56 ఏళ్ల ప్రయాణానికి ముగింపు.. బఫెట్ తర్వాత బెర్క్షైర్ ఎలా?
తన పదవి నుంచి వైదొలుగుతున్న సందర్భంగా వాటాదారులకు రాసిన లేఖలో బఫెట్ తన ప్రత్యేక శైలిలో స్పందించారు. “కాలమే ఎప్పుడూ గెలుస్తుంది.
By: A.N.Kumar | 19 Sept 2026 8:16 AM IST
వారెన్ బఫెట్.. ప్రపంచ పెట్టుబడి రంగంలో ఈ పేరు ఒక బ్రాండ్. దశాబ్దాల పాటు దీర్ఘకాలిక పెట్టుబడులు.. క్రమశిక్షణ.. సహనం అనే సూత్రాలతో బెర్క్షైర్ హాత్వేను ఒక ప్రత్యేకమైన వ్యాపార సామ్రాజ్యంగా తీర్చిదిద్దిన ఆయన.. ఇప్పుడు ఆ సంస్థ ఛైర్మన్ పదవికి గుడ్బై చెప్పారు. అయితే ఇది పూర్తిస్థాయి వీడ్కోలు కాదు. గౌరవ ఛైర్మన్గా.. బోర్డు డైరెక్టర్గా ఆయన బెర్క్షైర్తో తన అనుబంధాన్ని కొనసాగించనున్నారు.
ఒక వ్యక్తి కాదు.. ఒక పెట్టుబడి సిద్ధాంతం
1970లో బెర్క్షైర్ హాత్వే ఛైర్మన్గా బాధ్యతలు చేపట్టిన బఫెట్.. ఆ తర్వాత సంస్థను సాధారణ వస్త్ర తయారీ కంపెనీ స్థాయి నుంచి విభిన్న రంగాల్లో పెట్టుబడులు పెట్టే దిగ్గజ వ్యాపార సంస్థగా మార్చారు. బీమా, రైల్వేలు, కన్జ్యూమర్ బ్రాండ్లు, ఈక్విటీ పెట్టుబడులు ఇలా అనేక రంగాల్లో మూలధనాన్ని వ్యూహాత్మకంగా మళ్లించారు. తక్షణ లాభాల కంటే దీర్ఘకాలిక విలువ సృష్టిపైనే దృష్టి పెట్టడం ఆయన శైలికి ప్రత్యేక గుర్తింపును తీసుకొచ్చింది. బఫెట్ పెట్టుబడి విధానం వల్ల బెర్క్షైర్ హాత్వే కేవలం ఒక కంపెనీగా కాకుండా ప్రపంచవ్యాప్తంగా పెట్టుబడిదారులకు ఒక అధ్యయన అంశంగా మారింది.
56 ఏళ్ల తర్వాత ఎందుకు కీలకం?
ఒక సంస్థకు వరుసగా 56 ఏళ్లపాటు నాయకత్వం వహించడం సాధారణ విషయం కాదు. ఈ కాలంలో ప్రపంచ ఆర్థిక వ్యవస్థ ఎన్నో మాంద్యాలు, మార్కెట్ పతనాలు, టెక్నాలజీ మార్పులు, పరిశ్రమల పరివర్తనలను చూసింది. అయినా బఫెట్ తన పెట్టుబడి తత్వంలో ప్రధానంగా దీర్ఘకాలిక దృష్టి, ఆర్థిక క్రమశిక్షణ, బలమైన వ్యాపారాలపై పెట్టుబడులకు ప్రాధాన్యం ఇచ్చారు. అందుకే ఆయన పదవి నుంచి తప్పుకోవడం బెర్క్షైర్కు సాధారణ మేనేజ్మెంట్ మార్పు కంటే ఎక్కువ ప్రాధాన్యత కలిగిన పరిణామంగా మారింది.
ఇప్పుడు కుటుంబం చేతుల్లోకి నాయకత్వం
బెర్క్షైర్ హాత్వే కొత్త ఛైర్మన్గా బఫెట్ కుమారుడు హోవర్డ్ బఫెట్ బాధ్యతలు చేపట్టనున్నారు. ఆయన 1993 నుంచి కంపెనీ బోర్డులో సభ్యుడిగా ఉన్నారు. అయితే సంస్థ రోజువారీ నిర్వహణ విషయంలో ఇప్పటికే వారసత్వ మార్పు మొదలైంది. గతేడాది సీఈవో పదవి నుంచి బఫెట్ వైదొలగగా ఆయన స్థానంలో గ్రెగ్ అబెల్ బాధ్యతలు చేపట్టారు. దీంతో బెర్క్షైర్లో నాయకత్వ మార్పు ఒక్కసారిగా కాకుండా దశలవారీగా జరుగుతున్నట్లు స్పష్టమవుతోంది.
బఫెట్ తర్వాత అసలు పరీక్ష ఇదే..
బెర్క్షైర్ హాత్వేకు బఫెట్ పేరు ఎంతగా ముడిపడి ఉందో ప్రత్యేకంగా చెప్పాల్సిన అవసరం లేదు. ఆయన పెట్టుబడి నిర్ణయాలు, వాటాదారులతో సంభాషించే విధానం, వార్షిక సమావేశాలు.. ఇవన్నీ సంస్థకు ప్రత్యేక గుర్తింపును తీసుకొచ్చాయి. ఇప్పుడు ఆయన ఛైర్మన్ పదవి నుంచి తప్పుకోవడంతో కొత్త నాయకత్వం ముందు ప్రధాన సవాలు ఒకటే.. బఫెట్ వారసత్వాన్ని కొనసాగిస్తూ మారుతున్న ప్రపంచ ఆర్థిక పరిస్థితులకు అనుగుణంగా సంస్థను ముందుకు తీసుకెళ్లడం.
‘కాలమే ఎప్పుడూ గెలుస్తుంది’..
తన పదవి నుంచి వైదొలుగుతున్న సందర్భంగా వాటాదారులకు రాసిన లేఖలో బఫెట్ తన ప్రత్యేక శైలిలో స్పందించారు. “కాలమే ఎప్పుడూ గెలుస్తుంది. అయినప్పటికీ ఆ కాలం నా పట్ల కాస్త ఉదారత చూపించింది” అని ఆయన పేర్కొన్నారు. ఈ వ్యాఖ్యలోనే తన దీర్ఘ ప్రయాణంపై బఫెట్ దృక్పథం కనిపిస్తుంది. ఐదు దశాబ్దాలకు పైగా ఒకే సంస్థను నడిపించిన ఆయన.. ఇప్పుడు నిర్ణయాత్మక బాధ్యతలను తదుపరి తరానికి అప్పగిస్తున్నారు.
పెట్టుబడి ప్రపంచంపై చెరగని ముద్ర
పెట్టుబడులతో అపార సంపదను సంపాదించిన బఫెట్.. తన సంపదలో గణనీయమైన భాగాన్ని దానధర్మాలకు కేటాయించారు. అదే సమయంలో ఆయన చెప్పిన పెట్టుబడి సూత్రాలు ప్రపంచవ్యాప్తంగా కోట్లాది మంది ఇన్వెస్టర్లను ప్రభావితం చేశాయి. “త్వరగా ధనవంతులు కావడం” కంటే మంచి వ్యాపారాల్లో దీర్ఘకాలం పెట్టుబడి పెట్టడం, సహనంతో ఉండటం అనే ఆలోచనను బఫెట్ తన కెరీర్ ద్వారా ఆచరణలో చూపించారు. ఇప్పుడు ఛైర్మన్ పదవికి ఆయన గుడ్బై చెప్పినా.. బెర్క్షైర్ హాత్వేలో ఆయన 56 ఏళ్ల వారసత్వం మాత్రం అక్కడితో ముగిసినట్లు కాదు. గౌరవ ఛైర్మన్గా, డైరెక్టర్గా కొనసాగుతూ సంస్థతో తన అనుబంధాన్ని కొనసాగించనున్నారు. బఫెట్ తర్వాత బెర్క్షైర్ ఎలా మారుతుంది? ఇదే ఇప్పుడు ప్రపంచ పెట్టుబడి వర్గాలు ఆసక్తిగా గమనిస్తున్న తదుపరి అధ్యాయం