వైరల్ ఇష్యూ... 100 ఏళ్ల వృద్ధుడికి నాలుగు దశాబ్ధాల తర్వాత న్యాయం..!

భారతీయ న్యాయస్థానాల్లో ఎన్నో కేసులు దశాబ్ధాలుగా పెండింగులోనే ఉన్నాయని.. మరికొన్ని కేసులో తీవ్రమైన జాప్యం జరుగుతుందనే చర్చ జరుగుతున్న సంగతి తెలిసిందే! ఈ క్రమంలో దాదాపు 40 సంవత్సరాల తర్వాత 100 ఏళ్ల వృద్ధుడికి న్యాయం జరిగిన తీర్పు తాజాగా వెలువడింది. ఈ తీర్పు న్యాయ వ్యవస్థలో జాప్యం గురించిన చర్చను తిరిగి తీవ్రంగా ప్రారంభించే అవకాశం ఉందని అంటున్నారు. ఈ జాప్యాలు నిందితులు, బాధితుల కుటుంబాలకు తీవ్ర పరిణామాలను కలిగిస్తాయని చెబుతున్నారు.

అవును... సుమారు 40 ఏళ్ల తర్వాత ఓ సంచలన కేసులో తాజాగా తీర్పు వెలువడింది. దశాబ్ధాల నిరీక్షణ తర్వాత 100 ఏళ్ల వృద్ధుడికి న్యాయం దక్కింది. ఈ మేరకు అతన్ని నిర్దోషిగా తేలుస్తూ అలహాబాద్ హైకోర్టు తాజాగా తీర్పునిచ్చింది. జస్టిస్ చంద్రదరి సింగ్, జస్టిస్ సంజీవ్ కుమార్ లతో కూడిన డివిజన్ బెంచ్ ఈ మేరకు తీర్పు వెల్లడించింది. ఈ కేసు 1982 ఆగస్టు 9న జరిగిన ఓ హత్యకు సంబంధించినది కాగా.. ఇందులోని మిగిలిన నిందితుడు ఇప్పటికే మరణించడం గమనార్హం.

వివరాళ్లోకి వెళ్తే... 1982లో ఉత్తరప్రదేశ్ రాష్ట్రంలోని ఓ భూవివాదం చినికి చినికి గాలివానగా మారి ఒకరి హత్యకు దారితీసింది. ఈ కేసులో మైక్ అనే వ్యక్తి ప్రధాన నిందితుడు కాగా.. ధనీరామ్, సత్తిదిన్ లు హత్యకు ప్రేరేపించారని అభియోగాలు నమోదయ్యాయి. అయితే ఈ కేసును విచారించిన హమీర్ పుర్ సెషన్స్ కోర్టు 1984లో ధనీరామ్, సత్తిదిన్ లకు జీవితఖైదు విధించింది. దీంతో... ఈ తీర్పును సవాల్ చేస్తూ వీరిద్దరూ అలహాబాద్ హైకోర్టును ఆశ్రయించారు.

అప్పీలు పెండింగులో ఉన్న సమయంలో వీరికి బెయిల్ మంజూరైంది. ఆ తర్వాత సుమారు నాలుగు దశాబ్ధాలుగా కేసు పెండింగ్ లోనే ఉంది. ఈ కాలంలో సత్తిదిన్ మరణించారు కూడా. దీంతో ధనీరామ్ మాత్రమే జీవించి ఉన్న ఏకైక అప్పీలుదారుగా మిగిలారు. ఈ నేపథ్యంలో హైకోర్టులో తాజాగా విచారణ జరిగింది. ఈ సందర్భంగా అప్పీల్ పై నిర్ణయంలో అసాధారణ జాప్యం, ప్రాసిక్యూషన్ లోని లోపాలను ప్రస్థావించిన న్యాయస్థానం తాజాగా అతడిని నిర్దోషిగా తేలుస్తూ తీర్పు వెల్లడించింది.