ధర్మాన బ్రదర్స్ లెక్క తేడా కొట్టిందా ?

శ్రీకాకుళం జిల్లా వైసీపీని నడిపిస్తున్న వారు ధర్మాన బ్రదర్స్. దానికి తోడు దశాబ్దాల అనుభవం వారి సొంతం. ధర్మాన ప్రసాదరావు అయితే మంత్రిగా చాలా కాలం పనిచేశారు. సుదీర్ఘ కాలం మంత్రిగా చేసిన రికార్డు ఇప్పటికైతే ఆయనకే ఉంది. నాలుగు దశాబ్దాల పై చిలుకు అనుభవం. అలాంటిది ఆయన సొంత జిల్లాలో వైసీపీకి కోలుకోలేని దెబ్బ తగిలింది. పరిషత్తు ఎన్నికల్లో వైసీపీకి దక్కింది ఒకే ఒక్క జెడ్పీటీసీ. మొత్తం శ్రీకాకుళం జిల్లాలో 28 జెడ్పీటీసీలు ఉంటే అందులో కూటమికి 27 లభించాయి. ఒక్క జెడ్పీటీసీ వైసీపీ పరం అయింది. అది కూడా ధర్మాన బ్రదర్స్ కుటుంబీకుల సొంత ఇలాకా అయిన నరసన్నపేటలో జరిగింది.

కూటమి కుమ్మేసింది :

ఇదిలా ఉంటే శ్రీకాకుళం జిల్లాలో జరిగిన పరిషత్తు ఎన్నికల్లో కూటమి కుమ్మేసింది అని అంటున్నారు. మొత్తం 27 జెడ్పీటీసీలు గెలుచుకుని కూటమి తిరుగులేని ఆధిక్యతతో జెడ్పీ చైర్మన్ పదవిని దక్కించుకోబోతోంది. ఇక్కడ జనసేనకు ఈ పదవి ఇస్తారని టాక్ నడుస్తోంది. జనసేన ఈ ఎన్నికల్లో మూడు జెడ్పీటీసీలు గెలుచుకుంటే బీజేపీ రెండు గెలుచుకుంది. మొత్తం 22 జెడ్పీటీసీలు టీడీపీ పరం అయ్యాయి. దాంతో టీడీపీ నుంచి కూడా తీవ్రస్థాయిలో ఒత్తిడి వస్తోంది. తమకు చైర్మన్ చాన్స్ కావాలని వారు కోరుతున్నట్లుగా చెబుతున్నారు.

దిగ్గజ నేతలు ఉన్న చోట :

ఇక చూస్తే శ్రీకాకుళం జిల్లాలో వైసీపీకి దిగ్గజ నేతలే ఉన్నారు. ధర్మాన బ్రదర్స్ తో పాటుగా మాజీ స్పీకర్ తమ్మినేని సీతారాం ఉన్నారు. అలాగే మాజీ మంత్రి సీదరి అప్పలరాజు పలాస లో ఉన్నారు. మాజీ ఎమ్మెల్యేలు అనేక మంది ఉన్నారు. వారిలో పాతపట్నం నుంచి రెడ్డి శాంతి ఉంటే ఎచ్చెర్ల నుంచి గొర్లె కిరణ్ కుమార్ ఉన్నారు. ఇలా నాలుగు వైపులా కాపు కాసే నేతలు ఉండి కూడా కనీసం ఎనిమిది అసెంబ్లీ నియోజకవర్గాల్లో ఒక్కోటి వంతున జెడ్పీటీసీ కూడా దక్కలేదు అంటే సిక్కోలులో వైసీపీ ఎంతలా నాయకత్వం లేమితో ఇబ్బంది పడుతోంది అన్నది అర్ధం అవుతోంది అంటున్నారు.

వర్గ పోరుతోనే :

వైసీపీ విషయానికి వస్తే కూటమిని నిందించి లాభం లేదని క్యాడర్ అంటారు. వర్గ పోరుతోనే వైసీపీ బలహీన పడుతోంది అని చెబుతున్నారు. ప్రతీ నియోజకవర్గంలో కనీసం మూడు వర్గాలు ఉంటున్నాయి. దాంతో వారిలో వారే పోరాడుకుంటూ పార్టీని గాలికి వదిలేస్తున్నారు అన్న చర్చ సాగుతోంది. అందుకే మనసు పెట్టి పనిచేయలేకపోయారు అని ఏకత్రాటిపైకి రాలేకపోయారు అని అంటున్నారు. శ్రీకాకుళంలో వైసీపీకి పూర్వ వైభవం దక్కాలీ అంటే భారీ రిపేర్లు అధినాయకత్వం చేయాల్సిందే అంటున్నారు. కూటమి అంగబలం చూపించింది అర్ధ బలం చూపించింది నియంత్రించింది అన్న మాటలను సాకులను హైకమాండ్ పట్టించుకుంటే మాత్రం సిక్కోలులో వైసీపీ ఫ్యాన్ రెక్కలకు కొత్త ఊపిరి రానట్లే అని కూడా క్యాడర్ నుంచి వినిపిస్తున్న మాటగా ఉంది.