ప్రస్తుతం ఈ ఇమేజెస్ నెట్టింట వైరల్ గా మారాయి.

కాగా, ''అవతార్ 2'' కోసం ప్రపంచ వ్యాప్తంగా సినీ అభిమానులు ఎంతో ఆసక్తిగా ఎదురు చూస్తున్నారు. ఎప్పుడో రిలీజ్ కావాల్సిన ఈ చిత్రం కరోనా కారణంగా లేట్ అవుతూ వస్తోంది. బిగ్గెస్ట్ ఫాంటసీ అడ్వెంచర్ చిత్రంగా రూపొందుతోన్న 'అవతార్-2'.. అన్నీ అనుకున్నట్లు జరిగితే 2022 డిసెంబర్ 16న విడుదల కానుంది. ఈ సినిమా ఎలాంటి సంచలనాలు సృష్టిస్తుందో చూడాలి. ఇకపోతే 'అవతార్-3' చిత్రాన్ని 2024 డిసెంబర్ లో.. 'అవతార్-4' ని 2026 డిసెంబర్ లో రిలీజ్ చేయనున్నారు. ఇక చివరి భాగం 'అవతార్-5' ను 2028 డిసెంబర్ లో విడుదల చేస్తామని మేకర్స్ ప్రకటించారు.