'ది బ్యాడ్స్‌ ఆఫ్‌ బాలీవుడ్‌'... హైకోర్టులో కీలక పరిణామం!

బాలీవుడ్ బాద్ షా షారుక్‌ ఖాన్‌ తనయుడు ఆర్యన్‌ ఖాన్‌ దర్శకుడిగా పరిచయమైన వెబ్‌ సిరీస్‌ 'ది బ్యాడ్స్‌ ఆఫ్‌ బాలీవుడ్‌' సిరీస్‌ పై నార్కోటిక్స్‌ కంట్రోల్‌ బ్యూరో మాజీ అధికారి సమీర్‌ వాంఖడే దావా వేసిన సంగతి తెలిసిందే. ఈ విషయంలో తాజాగా ఢిల్లీ హైకోర్టులో కీలక పరిణామం చోటు చేసుకుంది. దీంతో.. సిరీస్ నిర్మాతలకు భారీ ఊరట లభించినట్లయ్యింది.

అవును... ఆర్యన్ ఖాన్ దర్శకత్వం వహించిన 'ది బ్యాడ్స్ ఆఫ్ బాలీవుడ్' సిరీస్‌ లో తన పాత్రను పోషించినందుకు స్ట్రీమింగ్ ప్లాట్‌ ఫామ్ నెట్‌ ఫ్లిక్స్, షారుఖ్ ఖాన్ నిర్మాణ సంస్థ రెడ్ చిల్లీస్ ఎంటర్‌ టైన్‌ మెంట్‌ పై నార్కోటిక్స్ కంట్రోల్ బ్యూరో మాజీ అధికారి సమీర్ వాంఖడే దాఖలు చేసిన పరువు నష్టం కేసులో కీలక పరిణామం చోటు చేసుకుంది. ఇందులో భాగంగా.. ఈ దావాను ఢిల్లీ హైకోర్టు కొట్టివేసింది.

ఈ సిరీస్‌ లో తనను తప్పుగా చూపించారంటూ సమీర్‌ వాంఖడే ఆరోపణలు చేశారు. ఈ నేపథ్యంలో.. షారుక్‌ ఖాన్‌, రెడ్‌ చిల్లీ ఎంటర్‌ టైన్‌ మెంట్‌ సంస్థపై పరువునష్టం దావా వేశారు. ఇందులో భాగంగా... తన పరువుకు భంగం కలిగించినందుకు రూ.2 కోట్లు చెల్లించాలని పిటిషన్‌ లో పేర్కొన్నారు. నెట్‌ ఫ్లిక్స్ సిరీస్ తన ప్రతిష్టను దిగజార్చిందని వాంఖడే తన దావాలో ఆరోపించారు.

ఈ నేపథ్యంలోనే... క్యాన్సర్ రోగుల కోసం టాటా మెమోరియల్ క్యాన్సర్ హాస్పిటల్‌ కు విరాళంగా ఇచ్చే రూ.2 కోట్ల నష్టపరిహారాన్ని కోరారు. 'సత్యమేవ జయతే' అనే జాతీయ నినాదం పలికిన వెంటనే ఒక పాత్ర మధ్య వేలు పైకెత్తుతున్నట్లు చూపించే ఒక నిర్దిష్ట సన్నివేశంపై కూడా వాంఖడే విజ్ఞప్తి అభ్యంతరాలు వ్యక్తం చేసింది. అయితే.. నేడు ఈ దావాపై విచారణ జరిపిన ఢిల్లీ హైకోర్టు దీన్ని కొట్టివేసింది.

ఈ పిటిషన్‌ ను విచారించే అధికారం తమకు లేదని జస్టిస్ పురుషీంద్ర కుమార్ కౌరవ్ అభిప్రాయపడ్డారు! ఈ కేసును తోసిపుచ్చారు! అయితే.. 2021లో మాదకద్రవ్యాలను కలిగి ఉండటం, వినియోగించడం, అక్రమ రవాణా చేయడం వంటి ఆరోపణలపై ఆర్యన్ ఖాన్‌ ను అరెస్టు చేయడం ద్వారా వార్తల్లో నిలిచిన వాంఖడే.. తగిన ఫోరమ్‌ ను సంప్రదించడానికి స్వేచ్ఛగా ఉన్నారని స్పష్టం చేశారు.

కాగా... బాలీవుడ్‌ లో తొలి ప్రయత్నంలోనే హిట్‌ కొట్టిన హీరో జీవితంలో ఎలాంటి మార్పులొచ్చాయన్న కథాంశంతో 'ది బ్యాడ్స్‌ ఆఫ్‌ బాలీవుడ్‌' రూపొందిన సంగతి తెలిసిందే. గతేడాది సెప్టెంబర్‌ లో ప్రేక్షకుల ముందుకువచ్చిన ఈ సిరీస్‌ ఎన్నో వివాదాలు ఎదుర్కొంది. ఇందులో ఎలక్ట్రానిక్‌ సిగరెట్ల నిషేధ చట్టాన్ని రణబీర్‌ కపూర్‌ ఉల్లంఘించారన్న అంశంపై జాతీయ మానవ హక్కుల కమిషన్‌ గతంలో చర్యలు తీసుకుంది.